Kúnnuɖetɔ́ Jehovah tɔn e ɖò Bulgarie lɛ é sín alɔnu ján ɖò nǔ kplɔnkplɔn mɛ ɖevo dó Mawu kpo Xó tɔn Biblu ɔ kpo wu kɔn. Bo na dó d’alɔ ye ɔ, Kúnnuɖetɔ́ kanweko mɔ̌kpan nɔ sɛ̀ tɛn sín tò ɖevo lɛ mɛ yì Bulgarie sín 2000. Wuvɛ̌ tɛ lɛ ka ɖò tɛnsisɛ bo na jlá wɛnɖagbe ɔ ɖò tò ɖevo mɛ mɛ? Etɛwu é ka nɔ byɔ gǎndidó? Nǔ e mɛ ɖěɖee sɛ̀ tɛn yì Bulgarie lɛ é ɖɔ é ɖé lɛ ɖíe.

Darren e nɔ nɔ Angleterre é ɖɔ: “Un ko nɔ lin tɛgbɛ bo na wà sinsɛnzɔ́ ɖò tò ɖevo mɛ, fí e hudo sukpɔ́ ɖè é. Ee nyi kpo Dawn kpo wlí alɔ é ɔ, mǐ sɛ̀ tɛn yì Londres, bá kplɔ́n Biblu mɛ lɛ dó Russie-gbè mɛ. Ðò táan kpɛɖé gudo ɔ, mǐ bló tuto taji ɖé lɛ bá sɛ̀ tɛn yì tò ɖevo mɛ, amɔ̌, é sín hwɛjijɔ vovo lɛ wu bɔ mǐ sɔ́ kpéwú bo yì ǎ. Mǐ lin ɖɔ mǐ kún na kpéwú bo yì ó, amɔ̌, enɛ gudo ɔ, xɔ́ntɔn ɖé d’alɔ mǐ bɔ mǐ mɔ ɖɔ lee ninɔmɛ mǐtɔn lɛ ɖè é ɔ, mǐ hɛn ɔ mǐ na kpéwú bo sɛ̀ tɛn.” Darren kpo Dawn kpo jɛ tò e mɛ è ɖó hudo Biblu kplɔnmɛtɔ́ lɛ tɔn ɖè hugǎn, bɔ ye sixu sɛ̀ tɛn yì nǔgbo nǔgbo é ɖé ba jí. Ðò 2011 ɔ, ye sɛ̀ tɛn yì Bulgarie.

Kpɔ́ndéwú awǎjijɛ tɔn mɛ ɖěɖee ko sɛ̀ tɛn yì awa gbɛ̀ ɔ tɔn ɖevo lɛ xwé é tɔn dó wusyɛn lanmɛ nú mɛ ɖěɖee ma lin ɖ’ayǐ bo na wà sinsɛnzɔ́ ɖò tò ɖevo mɛ ǎ é ɖé lɛ. Giada, ee é kpo asú tɔn Luca kpo nɔ nɔ Italie é ɖɔ: “Un xò gò Kúnnuɖetɔ́ kanɖodónǔwutɔ́ ɖěɖee ɖò sinsɛnzɔ́ wà wɛ kpo awǎjijɛ kpo ɖò Amérique du Sud kpo Aflika kpo lɛ é. Awǎjijɛ e ye mɔ ɖ’emɛ é kpo nǔ e ye mɔ kpɔ́n bo má xá mì lɛ é kpo byɔ lanmɛ nú mì tawun. Enɛ d’alɔ mì bɔ un vɔ́ azɔ̌ wà ɖò nǔ e gbé nya wɛ un ɖè ɖò gbigbɔ lixo lɛ é wu.”

