Kúnnuɖetɔ́ Jehovah tɔn lɛ ko zán lilɛdógbeɖevomɛ Biblu tɔn gegě ɖò Biblu kplɔnkplɔn yetɔn hwenu. Amɔ̌ ɖò gbè ɖěɖee mɛ Biblu ko ɖè lɛ é mɛ ɔ, Owe-Wiwe lẹ—Lẹdogbedevomẹ Aihọn Yọyọ Tọn wɛ mǐ yí wǎn na hugǎn, ɖó nyikɔ Mawu tɔn ɖ’emɛ, é sɔgbe bo lɛ́ ɖò wɛn.

•   Nyikɔ Mawu tɔn zinzan. Biblu ɖetɔ́ntɔ́ ɖé lɛ ɖè bo sɔ́ Dǒwatɔ́ Biblu ɔ tɔn sù ǎ. Ði kpɔ́ndéwú ɔ, lilɛdógbeɖevomɛ Biblu tɔn ɖé slɛ́ mɛ ɖěɖee d’alɔ ɖò ali ɖé lɛ nu bɔ è ɖetɔ́n lɛ é 70 sín nyikɔ. É ɖò mɔ̌ có, è ɖè nyikɔ Dǒwatɔ́ Biblu ɔ tɔn, Jehovah Mawu sín Biblu ɖokpo enɛ ɔ mɛ gbɔn fí lɛ bǐ.

   Loɔ, ɖò Lẹdogbedevomẹ Aihọn Yọyọ Tọn mɛ ɔ, è sɔ́ nyikɔ Mawu tɔn ɖó fí vovo afatɔ́n mɔkpan lee é ɖè gbɔn ɖò wema dodó ɔ mɛ é, có wěɖegbɛ́ e ɖetɔ́n é sín nyikɔ ka tɔn ɖ’emɛ ǎ.

•   É sɔgbe. Lilɛdógbeɖevomɛ lɛ bǐ wɛ ɖè wɛn e ɖò Biblu dodó ɔ mɛ é tɔ́n lee é ɖó na nyí gbɔn é ǎ. Ði kpɔ́ndéwú ɔ, lilɛdógbeɖevomɛ ɖokpo lilɛ Matie 7:13 gbɔn lě: “Mi gbɔn hɔn kpɛví ɔ nu, ɖó hɔn e nu è nɔ gbɔn bo nɔ yì zomɛ ɔ d’agba bɔ ali e è nɔ gbɔn yì é vɛ́ gbɔn ǎ.” Amɔ̌, wema dodó ɔ zán xókwín “dɔn,” é nyí “zomɛ” ǎ. Lilɛdógbeɖevomɛtɔ́ lɛ sixu ko sɔ́ xókwín “zomɛ” ɔ d’emɛ, ɖó ye ɖi nǔ ɖɔ è na dóya nú mɛ nyanya lɛ ɖò zomɛ kaka sɔyi. Amɔ̌, Biblu nɔ gudo nú linlin enɛ ǎ. Enɛ wu ɔ, Lẹdogbedevomẹ Aihọn Yọyọ Tọn lilɛ dó alɔ e sɔgbe é jí gbɔn lě: “Mi gbɔn hɔn kpɛví ɔ nu byɔ mɛ, ɖó hɔn e nu è nɔ gbɔn bo nɔ yì dɔn é d’agba bɔ ali e è nɔ gbɔn yì é gbló.”

•   É ɖò wɛn. Lilɛdógbeɖevomɛ ɖagbe ɖé ɖó na sɔgbe, bo ɖó na lɛ́ ɖò wɛn bɔ nukúnnú mimɔ jɛ mɛ na bɔwǔ. Mǐ ni kpɔ́n kpɔ́ndéwú ɖokpo. Ðò Hlɔmanu lɛ 12:11 mɛ ɔ, mɛsɛ́dó Pɔlu e nyí Klisanwun ɖé é zán xógbe ɖé bɔ tinmɛ tɔn tlɔlɔ ɔ nyí “nú gbigbɔ e hun agbǎn é.” Ðó xógbe enɛ ɖó tinmɛ kaka ɖé ɖò Glɛnsigbe égbé tɔn mɛ ǎ wutu ɔ, Lẹdogbedevomẹ Aihọn Yọyọ Tọn lilɛ wemafɔ enɛ ɖó alɔ ɖé jí bɔ nukúnnú mimɔ jɛ mɛ na bɔkun. É ɖɔ ɖɔ “akpakpa ni nɔ sɔ́ [Klisanwun lɛ] ɖò gbigbɔ lixo.”

 Lẹdogbedevomẹ Aihọn Yọyọ Tọn zán nyikɔ Mawu tɔn, sɔgbe bo lɛ́ ɖò wɛn. Gɔ́ nú enɛ lɛ ɔ, é lɛ́ gbɔn vo ɖò ali ɖevo nu, é wɛ nyí ɖɔ è nɔ má vɔ̌nu. É sín enɛ wu bɔ gbɛtɔ́ livi mɔkpan nɔ xà Biblu dó anɔ̌nugbe yetɔn mɛ, kaka jɛ mɛ ɖěɖee ma tlɛ ɖó akwɛ bo na xɔ Biblu yeɖesu tɔn ǎ lɛ é jí.