Artur e nyí nukúnkpénuwutɔ́ lɛdo tɔn ɖé ɖò Arménie é ɖò agun Kúnnuɖetɔ́ Jehovah tɔn lɛ tɔn ɖé ba kpɔ́n wɛ. É ɖó ayi wu ɖɔ agun ɔ kún ko ɖó alɔ ɖò kúnnuɖiɖe agbawungba tɔn e nɔ byɔ ɖɔ è ni zán kɛkɛví lɛ dó xwlé wema jinjɔn Biblu jí lɛ mɛ é mɛ kpɔ́n ó. Bo na dó flɔ́ kúnnuɖiɖe mɔhun sín zo dó lanmɛ nú ye ɔ, Artur kpo asì tɔn Anna kpo, gɔ́ nú Kúnnuɖetɔ́ ɖevo e nɔ nyí Jirayr é sɔnǔ nú kɛkɛví e mɛ wema lɛ nɔ nɔ é ɖokpo ɖò toxo kpɛví ɖé mɛ. Ye ba fí e afɔzɔntɔ́ lɛ nɔ gbɔn tawun é ɖokpo, bo cí.

Tlolo jɛn mɛ e ɖò wiwáyi wɛ lɛ é jɛ sisɛkpɔ jí, bo jɛ wema lɛ yí jí. Amɔ̌, é na nɔ zaan é ɔ, gbeklánxámɛtɔ́ lɛ ɖó ayi kɛkɛví ɔ wu. Yɛhwenɔ we sɛkpɔ kɛkɛví ɔ, bɔ mɛ ɖokpo ɖò ye mɛ bo ɖɔ xó ɖě ǎ kpowun lobo ɖó afɔ nú kɛkɛví ɔ b’ɛ j’ayǐ. Enɛ gudo ɔ, é gbà tómɛ nú Artur, bɔ cici tɔn j’ayǐ. Artur, Anna, kpo Jirayr kpo tɛ́n kpɔ́n bo na fá yɛhwenɔ lɛ có, ye ka sè gbɔ ǎ. Yɛhwenɔ lɛ d’afɔ kɛkɛví ɔ mɛ, bo fúnfún wema lɛ gbɔn kɔ́mɛ. Ee yɛhwenɔ lɛ ɖɔ nǔyá nú Kúnnuɖetɔ́ lɛ bo gblɔ́n adǎn nú ye gudo é ɔ, ye ɖidó.

Artur, Anna, kpo Jirayr kpo yì kponɔxwé xá ɔ mɛ tɔn, bo yì ɖó gbè nǔ e jɛ é tɔn. Ye tinmɛ nǔ e jɛ é bo gbɔn yɛkan enɛ mɛ klewun bo ɖɔ xó dó Biblu jí xá kponɔ lɛ kpo azɔ̌watɔ́ ɖevo lɛ kpo. È kplá Kúnnuɖetɔ́ atɔn lɛ yì azɔ̌xɔsa kponɔgán ɔ tɔn. Ðò bǐbɛ̌mɛ ɔ, é jló na tuùn lee nǔ lɛ jɛ gbɔn é kpowun wɛ. Amɔ̌, hwenu e é sè ɖɔ è gbà tómɛ nú Artur e sɔ́ asú é b’ɛ kún ka kɛnu ó é ɔ, é sɔ́ kan nǔɖe byɔ dó xó ɔ wu ǎ, bo jɛ dò ba nú nǔ e Kúnnuɖetɔ́ lɛ ɖi nǔ na lɛ é jí. Wǎgbɔ tɔn ɔ, ye ɖɔ xó xá kponɔgán ɔ nú ganxixo ɛnɛ. Nǔ e é sè lɛ é jiwǔ n’i b’ɛ ɖɔ: “Sinsɛn tɛ ka ɖíe! Nyi lɔ na byɔ mɛ!”

Ayihɔngbe tɔn, hwenu e Artur lɛ́ yì kúnnuɖiɖe agbawungba tɔn tɛnmɛ é ɔ, nya e mɔ nǔ e jɛ wá yì é ɖé sɛkpɔ ɛ. Nya ɔ kpa Artur nú xwíi e é cí bo ma xò yɛhwenɔ lɛ ǎ é. Nya ɔ ɖɔ gɔ́ na ɖɔ nǔ enɛ e emi mɔ é zɔ́n bɔ yɛhwenɔ lɛ kún sɔ́ xɔ tawungá ɖò nukún emitɔn mɛ ó.

Gbadanu enɛ ɔ, kponɔgán ɔ ylɔ́ Artur dó kponɔzɔ́watɛn ɔ. Nǔ ɖò ganji wɛ nyí ɔ, nǔ e jɛ é jí wɛ ye ɖó na ɖɔ xó dó, amɔ̌ kponɔgán ɔ kan nǔ gegě byɔ dó Biblu jí. Kponɔ we ɖevo lɛ gɔ́ nú ye.

Azǎn tɔn atɔngɔ́ ɔ gbè ɔ, Artur lɛ́ yì ba kponɔgán ɔ kpɔ́n, bɔ dìn ɔ, é xlɛ́ ɛ video jinjɔn Biblu jí ɖé lɛ. Kponɔgán ɔ ylɔ́ kponɔ ɖevo lɛ bɔ ye lɔ kpɔ́n video lɛ.

Walɔ gblegblé yɛhwenɔ lɛ tɔn zɔ́n bɔ kponɔ gegě sè wɛnɖagbe ɔ azɔn nukɔntɔn ɔ. Enɛ zɔ́n bɔ ye ɖó linlin ɖagbe dó Kúnnuɖetɔ́ Jehovah tɔn lɛ wu.