NǓ E MƐ WÍNNYÁWÍNNYÁ LƐ́ NƆ KANBYƆ́ LƐ́ É
Étɛ́ un ka ɖó ná wa ɖo batɛ́mu gúdo?: Akpáxwé 2: Kpo ɖo nǔ jlɔ́jlɔ́ wa wɛ
Biblu ɖɔ: “[Jexóva] nɔ tɛ nyɔ̌ná mɛ e nɔ wa nǔ jlɔ́jlɔ́ lɛ́ é ǎ.” (Ðɛhan 84:12) Étɛ́ ka nyí tínmɛ “wa nǔ jlɔ́jlɔ́” tɔn? Tínmɛ tɔn wɛ nyí ɖɔ a ní nɔ wa nǔ e xlɛ́ ɖɔ a ɖo akpá e a dó nú Jexóva, hwenu e a zé hwiɖée jó n’i é ɖe wɛ lɛ́ é. (Nǔnywɛ́tɔ́xó 5:3, 4) Nɛ̌ a ka sixú nɔ wa nǔ jlɔ́jlɔ́ ɖo batɛ́mu towe gúdo gbɔn?
Ðo xóta élɔ́ mɛ ɔ, mǐ ná ɖɔ xó nǔ élɔ́ lɛ́ jí
Kpo ɖo tagba lɛ́ nu dɛ ɖe wɛ
Wěmafɔ tají: “Cóbónú mǐ ná byɔ́ Axɔ́súɖuto Mawu tɔn mɛ ɔ, mǐ ɖó ná xo wǔvɛ́ gěgé zlɛ́.”—Mɛsɛ́dó 14:22.
Tínmɛ tɔn: Klisánwun lɛ́ bǐ wɛ tagba lɛ́ ná ba jǒnɔ ɖo gbɛ ɔ mɛ. Tagba e a ná mɔ é ɖé lɛ́ ná sín klisánwun e a nyí é wú, ɖi mɛcáko alǒ gbeklánxámɛ. Ðěvo lɛ́, ɖi akwɛ́yózo alǒ azɔn, sixú ba jǒnɔ gbɛtɔ́ bǐ.
Nǔ e sixú jɛ é: Hweɖélɛ́nu ɔ, ninɔmɛ towe ná ɖyɔ́, bo sixú nyí dó lěe a ma ba gbɔn ǎ é. Biblu ɖɔ ɖɔ nǔ nyanya sixú jɛ dó mɛ ɖěbǔ jí, klisánwun alǒ mɛ e ma nyí klisánwun ǎ é.—Nǔnywɛ́tɔ́xó 9:11.
Nǔ e a sixú wa é: Ðó a tuun ɖɔ tagba lɛ́ ná wá ba jǒnɔ émí wútu ɔ, a sixú sɔ́ nǔ ɖ’ayǐ bo ná ɖí xwi xá yě. Tagba lɛ́ wá hǔn, nɔ mɔ ɖɔ ali wɛ hun nú émí bɔ émí ná bló bɔ nǔɖiɖi émítɔn ná lí dǒ, bɔ émí ná lɛ́ ɖeji dó Jexóva wú d’é jí. (Jaki 1:2, 3) É wá yá ɔ, lěe nǔ cí nú mɛsɛ́dó Pɔ́lu é ná cí mɔ̌ nú hwi lɔ: “Mɛ e nɔ ná mì hlɔ̌nhlɔ́n é wɛ nɔ zɔ́n bɔ un nɔ mɔ hlɔ̌nhlɔ́n dó kpé nǔ lɛ́ bǐ wú.”—Filípunu lɛ́ 4:13.
TAN NǓGBÓ. “Un bló batɛ́mu b’ɛ nɔ zaan é ɔ, fofó ce lɛ́ jó nǔgbó ɔ dó, mɛjitɔ́ ce lɛ́ bɛ́ azɔn, bɔ énɛ́ gúdo ɔ, nyi lɔ bɛ́ azɔn. É bɔ wǔ bɔ un ná jó gbe, bo ná wɔn ɖɔ hwenu e un zé nyiɖée jó nú Mawu é ɔ, un d’akpá ɖɔ sɛn e un ná sɛn ɛ é wɛ ɖo tají hú gǎn ɖo gbɛzán ce mɛ. Amɔ̌, zě e un zé nyiɖée jó nú Mawu é wɛ nyí nǔ e d’alɔ mì tawun bɔ un ɖí xwi xá tagba énɛ́ lɛ́ é.”—Karen.
