Etɛ Biblu ka Ðɔ Dó Hlɔnbiba Wu?

Xósin e Biblu na é

Enyi mɛɖé tlɛ mɔ ɖɔ emi ɖó acɛ bo na ba hlɔn ɔ, mɔ̌ wiwa sɔ́ ta wěɖexámɛ Biblu tɔn elɔ: “Ma ɖɔ nǔ e mɛɖé wà xá emi ɔ, emi na wà xá mɛ ɔ ó.” (Nǔnywɛxó 24:29) Wěɖexámɛ gegě ɖò Biblu mɛ, bo ko d’alɔ mɛ gegě bɔ ye ɖu ɖo jlǒ e ye ɖó bo na ba hlɔn é jí.

Ðò xóta elɔ mɛ ɔ, mǐ na ɖɔ xó dó nǔ elɔ lɛ jí:

Etɛwu é ka nylá ɖɔ è ni ba hlɔn?

Enyi mɛɖé dó xomɛsin nú wɛ, alǒ wà nǔ nyi dò nú we ɔ, jɔwamɔnú wɛ é nyí ɖɔ xomɛ na sin wɛ, bɔ a na ba ɖɔ è ni dɔn tó nú mɛ ɔ ɖó nǔ e é ɖɔ alǒ wà é wu. É ɖò mɔ̌ có, hlɔnbiba mɛɖesu sɔgbe xá nǔ e Biblu ɖɔ é ǎ. Etɛwu?

Enyi gbɛtɔ́ lɛ ba hlɔn yeɖesu ɔ, é nɔ nyɔ́ Mawu nukúnmɛ ǎ. Ðò Biblu mɛ ɔ, Jehovah a Mawu ɖɔ: “Nyɛ wɛ nɔ ba hlɔn; nyɛ wɛ nɔ sú nǔ e è wà ɔ sín axɔ́ mɛ.” (Hlɔmanu lɛ 12:19) Biblu dó wǔsyɛn lanmɛ nú mɛ e è wà nǔ agɔ xá lɛ é ɖɔ ye ni ma ba hlɔn ó, lé é nyɔ́ wà hǔn, ye ni ba ali e nu ye na ɖeɖɛ tagba ɔ ɖè dó fífá mɛ é. (Hlɔmanu lɛ 12:18) Amɔ̌, enyi ali e nu mɛɖé na ɖeɖɛ tagba ɔ dó fífá mɛ ɖè é ɖě ma ɖè ǎ, alǒ enyi é ko wà nǔ e wu é kpé bo na ɖeɖɛ tagba ɔ dó fífá mɛ é bǐ ɔ ka ló? Biblu ɖɔ nú mǐ ɖɔ mǐ ni ɖeji dó Jehovah wu ɖɔ é na jlá nǔagɔwiwa lɛ bǐ ɖó.—Ðɛhan 42:11, 12.

Nɛ̌ Mawu ka nɔ dɔn tó nú mɛ nyanya lɛ gbɔn?

Dìn hwɛ̌ ɔ, Mawu lɔn bɔ acɛkpikpa e ɖo tò nu lɛ é nɔ dɔn tó nú mɛ e wà nǔ nyanya lɛ é. (Hlɔmanu lɛ 13:1-4) É sù hwetɔnnu ɔ, é na ɖó hwɛ nú dakaxotɔ́ lɛ, bo na sú kún dó nú wuvɛ̌ sise kaka sɔyi.—Ezayíi 11:4.

Nɛ̌ un ka sixu ɖu ɖò jlǒ e un nɔ ɖó bo na ba hlɔn é jí gbɔn?

Ma nɔ ɖò xomɛsin jí bo nɔ wà nǔ ó. (Nǔnywɛxó 17:27) Mɛ e nɔ jó xomɛsin dó, bɔ é nɔ ɖu ɖò ye jí lɛ é nɔ wà nǔ e nɔ wá vɛ́ nú ye ɖò nukɔnmɛ lɛ é. Amɔ̌, mɛ e nɔ zán hwenu bo nɔ lin tamɛ cobo nɔ wà nǔ lɛ é nɔ wá gbeta e nyɔ́ hugǎn lɛ é kɔn.—Nǔnywɛxó 29:11.
Ba dò nú nǔgbo ɔ. (Nǔnywɛxó 18:13) Mɛ e è wà nǔ nyi dò dó é ɖó na kanbyɔ éɖée ɖɔ: ‘Hwɛjijɔ ɖě ka ɖè, bɔ un tuùn ǎ vlafɔ bɔ é na tinmɛ nǔ e mɛ ɔ wà é à? Kɔ gbidí n’i wɛ è ka ɖè à? Manywɛ mɛ wɛ é ɖè, bo wà nǔ à?’ Hweɖelɛnu ɔ, nǔ e mǐ sixu lin ɖɔ è tuùn cobo wà dó mǐ é sixu nyí nǔwanyido ɖé kpowun.

Nukúnnúmɔjɛnǔmɛ agɔ lɛ dó hlɔnbiba wu

Nukúnnúmɔjɛnǔmɛ agɔ: Biblu na gbè ɖɔ mǐ sixu ba hlɔn hwenu e é ɖɔ: “Nú nukún wɛ é tɔ́n ɛ ɔ, è na tɔ́n nukún é lɔmɔ̌” é.—Levíi ví lɛ 24:20.

Nǔgbo: Sɛ́n e ɖɔ: “Nú nukún wɛ é tɔ́n ɛ ɔ, è na tɔ́n nukún é lɔmɔ̌” é nɔ zɔ́n bɔ awakanmɛ nɔ kú mɛ lɛ dó hlɔnbiba mɛɖesunɔ wu. Ðò kpaa mɛ ɔ, sɛ́n ɔ nɔ d’alɔ hwɛɖɔtɔ́ lɛ, bɔ ye nɔ dɔn tó nú nǔnyanyawatɔ́ lɛ ɖò ali ɖé nu bɔ é nɔ sɔgbe xá mɛ ɔ kpo nǔ nyanya e é wà é kpo. b—Sɛ́nflínmɛ 19:15-21.

Nukúnnúmɔjɛnǔmɛ agɔ: Ðó Biblu ma na gbè ɖɔ è ni ba hlɔn mɛɖesúnɔ ǎ wutu ɔ, mǐ sixu jɛhun dó mǐɖée jí hwenu e è tɔ́n ahwan mǐ é ǎ.

Nǔgbo: Enyi è tɔ́n ahwan mɛɖé ɔ, é ɖó acɛ bo na jɛhun dó éɖée jí, bo ba alɔdó acɛkpikpa lɛ tɔn. É ɖò mɔ̌ có, Biblu ɖɔ mǐ ɖó na nyi alɔ nú nǔdindɔn, hweɖebǔnu e é nyɔ́ bló é.—Nǔnywɛxó 17:14.

a Jehovah wɛ Mawu nɔ nyí bɔ Biblu ɖexlɛ́.

b Bo na dó mɔ tinmɛ hlɛ́nhlɛ́n dó sɛ́n enɛ wu ɔ, kpɔ́n xóta “Etɛ ka Nyí Tinmɛ ‘Mɛɖé Tɔ́n Nukún We hǔn, Tɔ́n Nukún É Lɔmɔ̌’ Tɔn?”