Ðo 29 mai 2022 ɔ, nɔví súnnu Sylvain Bois, éé ɖo Wěɖegbɛ́ alaxɔ Bénin tɔn tɔn mɛ é ɖe Biblu: Wɛnɖagbe Matíe tɔn tɔ́n dó Fɔngbe mɛ. È ɖe Biblu énɛ́ e è sixú yí dó alǒkan alǒ tablɛ́ti jí é tɔ́n ɖo tuto e è yí dó kan jí jɛ nukɔn, bo wá xo nú wɛnjlátɔ́ kpó jlǒɖótɔ́ kpó 7000 mɔ̌ é hwenu. Mǐ ɖo nukún ɖó wɛ ɖɔ Biblu énɛ́ ɔ, ée è zín lɛ́ é ná tíin ɖo décembre 2023.

Nǔgbó wɛ ɖɔ Biblu ɖé lɛ́ ko tíin dó Fɔngbe mɛ cóbɔ è wá ɖe élɔ́ tɔ́n, amɔ̌, è ɖe nyǐkɔ Mawu tɔn sín Biblu énɛ́ lɛ́ mɛ, bɔ nukɛgbe e è zán ɖo yě mɛ lɛ́ é gěgé tíin bo sɔgbe xá nukɛgbe Biblu tɔn dodó lɛ́ ǎ. Biblu énɛ́ lɛ́ lɛ́vɔ́ v’axi, bɔ axisinɔ ɖé lɛ́ nɔ gbɛ́ ɖɔ émí kún ná sa nú Kúnnuɖetɔ́ Jexóva tɔn lɛ́ ó.

Wěma Biblu tɔn e nɔ nyí Matíe bɔ è ɖe tɔ́n agaɖanu din nɛ́ é tínmɛ nukɛgbe e ɖo gbe dodó ɔ mɛ lɛ́ é bɔ é sɔgbe. Ði kpɔ́ndéwú ɔ, Matíe 10:28 ɖɔ: “Xɛsi ní ma ɖi mi dó mɛ e nɔ hu agbaza bo ma ka sixú hu lǐndɔ̌n ǎ lɛ́ é wú ó.” Tínmɛ e ɖo do ɖo wěmafɔ énɛ́ jí é xlɛ́ ɖɔ xókwín dodó e è zán nú “lǐndɔ̌n” é nɔ dó gesí “nukúnɖíɖó gbɛ ninɔ tɔn.” Akpáxwé mɔ̌hun lɛ́ ná d’alɔ wɛnjlátɔ́ lɛ́ hwenu e yě ná ɖo nǔ kplɔ́n mɛ e ɖó jló lɛ́ é wɛ ɖo sinsɛnzɔ́ ɔ mɛ é.

Nɔví súnnu Palle Bjerre, éé ɖo Wěɖegbɛ́ alaxɔ Bénin tɔn tɔn mɛ é ɖɔ: “È ɖe xó sín wěma Matíe tɔn mɛ azɔn gěgé ɖo wěma mǐtɔn lɛ́ mɛ. Wɛnɖagbewéma Matíe tɔn énɛ́ e sɔgbe bɔ mǐ ɖó é ná d’alɔ mǐ tawun ɖo wɛn ɖagbe ɔ jíjlá kpó nǔ kplɔ́nkplɔ́n mɛ lɛ́ kpo hwenu. Mǐ dó kú nú Jexóva kpó gbɛ̌ta gbetínmɛ tɔn ɔ kpó nú azɔ̌ syɛ́nsyɛ́n e yě wa bɔ wěma Biblu tɔn élɔ́ dó tɔ́n é.”

Mǐ kú d’é jí ɖɔ Biblu élɔ́ e tɔ́n é ná d’alɔ nɔví súnnu kpó nɔví nyɔ̌nu kpó mǐtɔn e nɔ dó Fɔngbe lɛ́ é, bɔ yě ná kpo ɖo hudó Mawu tɔn e yě ɖó é sín do sú wɛ, bo ná nɔ lɛ́ d’alɔ mɛ ɖěvo lɛ́ bɔ yě lɔ na wa nǔ ɖokpó ɔ.—Matíe 5:3.