Ðó mɛxomɔ lɛ sixu yawǔ sɔ́ coronavirus ɔ wutu ɔ, nɔví mǐtɔn mɛxomɔ lɛ nɔ wà nǔ kpo nǔnywɛ kpo bo nɔ setónú nú nǔ e gǎn e nɔ kpé nukún dó lanmɛ na nɔ ganji wu lɛ é ɖɔ lɛ é, lobo nɔ nɔ xwé yetɔn lɛ gbè. Enɛ ka zɔ́n bɔ ye ɖò yeɖokponɔ bɔ nǔwiwa hán ye ǎ. Ye nɔ zán wlɛnwín nǔnywɛ xwitixwiti tɔn vovo lɛ dó ɖ’alɔ ɖò kplé lɛ kpo sinsɛnzɔ́ ɔ kpo mɛ.

Ðò Rome ɖò Italie ɔ, mɛxomɔ e ɖó xwè 94, bo bló baptɛm ɖò 1952 é ɖé sɔ́ nɔ kpéwú bo nɔ zɛ hwɛ sín xwé tɔn gbè ǎ, ɖó lanmɛ tɔn e ma ɖò ganji ǎ é wu, cobɔ jɛmɛji ɔ bɛ́. É nɔ ɖu vivǐ kplé lɛ tɔn ɖò JW Stream jí có, é ka sɔ́ kpéwú bo bló kplé lɛ xá agun e mɛ é ɖè é ǎ nú táan ɖé. Amɔ̌, dìn e mɛxo agun tɔn tɔn lɛ jɛ wlɛnwín xóɖɔɖókpɔ́ xá mɛ gbɔn Ɛntɛnɛti jí tɔn lɛ zán dó bló kplé lɛ jí é ɔ, é nɔ kpéwú bo nɔ mɔ nɔví sunnu kpo nɔví kpo e ɖò agun tɔn mɛ lɛ é, bo nɔ lɛ́ bló kplé xá agun tɔn.

Ðò Spanish Fork, Utah, ɖò États Unis ɔ, Nɔví Nyɔnu Stephanie Aitken nyí tókúnɔ ɖé, bo nɔ nɔ xwé e gbè è nɔ kpé nukún dó azinzɔnnɔ lɛ wu ɖè é ɖé; è ka gbɛ́ dìn ɖɔ jonɔ ɖě kún sɔ́ na nɔ wá kpɔ́n ye ó. Mɛxo agun ɖé kpo asì tɔn kpo nɔ vítlu e ɖò xwé e gbè nɔví nyɔnu ɔ ɖè é sín nukɔn, bo dó tókúnɔgbe dó na ɛ alixlɛ́mɛ lɛ, b’ɛ kpéwú bo yí wlɛnwín xóɖɔɖókpɔ́ xá mɛ gbɔn Ɛntɛnɛti jí tɔn sín tuto ɔ dó tablɛti tɔn jí gbɔn. Ee Nɔví Nyɔnu Aitken yí tuto ɔ dó tablɛti tɔn jí lě é ɔ, é wlí tablɛti tɔn hɛn d’akɔ́nnú. É sù nukún tɔn mɛ tawun ɖɔ é sixu kpò ɖò kplé bló xá agun tɔn wɛ.

Ðó nɔví sunnu lɛ kpo nɔví nyɔnu lɛ kpo kaka jɛ mɛxomɔ lɛ jí gbɔn gbɛ̀ ɔ bǐ mɛ, ɖò nǔnywɛ xwitixwiti sín nǔ lɛ zán dó huzu sɔgbe xá ninɔmɛ vɛwǔ e jɛmɛji elɔ dɔn wá lɛ é wɛ wutu ɔ, enɛ nɔ flín mǐ akpá e Jehovah dó ɖɔ ‘akɔta lɛ wɛ na nɔ wà nǔ’ bɔ togun emitɔn na nɔ zán kpo nǔnywɛ kpo é. (Ezayíi 60:16) Mǐ tuùn ɖɔ é na huzu nǔ e sín hudo mɛsɛntɔ́ tɔn ayikúngban jí tɔn lɛ ɖó é nú ye hwebǐnu ɖò hwenu vɛwǔ lɛ mɛ.