Eǒ. Klisanwun wɛ Kúnnuɖetɔ́ Jehovah tɔn lɛ nyí, amɔ̌, mǐ nɔ mɔ mǐɖée dó mɔ Protestant lɛ ǎ. Etɛwu?

 È ɖɔ ɖɔ Protestant lɛ nyí “sinsɛngbɛ́ e klán jó Katolika Hlɔma tɔn dó é” ɖé. Nǔgbo wɛ ɖɔ mǐ mɛ Kúnnuɖetɔ́ Jehovah tɔn lɛ kún yí gbè nú nǔkplɔnmɛ Sinsɛn Katolika tɔn lɛ ó, amɔ̌, mǐ nɔ mɔ mǐɖée dó mɔ Protestant lɛ ǎ, ɖó hwɛjijɔ elɔ lɛ wu:

1.   Nǔ e Protestant lɛ ɖi nǔ na é ɖé lɛ sɔ́ ta nǔ e Biblu kplɔ́n mɛ lɛ é. Ði kpɔ́ndéwú ɔ, Biblu kplɔ́n mɛ ɖɔ “Mawu ɖokpo géé wɛ tíìn,” é nyí Atɔnɖobǔ ǎ. (1 Timɔtée 2:5; Jaan 14:28) É lɛ́ kplɔ́n mɛ nyi wɛn ɖɔ Mawu kún nɔ dóya nú mɛ nyanya lɛ ɖò zomɛ ó, loɔ, é na sɔ́ kú mavɔmavɔ dó sú kún dó nú ye.—Ðɛhan 37:9; 2 Tɛsalonikinu lɛ 1:9.

2.   Mǐ nɔ klán gbè xá Sinsɛn Katolika tɔn alǒ sinsɛngbɛ́ ɖevo ɖebǔ ǎ, mɔ̌ jɛn mǐ ma ka nɔ lɛ́ tɛ́n kpɔ́n bá jla nǔ e ye ɖi nǔ na lɛ é ɖó ǎ é nɛ. É nyɔ́ wà ɔ, wɛnɖagbe Axɔ́suɖuto Mawu tɔn tɔn wɛ mǐ nɔ jla kpowun, bo nɔ lɛ́ tɛ́n kpɔ́n bá d’alɔ mɛ ɖevo lɛ bonu ye na ɖi nǔ nú wɛnɖagbe enɛ. (Matie 24:14; 28:19, 20) Nǔ e gbé mǐ nɔ nya é wɛ nyí ɖɔ mǐ na tɛ́n kpɔ́n bo jla nǔ e sinsɛngbɛ́ ɖevo lɛ ɖi nǔ na lɛ é ɖó ǎ, loɔ, nǔgbo e kúnkplá Mawu kpo Xó tɔn Biblu ɔ kpo é wɛ mǐ nɔ kplɔ́n gbɛtɔ́ ayijlɔjlɔnɔ lɛ.—Kolosinu lɛ 1:9, 10; 2 Timɔtée 2:24, 25.