Biblu slɛ́ “hwɛ e nɔ dɔn mɛ yì kú é tɛnwe” tlɔlɔ lě ǎ. É ɖò mɔ̌ có, é kplɔ́n mɛ ɖɔ hwɛ syɛnsyɛn lɛ huhu na zɔ́n bɔ mɛɖé na ba hwlɛngán kpò. Ði kpɔ́ndéwú ɔ, Biblu ylɔ́ hwɛ syɛnsyɛn lěhun lɛ ɖɔ “nǔ nyanya e gbɛtɔ́ nɔ wà lɛ,” alǒ azɔ̌ agbaza tɔn lɛ: agalilɛ, vodunsinsɛn, awovínúwiwa, majijɛ, kpo ahannumu kpo. Enɛ gudo ɔ, é ɖɔ ɖɔ “mɛ e nɔ wà nǔ mɔ̌hunkɔtɔn lɛ kún ɖò axɔ́suɖuɖu Mawu tɔn mɛ na byɔ wɛ ó.”—Galatinu lɛ 5:19-21. a

Biblu ka slɛ́ ‘nǔ tɛnwe bɔ Mawu gbɛ́ wǎn na’ à cé?

 Ganji. Nǔnywɛxó 6:16-19 ɖɔ ɖɔ “nǔ ayizɛ́n wɛ nɔ vɛ́ Mawu Mavɔmavɔ wu, . . . nǔ tɛnwe wɛ é nɔ gbɛ́ wǎn na.” É ɖò mɔ̌ có, hwɛhuhu e ko tíìn lɛ é bǐ wɛ è slɛ́ ɖó wemafɔ enɛ lɛ mɛ ǎ. É nyɔ́ wà ɔ, wemafɔ enɛ lɛ slɛ́ walɔ nyanya ɖěɖee nɔ nyí ɖɔ nú hwɛhuhu alɔkpa lɛ bǐ lɛ é, kaka jɛ hwɛ e è nɔ hu ɖò linlin, xóɖiɖɔ, kpo nǔwiwa kpo mɛ lɛ é jí. b

Etɛ ka nyí tinmɛ xógbe “hwɛ e nɔ dɔn mɛ yì kú é” tɔn?

 Biblu ɖexlɛ́ céɖécéɖé ɖɔ hwɛ lɛ bǐ wɛ nɔ dɔn mɛ yì kú. É ɖò mɔ̌ có, vɔsisa gbɛxɔnúmɛ tɔn Jezu Klisu tɔn sixu hwlɛn mǐ sín hwɛhuhu kpo kú kpo sí. (Hlɔmanu lɛ 5:12; 6:23) Enɛ wu ɔ, “hwɛ e nɔ dɔn mɛ yì kú é” ɔ, hwɛ e vɔsisa Klisu tɔn ma sixu súnsún ǎ é wɛ. (1 Jaan 5:16)

 Mɛ e hu hwɛ mɔ̌hun ɖé é nɔ kánɖeji bo na kpò ɖò hwɛhuhu gbɛ̀ zán wɛ sɔmɔ̌ bɔ é na ɖyɔ linlin tɔn kpo walɔ tɔn kpo gbeɖé ǎ. Biblu ɖɔ ɖɔ mɛ e na hu hwɛ mɔ̌hun ɖé é ɔ, “è na sɔ́ kɛ ɛ ǎ.”—Matie 12:31; Luki 12:10.