Akɔwé lɛ ɖó hwɛjijɔ syɛnsyɛn bo na ɖi nǔ ɖɔ Jezu nɔ gbɛ̀ wá yì. Xókwintinmɛwegbo ɖé ɖɔ dó nǔ e hwenuxó-wlantɔ́ xwè kanweko nukɔntɔn ɔ kpo wegɔ ɔ kpo tɔn lɛ wlan dó Jezu kpo Klisanwun nukɔntɔn lɛ kpo wu é wu ɖɔ: “Tan kpaà enɛ lɛ xlɛ́ ɖɔ ɖò hwexónu ɔ, mɛ e tlɛ klán gbè xá Klisanwun lɛ é kún xò nǔ kpɔ́n gbeɖé dó gbɛ̀ e Jezu nɔ wá yì é wu ó; azɔn nukɔntɔn ɔ nɛ è dɔn nǔ dó nǔ enɛ jí ɖò ninɔmɛ e ma ɖó dodonú ǎ lɛ é mɛ, ɖò vivɔnu xwè kanweko 18gɔ́ ɔ tɔn, xwè kanweko 19gɔ́ ɔ hwenu, kpo bǐbɛ̌mɛ xwè kanweko 20gɔ́ ɔ tɔn kpo nɛ.” (Encyclopædia Britannica, 2002 Edition)

 Ðò 2006 ɔ, wema ɖé ɖɔ: “Akɔwé nukúnɖeji ɖé sixu xò nǔ kpɔ́n égbé ɖɔ Jwifu e nɔ nyí Jezu Jozɛfu ví é ɖé nɔ gbɛ̀ kpɔ́n ǎ; ye mɛ gègě wɛ nɔ yí gbè ɖɔ mǐ tuùn nǔ gègě dó nǔwiwa tɔn lɛ kpo nǔ taji e é kplɔ́n mɛ lɛ é kpo wu ɖò égbé.” (Jesus and Archaeology)

 Biblu ɖexlɛ́ ɖɔ Jezu nyí mɛ e nɔ gbɛ̀ kpɔ́n é ɖé nugbǒ. É ɖɔ nyikɔ daagbo daagbo tɔn lɛ kpo hɛnnumɔ tɔn lɛ kpo tɔn. (Matie 1:1; 13:55) É lɛ́ ɖɔ nyikɔ acɛkpatɔ́ nukúnɖeji e nɔ gbɛ̀ hwe ɖokpo ɔ nu kpo Jezu kpo lɛ é tɔn. (Luki 3:1, 2) Kúnnuɖenú enɛ lɛ hun ali nú dobanúnǔtɔ́ lɛ bɔ ye gbéjé lee tan Biblu tɔn lɛ sɔgbe gbɔn é kpɔ́n.