Mawu dá gbɛtɔ́ lɛ kpo jlǒ xóɖóxámɛ tɔn kpo, amɔ̌, sunnu kpo nyɔnu kpo e wlí alɔ lɛ é kɛɖɛ wɛ ɖó acɛ enɛ. (Bǐbɛ̌mɛ 1:27, 28; Levíi ví lɛ 18:22; Nǔnywɛxó 5:18, 19) Biblu gbɛ́ nǔwalɔ xóɖóxámɛ tɔn e nɔ tíìn ɖò mɛ e ma nyí asú kpo asì kpo ǎ é tɛntin lɛ é, é na bo tlɛ nyí ɖò mɛ e kpo mɛ kpo ɖó mɛ̌ ɖokpo ɔ alǒ ɖó mɛ̌ vovo é tɛntin ɔ nɛ. (1 Kɔlɛntinu lɛ 6:18) Xó ɖiɖó xá mɛ tlɔlɔ, alɔ bliblí mɛ̌ mɛ ɖevo tɔn wu, kpo xóɖóxámɛ yonu alǒ nu mɛ tɔn kpo ɖò nǔ enɛ lɛ mɛ.

 Biblu gbɛ́ wǎn nú nǔwalɔ xó ɖiɖó xá mɛ e kpo mɛ kpo ɖó mɛ̌ ɖokpo ɔ é tɔn lɛ có, é ka na gbè ɖɔ è ni gbɛ́ wǎn nú mɛ e nɔ wà mɔ̌ lɛ é ǎ. É nyɔ́ wà ɔ, é byɔ Klisanwun lɛ ɖɔ ye ni nɔ “sí gbɛtɔ́ lɛ bǐ.”—1 Piyɛ́ɛ 2:17.

 È ka sixu jì mɛɖé kpo jlǒ xó ɖiɖó xá mɛ e kpo mɛ kpo ɖó mɛ̌ ɖokpo ɔ é tɔn kpo à?

Biblu ɖɔ nǔɖe dó è jì mɛ kpo jlǒ xó ɖó xá mɛ e kpo mɛ kpo ɖó mɛ̌ ɖokpo ɔ é tɔn kpo wu tlɔlɔ ǎ, amɔ̌, é ɖexlɛ́ ɖɔ mǐ mɛ bǐ wɛ è jì bɔ mǐ nɔ ɖó linlin ɔ bo na sɔ́ ta gbeɖiɖe Mawu tɔn lɛ. (Hlɔmanu lɛ 7:21-25) Biblu sɔ́ ayi ɖó nǔ e nɔ zɔ́n jlǒ xó ɖó xá mɛ e kpo mɛ kpo ɖó mɛ̌ ɖokpo ɔ é tɔn jí ǎ, é nyɔ́ wà ