Marta nyí Kúnnuɖetɔ́ Jehovah tɔn ɖé ɖò Guatemala bo ɖò Kekchi-gbè kplɔ́n wɛ, bo na dó má wɛn e ɖò Biblu mɛ é xá mɛ ɖěɖee nɔ dó gbè enɛ lɛ é. Gbè ɖokpo ɔ, é mɔ nya ɖé, bɔ é gosin dotóoxwé ɖé. Ee Marta mɔ ɛ é ɔ, é mɔ ɖɔ vlafo gletoxo Kekchi tɔn e ɖò sókanmɛ bɔ Kúnnuɖetɔ́ Jehovah tɔn lɛ ma nɔ yì ɖɔ Mawuxó ɖò finɛ mɔ̌ ǎ é mɛ wɛ é gosin. É sɛkpɔ́ ɛ bo dó Kekchi-gbè kpɛ e é sè é n’i.

Marta xwlé Biblu kplɔnkplɔn ɖé nya ɔ. Kpo awǎjijɛ kpo wɛ é yí gbè nú Biblu kplɔnkplɔn ɔ, bo ka ɖɔ n’i ɖɔ emi kún ɖó akwɛ bo na sú axɔ́ ɛ ó. Marta tinmɛ n’i ɖɔ vɔ̌nu wɛ Kúnnuɖetɔ́ Jehovah tɔn lɛ nɔ kplɔ́n Biblu xá mɛ. É lɛ́ ɖɔ n’i ɖɔ é sixu kplɔ́n nǔ gbɔn alokan jí kpo xwédo tɔn bǐ kpo. Nya ɔ yí gbè. Ðó nya ɔ nɔ dó Espagne-gbè, bo nɔ lɛ́ xà wutu ɔ, Marta sɔ́ Biblu Lẹdogbedevomẹ Aihọn Yọyọ Tọn Espagne-gbè tɔn ɖokpo n’i. É lɛ́ sɔ́ wema e è nɔ zán dó kplɔ́n Biblu na é Kekchi-gbè tɔn ɖokpo n’i, é wɛ nyí Etɛ Biblu ka Kplɔ́n Mɛ Tawun? Aklunɔzán gbla e bɔ d’ewu é mɛ ɔ, Marta jɛ Biblu kplɔ́n xá nya ɔ, asì tɔn kpo vǐ yetɔn we lɛ kpo jí gbɔn alokan jí. Ye nɔ kplɔ́n Biblu azɔn we ɖò aklunɔzán gbla ɖokpo mɛ. Marta ɖɔ: “Ðó un sè Kekchi-gbè ganji ǎ wutu ɔ, mǐ nɔ kplɔ́n nǔ ɔ dó Espagne-gbè mɛ bɔ nya ɔ nɔ tinmɛ nú asì tɔn dó Kekchi-gbè mɛ. Vǐ lɛ sè Espagne-gbè.”

Sinsɛngán ɖé wɛ nú nya ɔ. É jɛ nǔ e é nɔ kplɔ́n ɖò Biblu kplɔnkplɔn tɔn hwenu lɛ é kplɔ́n agunví tɔn lɛ jí. Agunví tɔn lɛ yí wǎn nú nǔ e ye sè lɛ é, bo kan fí e é kplɔ́n nǔ yɔyɔ̌ enɛ lɛ ɖè é byɔ ɛ. Ee é ɖɔ Biblu e kplɔ́n wɛ é ɖè é xó nú ye é ɔ, ye mɛ ɖokpo ɖokpo jɛ dò tɔn mɛ wá jí. É na nɔ zaan é ɔ, mɛ 15 mɔ̌ nɔ kplé ɖò aklunɔzán gbla ɖokpo ɖokpo mɛ, bɔ Marta nɔ kplɔ́n Biblu xá ye gbɔn alokan jí. Hwenu ɖò yiyi wɛ é ɔ, ye nɔ sɔ́ miklo ɖokpo ɖó alokan ɔ kpá bonu mɛ bǐ na mɔ tɛn bo sè xó ɔ.

Ee Marta ɖɔ Biblu kplɔnkplɔn enɛ xó nú mɛxo agun tɔn tɔn lɛ é ɔ, mɛ ɖokpo ɖò ye mɛ bo yì gletoxo e mɛ Biblu kplɔntɔ́ lɛ ɖè é. É ylɔ́ ye nú xóɖiɖɔ nú mɛ bǐ e nukúnkpénuwutɔ́ lɛdo tɔn * ɔ na xwlé mɛ, ɖò gletoxo e mɛ è ɖó na dó mɔ̌to nú ganxixo ɖokpo, bo lɛ́ zɔn afɔ nú ganxixo we cobo yì é ɖé mɛ é. Nǔkplɔntɔ́ lɛ yí gbè bo na yì, bɔ ye mɛ 17 wá dò tɔn mɛ.

Aklunɔzán gbla ɖé lɛ gudo ɔ, nukúnkpénuwutɔ́ lɛdo tɔn ɔ kpo Kúnnuɖetɔ́ ɖé lɛ kpo nɔ kpɔ́ xá nǔkplɔntɔ́ lɛ nú azǎn ɛnɛ. Zǎnzǎn lɛ ɔ, ye nɔ kpɔ́n video jinjɔn Biblu jí e ɖò jw.org jí, ɖò Kekchi-gbè mɛ lɛ é, bo nɔ lɛ́ kplɔ́n alɔnuwema Mɛ̌ Mɛ̌ E ka Ðò Jlǒ Jehovah Tɔn Wà Wɛ Égbé? Hwelɛkɔ lɛ ɔ, ye nɔ kpɔ́n Televiziɔn JW tɔn sín akpáxwé lɛ. Nukúnkpénuwutɔ́ lɛdo tɔn ɔ lɛ́ bló tuto bɔ nǔkplɔntɔ́ lɛ ɖokpo ɖokpo ɖó mɛ e na kplɔ́n Biblu xá ɛ é.

Ðò azǎn ɛnɛ lɛ vlamɛ ɔ, Kúnnuɖetɔ́ lɛ lɛ́ ɖɔ Mawuxó ɖò gletoxo ɖěɖee mɛ è nɔ Kekchi-gbè ɖè ɖò xá ɔ mɛ lɛ é mɛ, bo lɛ́ ylɔ́ mɛ lɛ nú kplé bǔnɔ ɖé. Ðò kplé enɛ jí ɔ, nɔví lɛ dǒ wusyɛn lanmɛ nú mɛ 47 e wá lɛ é ɖɔ ye mɛ ɖokpo ɖokpo ni jɛ Biblu kplɔ́n jí. Xwédo wǒ-ɖokpo yí gbè nú tuto enɛ.

Sun yɔywɛ ɖé lɛ gudo ɔ, mɛxo agun tɔn lɛ bló tuto bonu è na nɔ bló kplé ɖokpo ɖò gletoxo ɔ mɛ ɖò aklunɔzán gbla lɛ bǐ mɛ. Égbé ɔ, mɛ 40 mɔ̌ wɛ nɔ yì kplé lɛ ɖò gbesisɔmɛ. Bɔ hwenu e nɔví lɛ bló Flǐn kú Jezu tɔn tɔn ɖò finɛ é ɔ, xomɛ hun ye tawun ɖɔ gbɛtɔ́ 91 wá tɛn tɔn mɛ.

Ee Marta flín lee nǔ lɛ bɛ́ gbɔn é kpo lee ye yì gbɔn é kpo é ɔ, é ɖɔ: “Nǔ e Jehovah wà é sù nukún ce mɛ tawun. Hweɖelɛnu ɔ, un nɔ mɔ ɖɔ un kún kpé nǔɖe wu ó. Amɔ̌, alyannú wɛ mǐ nyí ɖò alɔ Mawu tɔn mɛ. É tuùn nǔ e ɖò mɛ ɖěɖee ɖò gletoxo enɛ lɛ mɛ lɛ é sín ayi mɛ é, bo dɔn ye wá togun tɔn mɛ. Jehovah yí wǎn nú ye.”