Wěɖexámɛ: Kplɔ́n nǔ dó Jozɛ́fu wú. A sixú xa tan tɔn ɖo Bǐbɛ́mɛ wěmata 37 kpó 39 jɛ 41 kpó mɛ. Gbějé nǔkanbyɔ́ élɔ́ lɛ́ kpɔ́n: Tagba maɖónukún tɛ́ lɛ́ é ka mɔ? Nɛ̌ é ka ɖí xwi xá yě gbɔn? Nɛ̌ Jexóva ka d’alɔ Jozɛ́fu gbɔn?
A ɖó hudó alɔdó tɔn wɛ a?
Kpo ɖo mɛtɛ́nkpɔ́n lɛ́ ɖí xwi xá wɛ
Wěmafɔ tají: “Mɛ ɖokpó ɖokpó nɔ jɛ tɛ́nkpɔ́n mɛ hwenu e jlǒ mɛɖésúnɔ tɔn dɔn mɛ, bo lú mɛ é.”—Jaki 1:14.
Tínmɛ tɔn: Hweɖélɛ́nu ɔ, jlǒ ɖé lɛ́ nɔ dɔn mǐ mɛ bǐ, bɔ ényí mǐ ma ɖu ɖo jlǒ énɛ́ lɛ́ jí ǎ ɔ, yě sixú dɔn mǐ bɔ mǐ ná wa nǔ nyanya.
Nǔ e sixú jɛ é: Ðo batɛ́mu gúdo ɔ, “jlǒ agbaza tɔn lɛ́” ná kpo ɖo fínɛ́. (2 Piyɛ́ɛ 2:18) Súnnu biba alǒ nyɔ̌nu biba jɛ nukɔn nú alɔwlíwlí tlɛ sixú jló we.
Nǔ e a sixú wa é: Wǎ gbeta ɔ kɔn din, hwɛ̌ cóbónú mɛtɛ́nkpɔ́n ɔ ní wá, ɖɔ a kún ná yí gbe bónú jlǒ towe lɛ́ ná sísɛ́ we bónú a ná wa nǔ nyanya ó. Flín ɖɔ Jezu ɖɔ: “Mɛ ɖěbǔ sixú nyí kannumɔ nú gǎn we ǎ.” (Matíe 6:24) A sixú ɖɔ mɛ e ná nyí gǎn towe é. Nǔ é ní nyí Jexóva. Ényí jlǒ e wá nú we é ná bo syɛ́n gbɔn ɖěbǔ ɔ, a hɛn ɔ a ná gɔn nǔ wa sɔgbe xá.—Galátinu lɛ́ 5:16.
Wěɖexámɛ: Tuun nǔwúkpíkpé towe lɛ́ kpó gǎnmaɖó towe lɛ́ kpó. Zun xɔ́ntɔn ɖěɖěe ná zɔ́n bɔ a ná ɖó jijɔ ɖagbe lɛ́ é. Nyi alɔ nú gbɛtɔ́, nɔtɛn kpó ninɔmɛ kpó ɖěɖěe nɔ zɔ́n bɔ nǔ e sɔgbe é wiwa nɔ vɛ́ wǔ nú we lɛ́ é.—Ðɛhan 26:4, 5.
A ɖó hudó alɔdó tɔn wɛ a?
Kpo ɖo hlɔ̌nhlɔ́n ná kanɖódónǔwú towe wɛ
Wěmafɔ tají: “Ðe bǐbí dó nǔ wú énɛ́ xlɛ́ káká sɔ́yi vivɔnu. . . . Mǐ jló ɖɔ mi ní nyí fɔnlínnɔ ǎ.”—Eblée lɛ́ 6:11, 12.
Tínmɛ tɔn: Mɛ e ma sɔ́ ayi tɔn bǐ ɖó azɔ̌ tɔn jí é sixú yá wǔ jɛ lɛjɛlɛjɛ dán jí, bo wá húzú fɔnlínnɔ.
Nǔ e sixú jɛ é: A bló batɛ́mu gúdo é ɔ, é ɖo wɛn ɖɔ akpakpa sɔ́ we tawun, bɔ a nɔ ɖó kan dó nǔ wú. A yí wǎn nú Jexóva tawun. Amɔ̌, hwenu kpɛɖé gúdo ɔ, a sixú mɔ ɖɔ é vɛ́ wǔ bɔ a ná kpo ɖo tónú se nú Jexóva wɛ ɖo nǔ bǐ mɛ, bɔ énɛ́ sixú túntún awakanmɛ nú we, bo zɔ́n bɔ kanɖódónǔwú towe ɖe kpo.—Galátinu lɛ́ 5:7.