Tomasz kpo Veronika kpo sɛ̀ tɛn sín République Tchèque yì Bulgarie ɖò 2015, gɔ́ nú vǐ yetɔn we lɛ, Klara kpo Mathias kpo. Etɛ ka sísɛ́ ye bɔ ye sɛ̀ tɛn? Xósin e Tomasz na é ɖíe: “Mǐ gbéjé kpɔ́ndéwú mɛ ɖevo ɖěɖee ko sɛ̀ tɛn yì tò ɖevo mɛ lɛ é tɔn kpɔ́n ganji, kaka jɛ hɛ̌nnumɔ mǐtɔn lɛ tɔn jí, bo lin tamɛ dó nǔ e ye mɔ kpɔ́n é ɖé lɛ jí. Awǎjijɛ e ye mɔ ɖ’emɛ é byɔ lanmɛ nú mǐ tawun, bɔ mǐ ɖɔ xó ɖó kpɔ́ d’eji ɖò xwédo mɛ.” Mɛ e ɖò xwédo awǎjijɛnɔ enɛ mɛ lɛ é ɖò wɛnɖagbe ɔ jlá wɛ ɖò fí yɔyɔ̌ ɖé dìn, ɖò toxo Bulgarie tɔn Montana mɛ.

Kúnnuɖetɔ́ ɖevo e sɛ̀ tɛn yì Bulgarie é wɛ nyí Linda. É ɖɔ: “É ko bló xwè gegě dìn bɔ un ɖisa yì Équateur bo xò gò mɛɖé lɛ bɔ ye sɛ̀ tɛn yì dɔ̌n bá jlá wɛnɖagbe ɔ. Enɛ zɔ́n bɔ un lin ɖɔ boya gbè ɖokpo ɔ, nyi lɔ sixu yì wà sinsɛnzɔ́ ɖò fí e hudo sukpɔ́ ɖè é.” Petteri kpo Nadja kpo nyí asú kpo asì kpo ɖé bo gosin Finlande. Ye lɔ lin tamɛ dó kpɔ́ndéwú mɛ ɖevo lɛ tɔn jí. Ye ɖɔ: “Ðò agun mǐtɔn xóxó ɔ mɛ ɔ, mǐ ɖó wɛnjlatɔ́ e ko mɔ nǔ kpɔ́n, bo sɛ̀ tɛn yì fí ɖevo lɛ bá d’alɔ mɛ lɛ ɖò gbigbɔ lixo é ɖé lɛ. Ye nɔ ɖɔ xó dó xwè ɖěɖee ye zán ɖò sinsɛnzɔ́ alɔkpa enɛ mɛ lɛ é wu tɛgbɛ kpo akpakpa sɔ́ mɛ kpo. Ye ɖɔ ɖɔ xwè enɛ lɛ wɛ nyɔ́ hugǎn ɖò gbɛzán emitɔn mɛ.”

Tuto ɖagbe biblo ɖò taji tawun nú mɛ ɖěɖee jló na wà sinsɛnzɔ́ ɖò tò ɖevo mɛ lɛ é. (Luki 14:28-30) Nele e gosin Belgique é flín ɖɔ: “Ee un jɛ tamɛ lin dó sinsɛnzɔ́wiwa ɖò tò ɖevo mɛ jí jí dó nǔjɔnǔ mɛ é ɔ, un xoɖɛ, bo ba xóta ɖěɖee ɖɔ xó dó sinsɛnzɔ́wiwa ɖò tò ɖevo mɛ jí lɛ é ɖò wema mǐtɔn lɛ mɛ. Un xà ye bo tɛ́n kpɔ́n bo mɔ nukúnnú jɛ nǔ ɖěɖee jí un ɖó na w’azɔ̌ dó lɛ é mɛ.”

Kristian kpo Irmina kpo gosin Pologne, bo ɖò Bulgarie sín xwè tɛnnɛ jɛji ɖíe. Ye ɖ’ayi wu ɖɔ kplé biblo xá kánɖó e nɔ dó Bulgarie-gbè ɖò Pologne é ɖé jɛ nukɔn nú tɛnsisɛ ɔ d’alɔ ye tawun. Kánɖó ɔ dǒ wusyɛn lanmɛ nú ye, bo lɛ́ d’alɔ ye bɔ ye kplɔ́n gbè ɔ. Kristian kpo Irmina kpo ɖɔ: “Mǐ wá ɖ’ayi lee é nyɔ́ sɔ ɖɔ è ni sɔ́ mɛɖée jó, bá kpɔ́n lee Jehovah nɔ kpé nukún dó hudo mɛtɔn lɛ wu gbɔn é wu. Nú a sɔ́ jlǒ dó ɖɔ nú Jehovah ɖɔ ‘Nyɛ na yì, sɛ́ mì dó’ ɔ, a sixu wà nǔ e a ma tlɛ lin gbeɖé ɖɔ emi na kpéwú ǎ é.”—Ezayíi 6:8.

