Eǒ. Biblu ɖɔ ɖɔ akwɛ nyí nǔ nyanya ǎ, mɔ̌ jɛn é ma ka lɛ́ ɖexlɛ́ ɖɔ é wɛ nyí ɖɔ nǔ nyanya lɛ bǐ tɔn ǎ é nɛ. Nukɛgbe “akwɛ mɛ wɛ nǔ nyanya tɛnmɛ tɛnmɛ lɛ bǐ nɔ tɔ́n sín” e mɛ lɛ bǐ nɔ zán ɖò kpaa mɛ é ɖò agboɖe, bo lɛ́ sɔ́ ta nǔ e Biblu ɖɔ é. Nǔ e Biblu ɖɔ é ɖíe: “wǎn yí nú akwɛ mɛ wɛ nǔ nyanya tɛnmɛ tɛnmɛ lɛ bǐ nɔ tɔ́n sín.”—1 Timɔtée 6:10

•  Etɛ Biblu ka ɖɔ dó akwɛ wu?

•  Etɛwu Biblu ka gb’akpá nú mɛ dó wǎn yí nú akwɛ wu?

•  Nɛ̌ mǐ ka sixu ɖu wě e Biblu ɖè xá mǐ dó akwɛ wu é sín lè gbɔn?

•  Wemafɔ Biblu tɔn e ɖɔ xó dó akwɛ wu lɛ é

 Biblu ɖexlɛ́ ɖɔ nú è zán akwɛ kpo nǔnywɛ kpo ɔ, é sixu wà ɖagbe nú mɛ, bo tlɛ sixu lɛ́ “nya xɛ ɖò mɛ jí.” (Nǔnywɛtɔ́xó 7:12) Gɔ́ na ɔ, Biblu nɔ kpa mɛ ɖěɖee nɔ hun alɔ dó na nǔ mɛ ɖevo lɛ é; akwɛ lɔ sixu ɖò nǔ enɛ lɛ mɛ.—Nǔnywɛxó 11:25.

 Mɔ̌ jɛn Biblu ka lɛ́ gb’akpá nú mǐ ɖɔ akwɛ ni ma gbovɛ̌ mǐ ó. É ɖɔ: “Mi ma jó miɖée dó nú wanyiyi nú akwɛ ɖu ɖò mi jí ó; nǔ e ɖò mi sí ɔ ni kpé mi.” (Eblée lɛ 13:5) Nǔ taji ɔ wɛ nyí ɖɔ mǐ ni sɔ́ akwɛ ɖó tɛn e jɛxa é mɛ, bo ma nya dɔkun gbé ó. É nyɔ́ wà ɔ, nǔ ɖěɖee sín hudo mǐ ɖó tawun lɛ é ɖó na nɔ kpé mǐ, é sixu nyí nǔɖuɖu, avɔ kpo xɔ kpo.—1 Timɔtée 6:8.

 Gwěnɔ alǒ nukúnkɛ́nnɔ lɛ na mɔ gbɛ̀ mavɔmavɔ ǎ. (Efɛzinu lɛ 5:5) Hwɛjijɔ ɖokpo wɛ nyí ɖɔ nukúnkɛ́n ɔ, vodunsinsɛn alɔkpa ɖé, alǒ sinsɛn-biblo nǔvú wɛ. (Kolosinu lɛ 3:5) Hwɛjijɔ ɖevo wɛ nyí ɖɔ nú nukúnkɛ́nnɔ lɛ ɖò gǎn dó wɛ, bo na gbɔ jlǒ yetɔn ɔ, hwɛhwɛ wɛ ye nɔ wɔn ya nú nǔgbododó walɔ ɖagbe tɔn lɛ. Mɛ ɖěɖee ‘jló na jɛ dɔkun zogbe lɛ é ɔ, è na gɔn tó dɔn nú ye ǎ’ wɛ Nǔnywɛxó 28:20 ɖɔ. É tlɛ sixu wá jɛ bɔ ye na dó nǔ baɖabaɖa sin, vlafo ye sixu nɔ hízí mɛ, nɔ xò mɛ ɖu, nɔ táfú mɛ, nɔ fin mɛ, alǒ nɔ hu mɛ.

 Wǎn yí nú akwɛ na bo ma tlɛ nɔ zɔ́n nú è nɔ dó nǔ baɖabaɖa sin ǎ ɔ, é ka sixu jì nǔ nyanya ɖevo lɛ. Biblu ɖɔ ɖɔ “mɛ e nɔ jló na jɛ dɔkun lɛ nɔ jɛ tɛnkpɔn mɛ, bo nɔ jɛ jlǒ maɖótaɖé lɛ, kpodo jlǒ e nɔ zɔ́n bɔ è nɔ mɔ wuvɛ̌ lɛ kpo sín mɔ mɛ.”—1 Timɔtée 6:9.

 Enyi mǐ ma zɔ́n dó akwɛ wu, bo gbɛ́ nǔ e nyí nǔ ɖagbe kpo nǔ e nɔ hɛn xomɛ Mawu tɔn hun kpo lɛ é ǎ ɔ, mǐ na ɖó wi ɖò ta, bɔ nǔ mǐtɔn na lɛ́ nyɔ́ Mawu nukúnmɛ, b’ɛ na nɔ gudo nú mǐ. Mawu dó akpá elɔ nú mɛ ɖěɖee kánɖeji bo na hɛn xomɛ tɔn hun nǔgbo nǔgbo lɛ é: “Un na jó we dó gbeɖé ǎ; un na ɖè alɔ sín kan towe mɛ gbeɖé ǎ.” (Eblée lɛ 13:5, 6) É lɛ́ na ganjɛwu mǐ ɖɔ ‘è na xò nyɔnaɖɛ dó gbejinɔtɔ́ jí ɖě jɛ ɖě jí.’—Nǔnywɛxó 28:20.