Na isoqosoqo ni iVakadinadina i Jiova e veiyasa i vuravura (“isoqosoqo lotu”), e doka na dodonu ni tamata yadua me baleta na maroroi kei na taqomaki ni kena itukutuku. E vinakata na isoqosoqo lotu qo na veivosaki vakadodonu, me vakatakilai na itukutuku veiganiti ena veivuke ena nodra qaravi na iVakadinadina i Jiova, ena cicivaki vinaka kina na nodra cakacaka vakalotu kei na nodra veivuke ena itikotiko. E raica vakabibi tale ga na maroroi kei na taqomaki ni itukutuku. (Vosa Vakaibalebale 15:22; 25:9) E sega ni vakacila vakailoa na isoqosoqo ni iVakadinadina i Jiova na itukutuku vuni.—Vosa Vakaibalebale 20:19.

Era kotora eso na vanua na lawa e vauca na taqomaki ni kena itukutuku e dua. Na lawa qori se qai vakarautaki wale tiko ga qo. Ia sa dede na nona raica vakabibi voli mai na isoqosoqo ni iVakadinadina i Jiova na dokai ni nona dodonu e dua kei na maroroi ni kena itukutuku. Ena sega ni veisau na ivakarau sa muri voli mai vakadede qori, ena taqomaka e veigauna na isoqosoqo na itukutuku e kerea me vakatakila e dua.

iDusidusi me Baleta na Taqomaki ni iTukutuku. Ni vakatakila na kena itukutuku e dua ina isoqosoqo ni iVakadinadina i Jiova, ena muri e vica na idusidusi qo:

1. Ena sega ni vakayagataki vakailoa se vakatani na itukutuku.

2. Na itukutuku e vakatakila e dua ena vakayagataki ga ena inaki e kerei kina, me veivuke ena cakacaka vakalotu ni isoqosoqo kei na cakacaka ni veivuke ena itikotiko.

3. Qarauni me donu qai maroroi na itukutuku vou duadua. Ke laurai ni cala e dua na itukutuku, ena yavala totolo na isoqosoqo lotu me veisautaka.

4. Ena maroroi tiko na itukutuku me yacova ga ni sa vakayacori na inaki a kerea kina na isoqosoqo lotu.

5. Ena vakayacori na ka kece e gadrevi me taqomaki kina na itukutuku.

6. Ena muri na iwalewale kei na idusidusi ni isoqosoqo me kua ni vakatakilai kina vakailoa se vakayagataki vakatani na itukutuku. Era tiko ga eso era vakadonui mera raica na itukutuku e maroroi tu ena kompiuta, qai tiko na vosa vuni (password) mera vakayagataka ke ra via raica e dua na itukutuku maroroi. E dau loka na valenivolavola ni suka na cakacaka, era curu rawa ga e loma o ira era cakacaka kina qai soli vei ira na veivakadonui.

7. Ena vakau ga ina dua tale na valenivolavola ni tabana ni iVakadinadina i Jiova na kena itukutuku e dua, ke veivuke ena vakayacori ni cakacaka vakalotu se cakacaka ni veivuke ni isoqosoqo. Era vakatulewataka yadua na iVakadinadina i Jiova mera muria na idusidusi qo, nira sakitaka nodra vakatokai mera iVakadinadina i Jiova.

E yavutaki ena idusidusi qo na ivakavakayagataki ni itukutuku e vakamacalataki ena ivola iSoqosoqo e Cakava na Loma i Jiova. E soli na ivola qori vei ira kece na iVakadinadina i Jiova ena gauna era dautukutuku kina. Ena ikuri ni ivakamacala, raica na ivola iSoqosoqo e Cakava na Loma i Jiova.

Na nona dodonu e dua me taqomaki na kena itukutuku, me veisautaki se boko na kena itukutuku, ena salavata kei na idusidusi e vakarautaka na iVakadinadina i Jiova ena iDusidusi me Baleta na iVakavakayagataki ni Kemu iTukutuku, ena ulutaga lailai Nomu Dodonu.

Na sala era vakayagataka kina na iVakadinadina i Jiova e veiyasa i vuravura na kena itukutuku e dua, e yavutaki ena iDusidusi ni iVakadinadina i Jiova me Baleta na Maroroi ni iTukutuku.