Stýrandi ráðið er ein lítil bólkur av andaliga búnum monnum, sum samskipa arbeiðið hjá Jehova vitnum um allan heimin. Arbeiðið hjá teimum er býtt upp í tveir partar:

•   Teir hava umsjón við bíbilsku undirvísingini, sum Jehova vitni fáa í lesnaði, á møtum og skúlum. – Lukas 12:42.

•   Teir hava umsjón við boðanararbeiðinum hjá Jehova vitnum og hava eftirlit við nýtsluni av stuðlinum, ið verður latin.

 Stýrandi ráðið tekur eftir ’ápostlunum og hinum elstu’ í Jerusalem í fyrstu øld, sum tóku týðandi avgerðir fyri alla ta kristnu samkomuna. (Ápostlasøgan 15:2) Hesir trúføstu menninir vóru ikki leiðarar, og limirnir í stýrandi ráðnum eru heldur ikki leiðarar í okkara samskipan. Teir leita sær ráð í Bíbliuni og ásanna, at Jehova Gud hevur útnevnt Jesus til at vera høvur samkomunnar. – 1. Korintbræv 11:3; Efesusbrævið 5:23.

 Limirnir í stýrandi ráðnum eru Kenneth Cook, Gage Fleegle, Samuel Herd, Geoffrey Jackson, Jody Jedele, Stephen Lett, Gerrit Lösch, Jacob Rumph, Mark Sanderson, David Splane og Jeffrey Winder. Teir tæna á okkara høvuðsskrivstovu í Warwick, New York, USA.

 Stýrandi ráðið hevur stovnað seks nevndir, sum hava umsjón við ymiskum pørtum av okkara arbeiði, og hvør limur situr í eini ella fleiri av hesum nevndunum.

•   Samskipanarnevndin: Hevur umsjón við løgfrøðiligum málum. Skipað verður eisini fyri hjálp, um vanlukkur henda, ella tá ið Jehova vitni verða atsøkt fyri sína trúgv, ella um onnur týðandi mál, sum ávirka samskipanina, stinga seg upp.

•   Starvsfólkanevndin: Tekur sær av øllum, sum hevur við betelfamiljuna at gera.

•   Útgevaranevndin: Hevur umsjón við prenting og flutningi av bíbilskum lesnaði og við arbeiðinum at byggja møtisalir, umsetingar- og deildarskrivstovur.

•   Tænastunevndin: Hevur umsjón við arbeiðinum at boða „evangelium ríkisins“. – Matteus 24:14.

•   Undirvísingarnevndin: Syrgir fyri bíbilsku undirvísingini, sum vit fáa á møtum, skúlum og í ljóðupptøkum og videoum.

•   Skrivinevndin: Syrgir fyri bíbilsku undirvísingini, sum vit fáa í prentaðum lesnaði og á okkara heimasíðu. Hevur eisini umsjón við umsetingararbeiðinum.

 Umframt at arbeiða í hesum nevndunum kemur stýrandi ráðið saman eina ferð um vikuna fyri at tosa um tørvin í samskipanini. Á hesum fundunum tosa teir um, hvat Bíblian sigur, og teir lata seg leiða av heilaga anda Guds, so teir kunnu taka avgerðir, sum teir allir eru samdir um. – Ápostlasøgan 15:25.

 Teir eru álítandi kristnir menn, sum hjálpa til í nevndunum hjá stýrandi ráðnum. (1. Korintbræv 4:2) Teir hava førleikar og royndir innan arbeiðið, sum viðkomandi nevndin hevur umsjón við, og teir eru við á fundinum hjá nevndini hvørja viku. Hjálparmenninir eru ikki við til at taka avgerðir, men teir hava stóra vitan og eru góðir í ráðum. Teir seta avgerðirnar hjá nevndini í verk og kanna eftirfylgjandi, hvussu úrslitið verður av hesum. Stýrandi ráðið kann eisini geva teimum ta uppgávu at vitja Jehova vitni ymsastaðni í heiminum ella at halda fyrilestrar við serlig høvi, eitt nú á ársmøtum ella tá ið fráfaringarhald er í sambandi við Gileadskúlan.