Biblu-wlantɔ́ lɛ nɔ zán xókwín “hwlɛn” alǒ “hwlɛngán” ɔ hweɖelɛnu dó ɖɔ xó dó mɛ e è hwlɛn ɖò awovínú ɖé mɛ, alǒ ɖò kún súsú dó nú nǔɖe hwenu é wu. (Tíntɔ́n 14:13, 14; Mɛsɛ́dó 27:20) Amɔ̌, hwɛhwɛ ɔ, xókwín enɛ lɛ nɔ dó gesí hwlɛ̌n e è hwlɛn mɛɖé gán sín hwɛ tɔn lɛ mɛ é. (Matie 1:21) Ðó hwɛhuhu wɛ nɔ zɔ́n bɔ è nɔ kú wutu ɔ, mɛ ɖěɖee è hwlɛn sín hwɛhuhu sí lɛ é ɖó nukúnɖiɖó ɔ bá nɔ gbɛ̀ kaka sɔyi.—Jaan 3:16, 17. a

Etɛ è ka sixu wà dó mɔ hwlɛngán?

 Bonu a na mɔ hwlɛngán ɔ, a ɖó na ɖi nǔ nú Jezu bo ɖè nǔɖiɖi enɛ xlɛ́ gbɔn tónúsíse nú gbeɖiɖe tɔn lɛ gblamɛ.—Mɛsɛ́dó 4:10, 12; Hlɔmanu lɛ 10:9, 10; Eblée lɛ 5:9.

 Biblu xlɛ́ ɖɔ nǔwiwa towe lɛ, alǒ tónúsíse sín afɔ e a nɔ ɖè lɛ é ɖó na xlɛ́ ɖɔ nǔɖiɖi towe ɖò gbɛ̀. (Jaki 2:24, 26) É ɖò mɔ̌ có, hwlɛngán ɔ sín ali ko ɖò hunhun nú we ɖó mɔ̌ wu ǎ. “Nǔnamɛ Mawu tɔn” e jinjɔn “xomɛnyínyɔ́ . . . tɔn” jí é wɛ nyí tɔn.—Efɛzinu lɛ 2:8, 9.

A ka sixu ba hwlɛngán kpò à?

 Ɛɛn. Mɛ e ɖò tɔ̀ kú wɛ bɔ è hwlɛn ɛ é ɖé sixu lɛ́ yì zɔn mɛ. Mɔ̌ ɖokpo ɔ, mɛ e è xɔ sín hwɛhuhu sí bɔ é ka gbɔ nǔ ɖi é ɖé sixu ba hwlɛngán kpò. Enɛ wu wɛ Biblu dó wusyɛn lanmɛ nú Klisanwun ɖěɖee ko ɖò hwlɛngán li jí lɛ é ɖɔ ye “ni fun ahwan nú nǔɖiɖi.” (Judi 3) É lɛ́ gb’akpá nú mɛ ɖěɖee è ko hwlɛn lɛ é ɖɔ: “Mi wà azɔ̌ kpo xɛsi kpo, kpodo sísɔ́sísɔ́ kpan nú hwlɛngán mitɔn na nyí hwlɛngán kpíkpé.”—Filipunu lɛ 2:12.

Mɛ̌ ka nyí Mɛhwlɛngántɔ́ ɔ? Mawu wɛ à, alǒ Jezu?

 Biblu ɖɔ ɖɔ Mawu wɛ nyí mɛ nukɔntɔn e hwlɛn mǐ gán é, bɔ hwɛhwɛ ɔ, é nɔ ylɔ́ ɛ ɖɔ “Mɛhwlɛngántɔ́.” (1 Samuwɛli 10:19; Ezayíi 43:11; Titu 2:10; Judi 25) Gɔ́ na ɔ, Mawu zán sunnu vovo dó hwlɛn akɔta Izlayɛli hwexónu tɔn ɔ, bɔ sunnu enɛ lɛ lɔ nyí mɛhwlɛngántɔ́ lɛ. (Nɛɛmíi 9:27; Hwɛɖɔtɔ́ lɛ 3:9, 15; 2 Axɔ́su lɛ 13:5) b Ðò ali ɖokpo ɔ nu ɔ, ɖó Mawu hwlɛn mǐ sín hwɛhuhu sí gbɔn vɔsisa gbɛxɔnúmɛ tɔn Jezu Klisu tɔn gblamɛ wutu ɔ, Biblu ɖɔ ɖɔ Jezu nyí “Mɛhwlɛngántɔ́.”—Mɛsɛ́dó 5:31; Titu 1:4. c

Mɛ lɛ bǐ wɛ è ka na hwlɛn gán à?

 Eǒ, mɛɖé lɛ na ba hwlɛngán kpò. (2 Tɛsalonikinu lɛ 1:9) Hwenu e è kanbyɔ Jezu ɖɔ “Aklunɔ, mɛ kpɛɖé jɛn Mawu na hwlɛn gán nǔgbo à?” jí é ɔ, é ɖɔ: “Mi dó gǎn, bo gbɔn hɔn kpɛví ɔ nu; ɖó má ɖɔ nú mi, mɛ gegě na ba ɖɔ emi na gbɔn hɔnli enɛ nu, bo ka na kpéwú ǎ.”—Luki 13:23, 24.

Nukúnnúmɔjɛnǔmɛ agɔ dó hwlɛngán mɛ bǐ tɔn wu

 Nukúnnúmɔjɛnǔmɛ agɔ: Piyɛ́ɛ wegɔ́ ɔ 3:9 ɖɔ ɖɔ Mawu kún “jló ɖɔ mɛ ɖebǔ ni dɔn” ó, dó kplɔ́n mɛ ɖɔ mɛ lɛ bǐ wɛ na mɔ hwlɛngán.

 Nǔgbo: Mawu ba ɖɔ gbɛtɔ́ lɛ ni gán, amɔ̌, é nɔ hɛn ye gannugánnú ɖɔ ye ni yí gbè nú hwlɛngán sín ali e é hun é ǎ. “É na wá ɖó hwɛ nú mɛ nyanya lɛ, bo na vɔ ye.”—2 Piyɛ́ɛ 3:7.