Nǔ e a sixú wa é: Kpo ɖo nǔ e sɔgbe é wa wɛ, ényí akpakpa ma tlɛ nɔ sɔ́ we d’é wú hweɖélɛ́nu ǎ ɔ nɛ́. (1 Kɔlɛ́ntinu lɛ́ 9:27) Hwe ɖokpó ɔ nu ɔ, sɛkpɔ́ Tɔ́ towe jǐxwé tɔn ɔ, gbɔn tíntɛ́nkpɔ́n bo tuun i ganjí kpó ɖɛ xixo sɛ́dó è hwɛhwɛ kpó gblamɛ. Gɔ́ ná ɔ, kpo ɖo xɔ́ntɔn vívɛ́ zun xá mɛ ɖěɖěe yí wǎn nú Jexóva sinsɛn lɛ́ é wɛ.
Wěɖexámɛ: Flín ɖɔ Jexóva yí wǎn nú we tawun, bo ɖo gbesisɔmɛ bo ná d’alɔ we. Ényí kanɖódónǔwú towe ɖe kpo nú hwenu kléwún ɖé hǔn, ma lin ɖɔ é sin xomɛ dó we ó. Biblu ɖɔ: “É nɔ ná hlɔ̌nhlɔ́n ɖěvo mɛ e nǔ ci kɔ ná é, bo nɔ dó wǔsyɛ́n lanmɛ nú mɛ e agbɔ̌n kpé é.” (Ezayíi 40:29) Hwetɔnnu ɔ, é ná kɔn nyɔ̌ná dó gǎn ɖěɖěe a dó bo ná vɔ́ kan ɖó dó nǔ wú lɛ́ é jí.
A ɖó hudó alɔdó tɔn wɛ a?
Tasúná: Ényí a nɔ wa nǔ jlɔ́jlɔ́ ɔ, a ná hɛn xomɛ Jexóva tɔn hun! (Nǔnywɛ́xó 27:11) É ná víví n’i ɖɔ a ɖo jǐ tɔn, lobɔ é ná ná we nǔ e sín hudó a ɖó bo ná ɖí xwi xá ahwantɔ́nmɛ Satáan tɔn lɛ́ é bǐ.
Xóta élɔ́ lɛ́ lɔ sixú jɛjí nú we
NǓ E MƐ WÍNNYÁWÍNNYÁ LƐ́ NƆ KANBYƆ́ LƐ́ É
Étɛ́ un ka ɖó ná wa ɖo batɛ́mu gúdo?: Akpáxwé 1: Kpo ɖo nǔ e a ko nɔ wa lɛ́ é wa wɛ
Ðo batɛ́mu towe gúdo ɔ, wlǐbo nú xɔ́ntɔn e a zun xá Mawu é. Kpo ɖo Biblu kplɔ́n wɛ, ɖɛ xo wɛ, nǔ e a ɖi nǔ ná lɛ́ é ma xá mɛ ɖěvo lɛ́ wɛ, bo kpo ɖo kplé klisánwun tɔn lɛ́ yi wɛ.
NǓ E MƐ WÍNNYÁWÍNNYÁ LƐ́ NƆ KANBYƆ́ LƐ́ É
Un ɖó ná bló batɛ́mu wɛ a?: Akpáxwé 2: Nǔsísɔ́ nú batɛ́mu
Zǎn nǔkanbyɔ́ élɔ́ lɛ́ dó kpɔ́n ɖɔ a ka ko ɖo gbesisɔmɛ nú batɛ́mu a jí.
NǓ E MƐ WÍNNYÁWÍNNYÁ LƐ́ NƆ KANBYƆ́ LƐ́ É
Un ɖó ná bló batɛ́mu wɛ a?: Akpáxwé 3: Étɛ́ ka ɖo hinhɛn mì ɖó te wɛ?
Ényí hwiɖée zízé jó nú Jexóva bo bló batɛ́mu nɔ dó xɛsi we wɛ ɔ, xóta élɔ́ ná d’alɔ we bɔ a ná ɖu ɖo xɛsi towe lɛ́ jí.
NǓ E MƐ WÍNNYÁWÍNNYÁ LƐ́ NƆ KANBYƆ́ LƐ́ É
Nɛ̌ Un ka Sixu Ðu Ðò Mɛtɛnkpɔn lɛ Jí Gbɔn?
Kpɔ́n nǔ e sixu d’alɔ we bɔ a na ɖu ɖò jlǒ masɔgbe lɛ jí é atɔn.
