È jì mì ɖò La Ceiba, ɖò Honduras. Nyi wɛ nyí kpodé ɔ, bo lɛ́ nyí vǐ sunnu ɖokpo e ɖò vǐ atɔ́ɔ́n e nɔ ce jì lɛ é mɛ é. Nyi wɛ lɛ́ nyí tókúnɔ ɖokpo e ɖò xwédo ce mɛ é. Xwédo ce kpo nyi kpo nɔ nɔ xá e mɛ awovínú gɔ́ é ɖé bo lɛ́ nyí yatɔ́nɔ. Nǔ lɛ wá vɛwǔ nú mǐ tawun hwenu e un ɖó xwè ɛnɛ bɔ tɔ́ ce j’ayǐ sín xɔ ɖé ta bo kú gudo é.

 Nɔ ce nɔ wà nǔ e wu é kpé é bǐ bo nɔ kpé nukún dó nɔví nyɔnu ce lɛ kpo nyi kpo wu, amɔ̌, hwɛhwɛ ɔ, akwɛ nɔ hwedó è bonu é na xɔ awu nú mì. Enyi jǐ ja ɔ, hwɛhwɛ wɛ jɔhɔn nɔ sin mì, ɖó un ɖó jɔhɔnmɛwu ǎ wutu.

 Ee un ɖò susu wɛ é ɔ, un kplɔ́n Tókúnɔgbe Honduras tɔn (LESHO), enɛ zɔ́n bɔ un nɔ ɖɔ xó xá tókúnɔ ɖevo lɛ. Amɔ̌, nɔ ce kpo nɔví nyɔnu ce lɛ kpo sè LESHO ǎ, bɔ alɔ kpo wuntun klewun klewun ɖé lɛ kpo jɛn ye nɔ zán dó ɖɔ xó xá mì. É ɖò mɔ̌ có, nɔ ce yí wǎn nú mì bo nɔ cyɔn alɔ jǐ ce sín awovínú lɛ sí. É nɔ zán wuntun klewun klewun e é tuùn lɛ é, bo nɔ gb’akpá nú mì dó nǔ nyanya ɖé lɛ wu, ɖi azɔ nunu kpo ahan syɛnsyɛn zinzan nyi dò kpo. Wǎgbɔ tɔn ɔ, é sù nukún ce mɛ ɖɔ, un kún nyí kannumɔ nú nǔ enɛ lɛ ɖě ó.

 Hwenu e un ɖò vǔ é ɔ, nɔ ce nɔ kplá mì hɛn yì Sinsɛn Katolika tɔn, amɔ̌, un nɔ mɔ nǔ jɛ nǔ ɖě mɛ ǎ, ɖó mɛtí nɔ lilɛ xó lɛ dó tókúnɔgbe mɛ nú mì ǎ wutu. Akpɔ ɖó mì kaka bɔ un jó sinsɛn ɔ yiyi dó hwenu e un ɖó xwè wǒ é. É ɖò mɔ̌ có, un kpò ɖò biba wɛ bo na tuùn nǔ d’eji dó Mawu wu.

 Ðò 1999, hwenu e un ɖó xwè 23 é ɔ, un xò gò nyɔnu e gosin États-Unis bo nɔ yì wɛnɖagbegun ɖé é ɖé. É na mì nǔkplɔnmɛ Biblu tɔn lɛ sín wema ɖé, bo kplɔ́n mì Tókúnɔgbe Amɛlika tɔn (ASL). Un yí wǎn nú nǔ e un kplɔ́n dó Biblu wu lɛ é sɔmɔ̌, bo wá gbeta ɔ kɔn bo na huzu sinsɛngán ɖé. Enɛ wu ɔ, un sɛ̀ tɛn yì Puerto Rico bo na dó yì fí e è nɔ kplɔ́n Klisanwun sín azɔ̌ mɛ ɖè dó tókúnɔgbe mɛ é. Hwenu e un lɛkɔ wá La Ceiba ɖò 2002 é ɔ, xɔ́ntɔn ce ɖé lɛ nɔ gudo nú mì bɔ un hun agun ɖé nú tókúnɔ lɛ. Patricia e wá huzu asì ce é nyí ɖokpo ɖò xɔ́ntɔn enɛ lɛ mɛ.

 Ðó un nyí sinsɛngán nú sinsɛn mǐtɔn wutu ɔ, un nɔ ɖɔ Mawuxó dó LESHO mɛ, bo nɔ xlɛ́ tan Biblu tɔn lɛ sín ɖiɖe lɛ, bo nɔ lɛ́ vɔ́ tan enɛ lɛ bló bá dó d’alɔ tókúnɔ lɛ nú ye na mɔ nǔ jɛ mɛ. Un nɔ lɛ́ yì ba tókúnɔ lɛ kpɔ́n ɖò toxo e sɛkpɔ́ mǐ lɛ é mɛ, bo na dó dó wusyɛn lanmɛ nú ye, lobo d’alɔ ye ɖò tagba yetɔn lɛ mɛ. Un tlɛ lɛ́ yì États-Unis kpo Zambie kpo mɛsɛ́dó ɖé ɖɔhun. Amɔ̌ è na ɖɔ nǔgbo ɔ, un tuùn nǔ kaka ɖé dó Biblu wu ǎ. Nǔ e è ɖɔ nú mì lɛ é kpo nǔ e wu un mɔ nǔ jɛ ɖò ɖiɖe lɛ mɛ é kpo jɛn un nɔ ɖɔ nú ye. Nǔgbo ɔ, nǔkanbyɔ ce lɛ hugǎn xósin ce lɛ.

