Sɔgbe xá Biblu ɔ, gbɛtɔ́ gbigbɔ tɔn sín tínmɛ wɛ nyí ɖɔ è ní ɖó jlǒ syɛ́nsyɛ́n bá nyɔ́ Mawu nukúnmɛ, bó lɛ́ kplɔ́n bó nɔ kpɔ́n nǔ lɛ́ lěe é nɔ kpɔ́n gbɔn é. Gbɛtɔ́ gbigbɔ tɔn ɖé nɔ tɛ́n kpɔ́n bó nɔ zán gbɛ sɔgbe xá nǔgbódodó Mawu tɔn lɛ́, bó nɔ lɛ́ xwedó alixlɛ́mɛ gbigbɔ mímɛ́ Tɔn tɔn lɛ́. a—Hlɔ̌manu lɛ́ 8:5; Efɛ́zinu lɛ́ 5:1.

 Biblu nɔ ɖɔ nǔ e mɛ e ma nyí gbɛtɔ́ gbigbɔ tɔn ǎ é nɔ wa lɛ́ é hwɛhwɛ dó tínmɛ nǔ e gbɛtɔ́ gbigbɔ tɔn ɖé nyí é. Ði kpɔ́ndéwú ɔ, ‘mɛ e ma ɖó gbigbɔ Mawu tɔn ǎ ɔ sixú yí nǔníná Mawu tɔn e gbigbɔ énɛ́ ɔ nɔ ná mɛ lɛ́ é,’ alǒ nǔkplɔ́nmɛ Mawu tɔn lɛ́ ǎ; gbɛtɔ́ gbigbɔ tɔn ɖé tɔn ka gbɔn vo. (1 Kɔlɛ́ntinu lɛ́ 2:14-16) Gbɛtɔ́ agbaza tɔn nɔ flɔ́ zo dó glɔ̌ nú alɔhundónánǔmɛ kpó fífá kpó ǎ, é nyɔ́ wa ɔ, ‘wǔhwinhwan kpó jlɛɖiɖɔ kpó’ wɛ é nɔ fló zo dó glɔ̌ ná; gbɛtɔ́ gbigbɔ tɔn ka ɖo mɔ̌ ǎ. (1 Kɔlɛ́ntinu lɛ́ 3:1-3) Gɔ́ ná ɔ, yě mɛ ɖěɖěe nɔ ɖɔ mɛ nú bó nɔ lɛ́ klán xɔ́ntɔn vívɛ́ lɛ́ é ɔ, è nɔ ylɔ́ yě ɖɔ “kanlinjɔmɔ lɛ, gbigbɔ Mawu tɔn nɔ xlɛ́ ali yě ǎ.”—Judi 19, nwt; Nǔnywɛ́xó 16:28. b

Ðo xóta élɔ́ mɛ ɔ, mǐ ná ɖɔ xó dó nǔ élɔ́ lɛ́ jí:

•  Fítɛ́ gbɛtɔ́ gbigbɔ tɔn sín xó ɔ ka gosín?

•  Étɛ́wú gbɛtɔ́ gbigbɔ tɔn nyínyí ka ɖo tají?

•  Nɛ̌ un ka sixú nyí gbɛtɔ́ gbigbɔ tɔn ɖé gbɔn?

•  É byɔ́ ɖɔ má ɖo sinsɛn ɖé mɛ cóbá nyí gbɛtɔ́ gbigbɔ tɔn wɛ a?

•  Nukúnnúmɔjɛnǔmɛ agɔ lɛ́ dó gbɛtɔ́ gbigbɔ tɔn nyínyí wú

•  Wěmafɔ Biblu tɔn lɛ́ dó gbɛtɔ́ gbigbɔ tɔn nyínyí wú

 Mǐ ɖó nǔwúkpíkpé ɔ bó ná nyí gbɛtɔ́ gbigbɔ tɔn, ɖó è dá mǐ ɖo akpajlɛ́ Mawu tɔn mɛ. (Bǐbɛ́mɛ 1:27) Énɛ́ wú ɔ, ɖó nǔ e è ma sixú mɔ alǒ ɖ’alɔ wú ǎ lɛ́ é nɔ xɔ akwɛ́ nú mɛ gěgé, bɔ yě nɔ lɛ́ ba ná kplɔ́n nǔ dó nǔ énɛ́ lɛ́ wú wútu ɔ, é kpácá mɛ ǎ.