Bonu Reto kpo Cornelia kpo e nyí asú kpo asì kpo ɖé bo gosin Suisse é na ɖò gbesisɔmɛ bo lɛ́ sɛ̀ akwɛ xwè ɔ, ye wá gbeta ɔ bo na zán gbɛ̀ e bɔkun é. Ye tinmɛ ɖɔ: “Xwè ɖokpo jɛ nukɔn nú tɛnsisɛ ɔ ɔ, mǐ yì Bulgarie bo bló aklunɔzán gbla ɖokpo, bá tuùn lee tò ɔ cí tawun é. Mǐ ɖɔ xó xá mɛsɛ́dó e ko mɔ nǔ kpɔ́n é ɖé lɛ ɖò finɛ, bɔ ye ɖè wě tawun tawun lɛ xá mǐ.” Reto kpo Cornelia kpo xwedó wěɖexámɛ enɛ lɛ, bo ɖò Bulgarie dìn sín xwè 20 jɛji ɖíe.

Mɛ ɖěɖee sɛ̀ tɛn yì tò ɖevo mɛ lɛ ɖó na huzu sɔgbe xá ninɔmɛ yɔyɔ̌ e sixu lɛ́ vɛwǔ lɛ é. (Mɛsɛ́dó 16:9, 10; 1 Kɔlɛntinu lɛ 9:19-23) Wuvɛ̌ taji e mɛ gegě nɔ mɔ é wɛ nyí gbè yɔyɔ̌ ɖé kplɔnkplɔn. Luca e xó è ɖɔ wá yì é ɖɔ: “Mǐ nɔ yí wǎn nú xósin e gosin ayi mɛ lɛ é nina ɖò kplé Klisanwun tɔn lɛ jí hwebǐnu. É ɖò mɔ̌ có, nú hwenu ɖé ɔ, é vɛwǔ nú nyi kpo asì ce kpo tawun nú mǐ na sɔnǔ nú xósin e tlɛ bɔwǔ é ɖokpo vɔ́vɔ́ dó Bulgarie-gbè mɛ! É cí ɖɔ yɔkpɔvu wɛ mǐ lɛ́ huzu ɖɔhun. Nǔgbo ɔ, xósin e yɔkpɔvu ayǐ ɔ jí tɔn lɛ nɔ na lɛ é nɔ nyɔ́ hú ee mǐdɛɛ lɛ nɔ na lɛ é flaflá tɔn.”

Ravil e gosin Allemagne é ɖɔ: “Gbè kplɔnkplɔn nɔ cikɔ. Amɔ̌, un nɔ lin nǔ gbɔn lě, ‘Nɔ ko nǔ hwenu e a gbà afɔ é.’ Un nɔ kpɔ́n wuvɛ̌ lɛ dó mɔ tagba ɖé ǎ, loɔ, un nɔ mɔ ye dó mɔ sinsɛnzɔ́ mímɛ́ e wà nú Jehovah wɛ un ɖè é sín akpáxwé ɖé.”

Linda e xó è ɖɔ wá yì é ɖɔ: “Un syɛn ɖò gbè yɔyɔ̌ ɖé kplɔnkplɔn mɛ ǎ. Bulgarie-gbè kplɔnkplɔn bɔwǔ ǎ, bɔ un ko lin azɔn mɔ̌kpan na jó gbè. Nú è ma sixu ɖɔ xó nú mɛ lɛ, alǒ mɔ nukúnnú jɛ nǔ e ɖɔ wɛ ye ɖè é mɛ ǎ ɔ, è nɔ zun mɛ ɖokpo. Bo na dó hɛn kancica e un ɖó xá Jehovah é lidǒ ɔ, un nɔ kplɔ́n nǔ lɛ bǐ dó Suède-gbè mɛ. Gudo mɛ ɔ, nɔví sunnu ce lɛ kpo nɔví nyɔnu ce lɛ kpo d’alɔ mì bɔ un kplɔ́n gbè ɔ.”