 Gbè ɖokpo ɔ, mɛ e ɖò sinsɛn ce mɛ é ɖé lɛ jɛ adingbanxó lɛ funfún kpé dó wǔ yè jí. Ye nɔ ɖɔ ɖɔ un nyí ahannumunɔ, bo kún lɛ́ ɖò gbeji nú asì ce ó. Un flú bǐ, bɔ xomɛ lɛ́ sin mì. É sɔ́ lín ǎ bɔ nyi kpo Patricia kpo jó sinsɛn ɔ dó.

 Hwɛhwɛ wɛ Kúnnuɖetɔ́ Jehovah tɔn lɛ nɔ wá ba nyi kpo Patricia kpo kpɔ́n, é ɖò mɔ̌ có, mǐ nɔ ɖótó ye gbeɖé ǎ. Amɔ̌, hwenu e mǐ jó sinsɛn ɔ dó gudo é ɔ, Patricia yí gbè bɔ Kúnnuɖetɔ́ asú kpo asì kpo ɖé (Thomas kpo Liccy kpo) na kplɔ́n Biblu xá ɛ. É jiwǔ nú mì tawun ɖɔ ye kún nyí tókúnɔ ó có, ye ka sè tókúnɔgbe. Enɛ wu ɔ, un yawǔ gɔ́ nú Patricia ɖò nǔkplɔnkplɔn ɔ mɛ.

 Mǐ zán video ASL tɔn lɛ dó kplɔ́n nǔ nú sun ɖé lɛ. Amɔ̌, hwenu e xɔ́ntɔn mǐtɔn ɖé lɛ dóhwɛ Kúnnuɖetɔ́ Jehovah tɔn lɛ ɖɔ gbɛtɔ́ lɛ wɛ ye nɔ xwedó é ɔ, mǐ ɖó Biblu kplɔnkplɔn ɔ te. Thomas na kúnnuɖenú ɖěɖee xlɛ́ ɖɔ é kún nyí gbɛtɔ́ lɛ wɛ nyí gǎn nú Kúnnuɖetɔ́ lɛ ó é có, un ɖi ǎ.

 Sun ɖé lɛ gudo hwenu e Patricia byɔ linkpɔ́n syɛnsyɛn ɖé mɛ é ɔ, é xoɖɛ sɛ́dó Mawu ɖɔ é ni lɛ́ kplá Kúnnuɖetɔ́ Jehovah tɔn lɛ wá hɔn mǐtɔn nukɔn. É sɔ́ lín ǎ bɔ nɔzo Patricia tɔn e nyí Kúnnuɖetɔ́ Jehovah tɔn é ɖé ba ɛ kpɔ́n, bo byɔ ɛ ɖɔ é ni ɖɔ nú Liccy bonu é na ba ɛ kpɔ́n. Liccy xlɛ́ ɖɔ emi nyí xɔ́ntɔn ɖagbe ɖé. É nɔ ba Patricia kpɔ́n ɖò aklunɔzán gbla lɛ bǐ mɛ, bo nɔ dó wusyɛn lanmɛ n’i, lobo nɔ lɛ́ kplɔ́n Biblu xá ɛ. É ɖò mɔ̌ có, un kpò ɖò nǔ xò kpɔ́n wɛ dó Kúnnuɖetɔ́ Jehovah tɔn lɛ wu.

 Ðò 2012 ɔ, Kúnnuɖetɔ́ Jehovah tɔn lɛ ɖ’alɔ ɖò nǔjlajla bǔnɔ ɖé mɛ bo xwlé video A ka Jló Na Tuùn Nǔgbo ɔ À? mɛ dó LESHO mɛ. Liccy hɛn video ɔ ɖokpo wá nú mì. Hwenu e un kpɔ́n é ɔ, é cí kliwun nú mì ɖɔ sinsɛn sín nǔ e un ɖi nǔ na bo nɔ kplɔ́n mɛ lɛ é gegě, ɖi zomɛ kpo lindɔ̌n jɔmakú kpo kún ɖò Biblu mɛ ó.