 Mǐ ɖó nǔwúkpíkpé ɔ ɖo jɔwámɔ linu bó ná ɖe jijɔ ɖěɖěe Jehovah c Mawu ɖó lɛ́ é xlɛ́, ɖi fífá, nǔbláwǔkúnúmɛ, kpó mɛmaɖeɖóvo kpó. (Jaki 3:17) Gɔ́ ná ɔ, Mawu nɔ ná gbigbɔ mímɛ́ tɔn mɛ ɖěɖěe ɖo tíntɛ́nkpɔ́n wɛ bá se tónú nú gbeɖiɖe tɔn lɛ́ é.—Mɛsɛ́dó 5:32.

 Gbɛtɔ́ gbigbɔ tɔn nyínyí nɔ kplá mɛ bɔ “è nɔ mɔ gbɛ, bó nɔ mɔ fífá.” (Hlɔ̌manu lɛ́ 8:6) Nǔníná Mawu tɔn énɛ́ lɛ́ xɔ akwɛ́ tawun bɔ è sixú sɔ́ yě jlɛ́ dó nǔ ɖěbǔ wú ǎ.

•   Gbɛ: Mawu d’akpá ɖɔ émí ná ná gbɛ mavɔmavɔ gbɛtɔ́ gbigbɔ tɔn lɛ́.—Jaan 17:3; Galátinu lɛ́ 6:8.

•   Fífá: Énɛ́ nɔ dó gesí fífá mɛ ninɔ xá Mawu. Mɛ ɖěɖěe nɔ sɔ́ ayi ɖó hudó agbaza tɔn yětɔn lɛ́ kɛ́ɖɛ́ jí lɛ́ é ɔ, kɛntɔ́ Mawu tɔn wɛ yě nyí. (Hlɔ̌manu lɛ́ 8:7) Gɔ́ ná ɔ, Mawu nɔ sɔ́ ‘fífá tɔn e hú gǎn nukúnnúmɔjɛnǔmɛ gbɛtɔ́ tɔn bǐ é’ dó d’ajɔ mɛ ɖěɖěe ɖo gǎn dó wɛ bó ná nyí gbɛtɔ́ gbigbɔ tɔn d’é jí lɛ́ é. (Filípunu lɛ́ 4:6, 7) Fífá ayi mɛ tɔn énɛ́ nɔ d’alɔ yě bɔ yě nɔ ɖó awǎjijɛ ɖo gbɛzán yětɔn mɛ.—Matíe 5:3, nwt.

•   Kplɔ́n gbeɖiɖe Mawu tɔn lɛ́ bó se tónú nú yě. A sixú wa mɔ̌ gbɔn Biblu xixa gblamɛ; linlin Mawu tɔn e ‘gbigbɔ mímɛ́ sɔ́ dó ayi mɛ nú gbɛtɔ́ lɛ́’ bɔ yě wlán lɛ́ é wɛ ɖ’é mɛ. (2 Piyɛ́ɛ 1:21) Nǔ e a ná kplɔ́n lɛ́ é ná d’alɔ we bɔ a ná sɛn Mawu ‘gbɔn hlɔ̌nhlɔ́n gbigbɔ ɔ tɔn mɛ, bó ná sɛn ɛ ɖo nǔgbó mɛ,’ énɛ́ wɛ nyí ɖɔ a ná jó hwiɖée dó bɔ gbigbɔ mímɛ́ tɔn ná xlɛ́ ali we, bó ná lɛ́ zán gbɛ sɔgbe xá jlǒ tɔn.—Jaan 4:24.

