Bíblian sigur, at tá ið ísraelsmenn løgdu lovaða landið undir seg og býttu tað millum ættirnar, fingu tíggju slektir í ættini hjá Manasse eitt landaøki vestan fyri Jordan, burtur frá restini av ættini. (Josva 17:1-6) Eru fornfrøðilig prógv um, at hetta var so?

 Í 1910 vórðu nøkur pottabrot við hebraiskum áskriftum grivin upp í Samaria. Teksturin á hesum pottabrotunum váttaði, at luksusvørur, eitt nú vín og vakurleikaoljur, vórðu fluttar til kongsborgina í høvuðsstaðnum. Til samans blivu 102 pottabrot funnin, sum kundu dagfestast til áttandu øld f.o.t., men bert 63 av teimum vóru væl lesandi. Á hesum 63 pottabrotunum standa dagfestingar, slektarnøvn og eisini nøvnini á teimum, sum sendu og fingu vørurnar.

 Tað er áhugavert, at allar slektirnar, sum verða nevndar á pottabrotunum úr Samaria, hoyra til ætt Manasse. Sambært NIV Archaeological Study Bible prógvar hetta, „at slektirnar úr ætt Manasse búðu í tí økinum, sum Bíblian sigur, at tær búsettu seg í“.

 Pottabrotini úr Samaria vátta eisini, at tað, sum bíbliuskrivarin Amos segði um tey ríku fólkini um tað mundið, er eftirfarandi. Hann segði: „Tit ... drekka vín úr skálum og salva tykkum við bestu olju.“ (Amos 6:1, 6) Pottabrotini úr Samaria vátta, at slíkar vørur vórðu fluttar inn í tann partin av landinum, sum tær tíggju slektirnar úr ætt Manasse búðu í.