 Ðò aklunɔzán gbla e bɔ d’ewu é mɛ ɔ, un yì Kpléxɔ Axɔ́suɖuto ɔ tɔn Kúnnuɖetɔ́ Jehovah tɔn lɛ tɔn mɛ, bo ɖɔ xó nú Thomas. Un ɖɔ n’i ɖɔ un jló na kplɔ́n nǔgbo ɔ tókúnɔ lɛ dó Biblu wu, amɔ̌, un kún ka na nyí Kúnnuɖetɔ́ ó. Linlin ce wɛ nyí ɖɔ un na ɖó agun cɛɖesu ayǐ b’ɛ na ɖò vo nú tókúnɔ lɛ. Thomas kpa mì ɖó akpakpa yɔyɔ̌ e sɔ́ mì é wu, amɔ̌, é wá xlɛ́ mì ɖò Efɛzinu lɛ 4:5 mɛ ɖɔ agun Klisanwun tɔn nǔgbo ɔ ɖó na nɔ bǔ.

 Thomas lɛ́vɔ na mì video: Kúnnuɖetɔ́ Jehovah tɔn Lɛ: Nǔwiwa kpo Nǔɖiɖi Kpo, Akpáxwé 1: Ablu Mɛ Tíntɔ́n Sín dó ASL mɛ. Video enɛ xlɛ́ lee gbɛ̌ta ɖé gbéjé Biblu ɔ kpɔ́n céɖécéɖé, bo na dó mɔ nǔ jɛ nǔgbo e kúnkplá sinsɛn-nǔkplɔnmɛ bǐbɛ̌mɛ tɔn lɛ é mɛ gbɔn é. Hwenu e un ɖò video ɔ kpɔ́n wɛ é ɔ, lee nǔ cí nú mɛ enɛ lɛ é wɛ é cí nú nyi lɔ. Ye ɖɔhun ɔ, un ɖò nǔgbo ɔ ba wɛ. Video enɛ na mì ganjɛwu ɖɔ Kúnnuɖetɔ́ lɛ nɔ kplɔ́n nǔgbo ɔ mɛ, ɖó Biblu kɛɖɛ jí wɛ nǔ e ye ɖi nǔ na lɛ é junjɔn. Enɛ wu ɔ, un lɛ́ jɛ Biblu kplɔ́n jí, bɔ ɖò 2014 ɔ, nyɛ kpo Patricia kpo bló baptɛm, bo huzu Kúnnuɖetɔ́ Jehovah tɔn.

 Un yí wǎn nú agun Kúnnuɖetɔ́ Jehovah tɔn lɛ tɔn, ɖó é mɛ́ lee Mawu mɛ́ gbɔn é ɖɔhun. Mawu sɛntɔ́ lɛ sín xóɖiɖɔ nɔ mɛ́, bɔ lee ye nɔ wà nǔ gbɔn xá mɛ ɖevo lɛ é lɔ nɔ mɛ́. Ye nɔ xò fífá kan bo nɔ lɛ́ dó wusyɛn lanmɛ nú yeɖée. Kúnnuɖetɔ́ lɛ ɖò bǔ, bɔ enyi ye na bo nɔ nɔ tò ɖebǔ mɛ, alǒ nɔ dó gbè ɖebǔ ɔ, ye bǐ nɔ kplɔ́n nǔgbo ɖokpo ɔ mɛ dó Biblu wu.

 Nǔ e Biblu kplɔ́n mɛ tawun lɛ é kplɔnkplɔn nɔ hun xomɛ nú mì. Ði kpɔ́ndéwú ɔ, un kplɔ́n ɖɔ Jehovah wɛ nyí Mawu Nǔbǐwukpétɔ́ ɔ, bo nyí Gǎnhúnǔtɔ́ ɖò ayikúngban ɔ bǐ jí. É yì wǎn nú tókúnɔ lɛ kpo mɛ e nɔ sè nǔ lɛ é kpo bǐ. É xɔ akwɛ nú mì ɖɔ Mawu yí wǎn nú mì. Un lɛ́ kplɔ́n ɖɔ ayikúngban ɔ bǐ na huzu Palaɖisi ɖagbeɖagbe ɖé, bɔ ali na hun nú mǐ bɔ mǐ na ɖu vivǐ gbɛ̀ mavɔmavɔ tɔn bo na ɖó lanmɛ syɛn hunsin ɖagbe. Un ɖò nukún ɖó hwenu e nǔ enɛ lɛ bǐ na jɛ dó é wɛ kpo akpakpa sɔ́ mɛ kpo.

 Nyi kpo Patricia kpo yí wǎn nú xóɖiɖɔ nú tókúnɔ ɖevo lɛ dó Biblu wu. Mǐ nɔ kplɔ́n Biblu xá mɛ e ɖò sinsɛn mǐtɔn xóxó ɔ mɛ lɛ é ɖé lɛ dìn. Amɔ̌, un sɔ́ nɔ ɖó nǔkanbyɔ ɖě dó nǔ e kplɔ́n mɛ wɛ un ɖè é wu, lee é nɔ nyí gbɔn hwenu e un nyí sinsɛngán ɖé é ǎ. Biblu kplɔnkplɔn xá Kúnnuɖetɔ́ Jehovah tɔn lɛ zɔ́n bɔ un wá mɔ xósin nú nǔkanbyɔ ce lɛ lo.