•   Xo ɖɛ dó byɔ́ alɔdó Mawu tɔn. (Luki 11:13) Mawu ná d’alɔ we bɔ a ná ɖe jijɔ ɖěɖěe è nɔ dó tuun gbɛtɔ́ gbigbɔ tɔn ɖé ná lɛ́ é xlɛ́. (Galátinu lɛ́ 5:22, 23) É ná lɛ́ ná we nǔnywɛ́ bɔ a ná ɖí xwi xá wǔvɛ́ gbɛmɛ tɔn lɛ́.—Jaki 1:5.

•   Nɔ dó gbɛ̌ xá gbɛtɔ́ gbigbɔ tɔn lɛ́. Yě ná dó wǔsyɛ́n lanmɛ nú we bɔ a ná ná hlɔ̌nhlɔ́n gbɛtɔ́ gbigbɔ tɔn e a nyí é. (Hlɔ̌manu lɛ́ 1:11, 12) Amɔ̌, gbɛ̌dídó xá mɛ ɖěɖěe linlin yětɔn lɛ́ nɔ sɔ́ ta linlin Mawu tɔn lɛ́ é sixú vɔ́ da nú gbɛtɔ́ gbigbɔ tɔn e a nyí é.—Jaki 4:4.

 È ko ɖo sinsɛn ɖé mɛ kpowun wɛ ná zɔ́n bɔ è ná nyí gbɛtɔ́ gbigbɔ tɔn ǎ. Biblu ɖɔ: “Ényí mɛɖé mɔ ɖɔ émí nyí sinsɛnnɔ, bó ma ka nɔ hɛn nu tɔn ǎ ɔ, éɖée blɛ́ wɛ é ɖe; sinsɛn tɔn nyí nǔɖéwanú ǎ.”—Jaki 1:26.

 É ɖo mɔ̌ có, Biblu xlɛ́ ɖɔ gbɛtɔ́ gbigbɔ tɔn lɛ́ nɔ sɛn Mawu lěe é ba gbɔn é. Yě tuun ɖɔ ‘gbigbɔ mímɛ́ ɖokpó géé’ wɛ ɖe, é wɛ nyí gbigbɔ mímɛ́ Mawu tɔn. Gbigbɔ énɛ́ nɔ sísɛ́ yě bɔ yě nɔ sɛn Mawu “agbaza ɖokpó géé” ɖɔhun, énɛ́ wɛ nyí ɖi gbɛ̌ta e è bló tito ná b’ɛ nɔ ‘sɔ́ fífá e dɔn yě cá, bɔ yě nyí ɖokpó ɔ dó hɛn bǔténinɔ e gbigbɔ mímɛ́ ná yě ɔ ɖó te’ é.—Efɛ́zinu lɛ́ 4:1-4.

 Nukúnnúmɔjɛnǔmɛ agɔ: Nǔɖíɖó lɛ́ bǐ wɛ nyí nǔɖíɖó gbigbɔ tɔn ɖo jɔwámɔ linu.

 Nǔgbó: Nǔ e Mawu dá lɛ́ é bǐ wɛ nɔ wlí yɛ̌yi n’i. (Ðɛhan 145:10; Hlɔ̌manu lɛ́ 1:20) É ɖo mɔ̌ có, nǔɖíɖó Mawu tɔn e ɖó nǔnywɛ́ lɛ́ é kɛ́ɖɛ́ jɛ́n ɖó nǔwúkpíkpé ɔ bó ná nyí gbɛtɔ́ gbigbɔ tɔn. Amɔ̌ kanlin lɛ́ ɔ, jɔwámɔ linu (instinct) wɛ yědɛɛ lɛ́ nɔ wa nǔ, yě sixú zun xɔ́ntɔn xá Mawu ǎ. Nǔ e sín hudó yě ɖó lɛ́ é wɛ nɔ sísɛ́ yě hú gǎn ɖo nǔ e yě nɔ wa lɛ́ é kɔn. (2 Piyɛ́ɛ 2:12) Énɛ́ wú wɛ Biblu xlɛ́ ɖɔ gbɛtɔ́ gbigbɔ tɔn nyínyí sín flíjɛ wɛ nyí linlin kanlin lɛ́ tɔn kpó nǔwiwa yětɔn lɛ́ kpó.—Jaki 3:15, nwt; Judi 19, nwt.