Mǐ nɔ zán nǔnina lɛ dó nɔ gudo nú sinsɛnzɔ́ kpo sɔhɛnmɛzɔ́ kpo tutoblonunu mǐtɔn tɔn lɛ. Mǐ nɔ wà azɔ̌ enɛ lɛ, ɖó ye nyí akpáxwé ɖé ɖò nǔ taji e gbé mǐ nɔ nya é mɛ, é wɛ nyí ɖɔ mǐ na d’alɔ mɛ lɛ bonu ye na huzu ahwanvu Klisu Jezu tɔn lɛ.—Matie 28:19, 20.

 Mǐ nɔ zán nǔnina lɛ dó dó dɔkun nú mɛ ɖebǔ gbeɖé ǎ. Mǐ nɔ s’axɔ́ mɛxo agun tɔn lɛ alǒ sinsɛnzɔ́watɔ́ ɖebǔ ǎ, è ka nɔ lɛ́ sú axɔ́ Kúnnuɖetɔ́ Jehovah tɔn lɛ, ɖó xwégbe xwégbe e ye nɔ gbɔn é wu ǎ. Mɛ ɖěɖee nɔ w’azɔ̌ ɖò alaxɔ mǐtɔn lɛ mɛ kpo hɔ̌nkan gbɛ̀ ɔ tɔn mǐtɔn kpo lɛ é, kaka jɛ Hagbɛ̌ Alixlɛ́mɛtɔ́ ɔ jí ɖò gbɛ̌ta sinsɛnzɔ́watɔ́ e è ma nɔ s’axɔ́ ǎ lɛ é tɔn ɖé mɛ.

•   Wemazínzín: Mǐ nɔ lilɛ Biblu kpo wema Klisanwun tɔn ɖevo lɛ kpo dó gbè ɖevo lɛ mɛ, nɔ zín, nɔ sɛ́dó, bo nɔ lɛ́ má livi mɔ̌kpan xwewu xwewu, ma yí ɖɔ̌la ɖokpo. Mɔ̌ ɖokpo ɔ, mɛ lɛ nɔ mɔ wema mǐtɔn lɛ Ɛntɛnɛti jí tɔn bo nɔ zán má sú ɖɔ̌la ɖokpo, ɖò tɛn Ɛntɛnɛti tɔn jw.org kpo tuto ɔdinatɛ́ɛ jí tɔn JW Library kpo jí. È ka nɔ lɛ́ jlá ajɔ̌ ɖ’eji ǎ.

•   Xɔgbigbá kpo Nukúnkpíkpé D’ewu Kpo: Mǐ nɔ gbá xɔ e mɛ mǐ na sɛn Mawu ɖè bɔ ye ɖò jlɛ̌ jí lɛ é gbɔn gbɛ̀ ɔ bǐ mɛ, bo nɔ lɛ́ kpé nukún dó ye wu bonu agun mǐtɔn lɛ na ɖó fí e nyɔ́ bɔ ye na kplé ɖó kpɔ́ bo kpa susu nú Mawu ɖè lɛ é. Mǐ nɔ bló nǔ ɖokpo ɔ nú alaxɔ lɛ kpo azɔ̌xɔsa lilɛdógbeɖevomɛ tɔn lɛ kpo. Mɛɖéezejotɔ́ lɛ wɛ nɔ wà azɔ̌ enɛ lɛ gegě, bɔ enɛ nɔ zɔ́n bɔ akwɛzinzan lɛ nɔ ɖekpo.

•   Nukúnkpédónǔwu: Nǔ ɖěɖee è na dó azɔ̌ e mǐ nɔ wà gbɔn gbɛ̀ ɔ bǐ mɛ lɛ é kanta lɛ é wɛ è nɔ zán dó nɔ gudo nú azɔ̌ ɖěɖee è nɔ wà ɖò hɔ̌nkan gbɛ̀ ɔ tɔn mǐtɔn, alaxɔ mǐtɔn lɛ, azɔ̌xɔsa lilɛdógbeɖevomɛ tɔn lɛ, kaka jɛ azɔ̌ e nukúnkpénuwutɔ́ tomɛyitɔ́ lɛ nɔ wà lɛ é jí.

•   Wɛnɖagbejijla: È nɔ sú axɔ́ Kúnnuɖetɔ́ lɛ ɖó wɛnɖagbejijla alǒ “Mawuxó ɔ” kpinkplɔn mɛ ɖevo lɛ wu ǎ. (2 Kɔlɛntinu lɛ 2:17) É ɖò mɔ̌ có, Klisanwun xwè kanweko nukɔntɔn ɔ tɔn lɛ ɖɔhun ɔ, è nɔ sɔ́ xɔ e ɖò jlɛ̌ jí é nú sinsɛnzɔ́watɔ́ e è cyan bo kplɔ́n azɔ̌, bɔ ye nɔ zán ɖibla nyí táan yetɔn bǐ ɖò wɛnɖagbejijlazɔ́ ɔ mɛ lɛ é, bo nɔ lɛ́ na dandannú gbɛmɛ tɔn lɛ ye.—Filipunu lɛ 4:16, 17; 1 Timɔtée 5:17-18.

•   Mɛkplɔnkplɔn: Nǔnina lɛ wɛ è nɔ zán dó nɔ gudo nú kpléɖókpɔ́ mǐtɔn lɛ kpo kpléɖókpɔ́ ɖaxó mǐtɔn lɛ kpo. Gɔ́ na ɔ, mǐ nɔ sɔnǔ nú tuto xóyidókanji kpo video kpo tɔn e jinjɔn Biblu jí lɛ é. Mǐ nɔ lɛ́ kpé nukún dó wemaxɔmɛ ɖěɖee nɔ kplɔ́n azɔ̌ mɛxo agun tɔn lɛ kpo sinsɛnzɔ́watɔ́ hwebǐnu tɔn lɛ kpo, bonu alɔ na bí nú ye d’eji ɖò azɔ̌ e è sɔ́ d’así nú ye lɛ é mɛ é wu.

•   Sɔhɛnmɛzɔ́: Mǐ nɔ sɔnǔ nú nǔɖuɖu, sin, kpo xɔ kpo nú mɛ ɖěɖee sè wuvɛ̌, ɖó adla j’ayǐ kpo nǔ mɔ̌hun e sín gbɛtɔ́ wu lɛ é kpo wu é. Sɔhɛnmɛzɔ́ enɛ nɔ wà ɖagbe nú “nɔví ɖò nǔɖiɖi mɛ lɛ” kpo mɛ e ma nyí Kúnnuɖetɔ́ ǎ lɛ é kpo bǐ.—Galatinu lɛ 6:10.