Adamu kpo Ɛvu kpo wɛ nyí mɛ nukɔntɔn e hu hwɛ lɛ é. Hwenu e ye vɛtoli nú Mawu bo ɖu “atín e sín sínsɛ́n è nɔ ɖu bo nɔ tuùn nǔ ɖagbe kpodo nǔ nyanya kpo ɔ,” ye hu hwɛ e mɛ gegě nɔ ylɔ́ égbé ɖɔ hwɛ nukɔntɔn ɔ é. a (Bǐbɛ̌mɛ 2:16, 17; 3:6; Hlɔmanu lɛ 5:19) Atín enɛ ɖó dogbó nú Adamu kpo Ɛvu kpo, ɖó acɛkpikpa alǒ acɛ e Mawu ɖó, bo na ɖɔ nǔ e nyɔ́ é kpo nǔ e nyla é kpo nú gbɛtɔ́ lɛ é wɛ é nɔte na. Ee Adamu kpo Ɛvu kpo ɖu atín sínsɛ́n enɛ é ɔ, yeɖesu wá gbeta ɔ kɔn, bo na ɖɔ nǔ e nyɔ́ é kpo nǔ e nyla é kpo nú yeɖée. Ee ye wà mɔ̌ é ɔ, ye gbɛ́ acɛ e Mawu ɖó bo na ɖɔ nǔ lě nyí ɖagbe bɔ nǔ lě nyí nyanya é.

•  Nɛ̌ “hwɛ nukɔntɔn” ɔ ka wà nǔ dó Adamu kpo Ɛvu kpo wu gbɔn?

•  Nɛ̌ “hwɛ nukɔntɔn” ɔ ka wà nǔ dó mǐ wu gbɔn?

•  È ka sixu tún kan nú mǐ sín nǔ e “hwɛ nukɔntɔn” ɔ jì lɛ é sí à?

•  Nukúnnúmɔjɛnǔmɛ masɔgbe lɛ dó “hwɛ nukɔntɔn” ɔ wu

 Ðó Adamu kpo Ɛvu kpo hu hwɛ wutu ɔ, ye kpò bo wá kú. Ye hɛn kancica e ɖò ye kpo Mawu kpo tɛntin é gblé, bo lɛ́ hɛn nukúnɖiɖó e ye ɖó bo na nyí mɛ maɖóblɔ̌ bo na nɔ gbɛ̀ kaka sɔyi é bú.—Bǐbɛ̌mɛ 3:19.

 Adamu kpo Ɛvu kpo jó hwɛhuhu gú dó nú kúnkan yetɔn bǐ. É cí lee mɛjitɔ́ lɛ nɔ jó blɔ̌ e ɖò wǔtu yetɔn lɛ é ɖě dó nú vǐ yetɔn lɛ é ɖɔhun. (Hlɔmanu lɛ 5:12) Enɛ wu ɔ, “hwɛhuhu tɔ́ dó” b gbɛtɔ́ lɛ bǐ wu sín hwenu e è jì ye é, enɛ wɛ nyí ɖɔ è nɔ jì mǐ kpo hwɛhuhu kpo, bɔ é bɔwǔ nú mǐ bɔ mǐ na wà nǔ nyi dò.—Ðɛhan 51:7; Efɛzinu lɛ 2:3.

 Ðó hwɛhuhu gú e mǐ ɖu é wu ɔ, mǐ nɔ jɛ azɔn, kpò bo nɔ kú. (Hlɔmanu lɛ 6:23) Mǐ nɔ lɛ́ sè xɔxɔ nǔwanyido mǐtɔn lɛ kpo mɛ ɖevo lɛ tɔn kpo tɔn.—Nǔnywɛtɔ́xó 8:9; Jaki 3:2.

 Ganji. Biblu ɖɔ ɖɔ Jezu “sɔ́ éɖée dó savɔ̌, bonu Mawu na sɔ́ hwɛ mǐtɔn lɛ kɛ mǐ.” (1 Jaan 4:10) Vɔsisa Jezu tɔn sixu tún kan nú mǐ sín nǔ e hwɛhuhu gú mǐtɔn jì lɛ é sí, bo lɛ́ bló bɔ mǐ na ɖó nukúnɖiɖó e Adamu kpo Ɛvu kpo hɛn bú é, enɛ wɛ nyí nukúnɖiɖó ɔ bo na nɔ gbɛ̀ kaka sɔyi blɔ̌ ma ɖò wǔ.—Jaan 3:16. c

 Nukúnnúmɔjɛnǔmɛ masɔgbe: Hwɛ nukɔntɔn ɔ sɛ̀ mǐ dó zɔ nú Mawu kaka sɔyi.

 Nǔgbo: Mawu nɔ dóhwɛ mǐ ɖó nǔ e Adamu kpo Ɛvu kpo wà é wu ǎ. É tuùn ɖɔ hwɛhutɔ́ wɛ nú mǐ, é ka nɔ lɛ́ ɖó nukún ɖɔ mǐ ni wà nǔ zɛ nǔwukpíkpé mǐtɔn wu ǎ. (Ðɛhan 103:14) Hwɛhuhu sín gǔ e mǐ ɖu é nɔ zɔ́n bɔ mǐ nɔ sè wuvɛ̌ có, ali hun nú mǐ bɔ mǐ lɛ́ ɖó wǔjɔmɛ ɔ bo na ɖó kancica syɛnsyɛn ɖé xá Mawu.—Nǔnywɛxó 3:32.