Zɔ ninɔ dó mɛ mɛtɔn lɛ sixu nyí wuvɛ̌ ɖevo e jí é na byɔ ɖɔ è ni ɖu ɖè é. Mɛ ɖěɖee nɔ sɛ̀ tɛn lɛ é nɔ jó hɛ̌nnumɔ yetɔn lɛ kpo xɔ́ntɔn yetɔn lɛ kpo dó nyi xwé. Eva e sɛ̀ tɛn yì Bulgarie kpo asú tɔn Yannis kpo é ɖɔ: “Ðò bǐbɛ̌mɛ ɔ, un mɔ ɖɔ un zun nyiɖokpo. Bo na dó ɖí xwi xá enɛ ɔ, mǐ nɔ ɖɔ xó xá xɔ́ntɔn mǐtɔn kpo hɛ̌nnumɔ mǐtɔn kpo ɖěɖee ɖò xwé lɛ é, bo lɛ́ zun xɔ́ntɔn yɔyɔ̌ lɛ ɖò fí.”

Wuvɛ̌ ɖevo lɛ lɛ́ ɖè. Robert kpo Liana kpo e sɛ̀ tɛn sín Suisse é tinmɛ ɖɔ: “Gbè ɔ, gɔ́ nú aca ɔ nyí wuvɛ̌ ɖaxó ɖé nú mǐ, bɔ mǐ lɛ́ ɖò gbesisɔmɛ nú jɔhɔn e nɔ fá tawun ɖò fí é ǎ.” É ɖò mɔ̌ có, linlin ɖagbe ɖiɖó kpo nǔkiko mɛ ninɔ hwebǐnu kpo d’alɔ asú kpo asì kpo enɛ bɔ ye wà sinsɛnzɔ́ ɔ ɖò Bulgarie kpo gbejininɔ kpo nú xwè 14.

Lilly dó wusyɛn lanmɛ nú mɛ kpo akpakpa sɔ́ mɛ kpo ɖɔ è ni jlá wɛnɖagbe ɔ ɖò fí e hudo sukpɔ́ ɖè é. É ɖɔ: “Un kpéwú bo kplɔ́n lobo tuùn Jehovah ɖò ali ɖé nu, bɔ nú vlafo tò nyiɖesunɔ tɔn mɛ wɛ un ɖè ɔ, boya wɛ na kpéwú. Un sixu hɛn alɔnu ce ján, ɖó alɔdidó mɛ ɖevo lɛ wu, bɔ enɛ nɔ d’alɔ mì bɔ un nɔ ɖò susu wɛ ɖò gbigbɔ lixo, nɔ ɖó awǎjijɛ b’ɛ nɔ lɛ́ jɛmɛ nú mì.” Asú tɔn Ravil yí gbè nú xó enɛ. É ɖɔ: “Gbɛzán ɖagbe hugǎn ɔ nɛ, bo nyí ali ɖokpo e nu è na gbɔn, dó tuùn Klisanwun kanɖodónǔwutɔ́ ɖěɖee gosin tò vovo mɛ, bo ko mɔ nǔ gegě kpɔ́n ɖò nǔgbo Biblu tɔn lɛ kplɔnkplɔn mɛ linu lɛ é. Un kplɔ́n nǔ gegě ɖò ye gɔ́n.”

Gbigbɔ mɛɖée zízé jó tɔn e mɛ gegě ɖó é kpo gbesisɔmɛ e ye ɖè é kpo zɔ́n bɔ “axɔ́suɖuɖu Mawu tɔn sín Wɛnɖagbe [jijla] gbɔn gbɛ̀ ɔ bǐ mɛ” ɖò ta yì wɛ. (Matie 24:14) Gbigbɔ mɛɖéezejo tɔn mɛ ɖěɖee yì Bulgarie lɛ é tɔn zɔ́n bɔ ye mɔ lee Jehovah na nǔ e jló ye lɛ é ye, bo lɛ́ bló bɔ tuto yetɔn lɛ bǐ ɖò ta yì wɛ gbɔn é é.—Ðɛhan 20:2-5.