Ðò mardi 7 avril 2020 ɔ, Kúnnuɖetɔ́ kpo jlǒɖotɔ́ kpo afatɔ́n mɔ̌kpan na kplé nú nǔwiwa taji hugǎn xwè ɔ tɔn e nyí Flǐn kú Jezu tɔn tɔn é. Amɔ̌, ɖò xwè elɔ mɛ ɔ, ɖó jɛmɛji COVID-19 ɖò nǔ gbà wɛ wutu ɔ, mǐ na bló Flǐn manawɔn ɖé. Mɛ gegě na zán wlɛnwín xóɖɔɖókpɔ́ xá mɛ gbɔn Ɛntɛnɛti jí tɔn lɛ.

Ðó jɛmɛji coronavirus ɔ wutu ɔ, acɛkpikpa e ɖò tò nu lɛ é gbɛ́ ɖò tò gegě mɛ ɖɔ mɛ sukpɔ́ kún sɔ́ na nɔ kplé ɖó kpɔ́ ó. Enɛ zɔ́n bɔ agun gegě nɔ gbɔ bo zán wlɛnwín xóɖɔɖókpɔ́ xá mɛ gbɔn Ɛntɛnɛti jí tɔn lɛ dó bló kplé lɛ. Agun enɛ lɛ na lɛ́ zán wlɛnwín enɛ dó bló Flǐn ɔ. È na sɔ́ xóɖiɖɔ e è ko yí dó kan jí jɛ nukɔn é ɖé dó jw.org jí nú mɛ bǐ kpaa.

Ðò xwè e wá yì é mɛ ɔ, gbɛtɔ́ livi 20 jɛji wɛ wá Flǐn ɔ domɛ. È ɖò nukún ɖó wɛ ɖɔ gbɛtɔ́ livi mɔ̌kpan na zán wlɛnwín xóɖɔɖókpɔ́ xá mɛ gbɔn Ɛntɛnɛti jí tɔn lɛ, alokan lɛ, alǒ na kpɔ́n xóyidókanji e è ko sɔ́ dó jw.org jí é dó bló Flǐn ɔ.

Ðò tò gegě mɛ ɔ, jɛmɛji ɔ fɔ́n bo ɖò nǔ wà dó mɛ gegě wu wɛ. Bonu nɔví mǐtɔn lɛ na nɔ ayijayǐ mɛ ɔ, mǐ bǐ wɛ ɖó na kpò ɖò alixlɛ́mɛ e acɛkpikpa e ɖò tò nu lɛ é ɖò nina wɛ lɛ é xwedó wɛ télélé, kaka jɛ hwenu e jɛmɛji ɔ na xwɛ dó é. Amɔ̌, mǐ ɖeji ɖɔ Jehovah na d’alɔ mǐ; mǐ lɛ́ kánɖeji bo na xwedó gbeɖiɖe Jezu tɔn e ɖɔ ɖɔ mǐ ni “nɔ bló lě, dó flín [emi] na” é.—Luki 22:19.