Gud er førur fyri at síggja alt og gera alt, hann vil, hvar hann vil. (Orðtøkini 15:3; Hebrearabrævið 4:13) Men Bíblian lærir ikki, at Gud er allastaðni ella í øllum. Hon vísir hinvegin, at hann er ein persónur og hevur ein bústað.

•   Skapið á Gudi. Gud er ein andi. (Jóhannes 4:24) Hann er ósjónligur fyri menniskjum. (Jóhannes 1:18) Í Bíbliuni lesa vit um sjónir av Gudi, sum vísa, at hann er eitt ávíst stað. Hann verður ongantíð lýstur at vera allastaðni. – Esaias 6:1, 2; Opinberingin 4:2, 3, 8.

•   Bústaður Guds. Bíblian sigur, at Gud ’býr í Himli’, tað vil siga í andaheiminum. (1. Kongabók 8:30) Hann býr altso ikki í fysiska skapanarverkinum. Bíblian nevnir eitt dømi um, at andaskapningar „komu og stigu fram fyri HARRAN“, a og tað vísir, at Gud býr eitt ávíst stað. – Job 1:6.

Kann Gud vísa mær umsorgan, um hann ikki er allastaðni?

 Ja. Gud hevur stóra umsorgan fyri hvørjum einstøkum av okkum. Hóast hann býr í andaheiminum, sær hann menniskju, sum gjarna vilja gleða hann, og hann hjálpir teimum. (1. Kongabók 8:39; 2. Krønikubók 16:9) Legg til merkis, hvussu góður Jehova er við tey, sum tæna honum:

•   Tá ið tú biður. Jehova hoyrir teg í somu løtu, sum tú biður. – 2. Krønikubók 18:31.

•   Tá ið tú ert tungur í huga. Jehova er nær hjá teimum, „sum hava sundurbrotið hjarta“, og hann „frelsir tey, sum hava sundursoraðan anda“. – Sálmur 34:19.

•   Tá ið tú hevur brúk fyri vegleiðing. Jehova „skal læra teg, og vísa tær vegin“ við sínum orði, Bíbliuni. – Sálmur 32:8.

Vanligar misskiljingar

 Misskiljing: Sálmur 139:8 lærir, at Gud er allastaðni: „Fari eg upp til Himmals, so ert Tú har, og reiði eg mær legu í deyðaríkinum – ja, so ert Tú har.“

 Sannroynd: Hetta bíbliuørindið tosar ikki um bústað Guds. Tað lýsir við poetiskum orðum, at einki stað er so langt burturi, at Gud ikki fær hjálpt okkum.