 Nukúnnúmɔjɛnǔmɛ masɔgbe: Baptɛm nɔ tún kan nú mɛɖé sín hwɛ nukɔntɔn ɔ sí, enɛ wu ɔ vǐ yɛyɛ̌ lɛ ɖó na bló baptɛm.

 Nǔgbo: Nǔgbo wɛ ɖɔ baptɛm ɖò dandan cobɔ è na mɔ hwlɛngán. É ɖò mɔ̌ có, nǔɖiɖi ɖiɖó ɖò vɔsisa Jezu tɔn mɛ kɛɖɛ jɛn sixu hwlɛn mɛɖé sín hwɛ tɔn lɛ sí. (1 Piyɛ́ɛ 3:21; 1 Jaan 1:7) Ðó nǔɖiɖi jɔ nǔɖiɖi nɔ jinjɔn nǔ e è tuùn é jí wutu ɔ, vǐ kpɛví lɛ sixu ɖó nǔɖiɖi mɔhun ǎ. Enɛ wu ɔ, Biblu yí gbè nú baptɛm vǐ kpɛví lɛ tɔn ǎ. Enɛ jɛ wě ɖò Klisanwun nukɔntɔn lɛ hwenu. È bló baptɛm nú “sunnu kpodo nyɔnu kpo” e ɖi nǔ nú Xó Mawu tɔn lɛ é, é nyí vǐ yɛyɛ̌ lɛ ǎ.—Mɛsɛ́dó 2:41; 8:12.

 Nukúnnúmɔjɛnǔmɛ masɔgbe: Mawu dónu nyɔnu, ɖó Ɛvu wɛ nyí mɛ nukɔntɔn e ɖu atín sínsɛ́n e è dó sɛ́n tɔn é wutu.

 Nǔgbo: Enyi nyɔnu wɛ Mawu dónu ǎ, loɔ “dan xóxó e è nɔ ylɔ́ ɖɔ awoví abǐ Satáan é” wɛ é dónu; é wɛ sísɛ́ Ɛvu bɔ é hu hwɛ. (Nǔɖexlɛ́mɛ 12:9; Bǐbɛ̌mɛ 3:14) Gɔ́ na ɔ, Mawu sɔ́ agban hwɛhuhu nukɔntɔn ɔ tɔn ɖó Adamu ta, é nyí ɖó asì tɔn ta ǎ.—Hlɔmanu lɛ 5:12.

 Etɛwu Mawu ka ɖɔ ɖɔ Adamu na kp’acɛ nú asì tɔn? (Bǐbɛ̌mɛ 3:16) Hwenu e Mawu ɖò xó enɛ ɖɔ wɛ é ɔ, nǔ mɔhun yí gbè na wɛ é ɖè ǎ. Nǔ nyanya e hwɛhuhu na jì é ɖɔ ɖ’ayǐ wɛ é ɖè kpowun. Mawu nɔ ɖó nukún ɖɔ asú ɖé ni nɔ yí wǎn nú asì tɔn, bo nɔ wlí yɛ̌yi n’i, lobo lɛ́ ɖó sísí e gɔ́ngɔ́n é nú nyɔnu lɛ ɖò kpaa mɛ.—Efɛzinu lɛ 5:25; 1 Piyɛ́ɛ 3:7.

 Nukúnnúmɔjɛnǔmɛ masɔgbe: Hwɛ nukɔntɔn ɔ wɛ nyí xóɖóxámɛ.

 Nǔgbo: Hwɛ nukɔntɔn ɔ sixu nyí xóɖóxámɛ ǎ, ɖó hwɛjijɔ elɔ lɛ wu:

•   Mawu dó sɛ́n nú Adamu ɖɔ ni ma ɖu atín e nɔ zɔ́n bɔ è nɔ tuùn nǔ ɖagbe kpo nǔ nyanya kpo é ó, hwenu e Adamu kpò ɖò éɖokpo, bo ma ko d’asì ǎ é.—Bǐbɛ̌mɛ 2:17, 18.

•   Mawu ɖɔ nú Adamu kpo Ɛvu kpo ɖɔ ye ni ‘jì, bo gbà kún,’ enɛ wɛ nyí ɖɔ ye na jì vǐ lɛ. (Bǐbɛ̌mɛ 1:28) Nú xwédo nukɔntɔn ɔ wà nǔ e Mawu ɖegbe tɔn nú ye é, bonu Mawu ka lɛ́ dɔn tó nú ye ɔ, é na nyla ɖesu.

•   Ɛvu ko hu hwɛ jɛ nukɔn cobɔ asú tɔn wá hu ɖò nukɔnmɛ.—Bǐbɛ̌mɛ 3:6.

•   Biblu yí gbè nú xóɖóxámɛ ɖò asú ɖé kpo asì tɔn kpo tɛntin.—Nǔnywɛxó 5:18, 19; 1 Kɔlɛntinu lɛ 7:3.