Bíblian sigur einki ítøkiligt um dinosaurar. Men hon sigur, at Gud „hevur skapt alt“, so sjálvandi hevur hann eisini skapt teir. a (Opinberingin 4:11) Hóast Bíblian ikki beinleiðis nevnir dinosaurar, nevnir hon bólkar av dýrum, sum teir kundu hoyrt uppí:

•   „Stóru sjódýrini“, ella „sjóskrímslini“. – 1. Mósebók 1:21; New American Bible.

•   „Øll skriðdýrini á jørðini.“ – 1. Mósebók 1:25.

•   ’Tey villu dýrini á jørðini.’ – 1. Mósebók 1:25.

Hava dinosaurar ment seg frá øðrum dýrum?

 Dinosaurar vísa seg knappliga í steinrenningum, ikki so líðandi sum við eini menning. Hetta samsvarar við tað, sum Bíblian sigur um, at Gud hevur skapt øll dýrini. Til dømis stendur um Gud í Sálmi 146:6, at hann „skapti himmal, jørð, hav, og alt, sum teimum er í“.

Nær livdu dinosaurarnir?

 Bíblian nevnir, at sjódýrini og landdýrini vórðu skapt fimta og sætta skapanardagin, ella skapanartíðarskeiðið. b (1. Mósebók 1:20-25, 31) Dinosaurar kunnu altso sambært Bíbliuni hava verið til í eitt longri tíðarskeið.

Vóru Behemot og Livjatan dinosaurar?

 Nei. Hóast vit ikki við vissu kunnu siga, hvørji hesi dýrini eru, sum eru nevnd í Jobs bók, verður vanliga hildið, at Behemot sipar til áarrossið, og Livjatan til krokodilluna. Hetta passar væl við, hvussu hesi dýrini verða lýst í Bíbliuni. (Job 40:10-18; 40:20; 41:5-8, 22) Orðingarnar „Behemot“ og „Livjatan“ kunnu undir øllum umstøðum ikki sipa til dinosaurar, tí Gud bað Job eygleiða hesi dýrini, og Job livdi langt eftir, at dinosaurarnir vóru útdeyðir. – Job 40:11, 27.

Hvat hendi við dinosaurunum?

 Bíblian nevnir einki um, hvussu og nær dinosaurarnir hvurvu. Men hon sigur, at alt bleiv skapt, „tí [Gud] vildi tað“, so Gud hevði eyðsæð eitt endamál við at skapa dinosaurarnar. (Opinberingin 4:11) Tá ið endamálið var rokkið, læt Gud dinosaurarnar doyggja út.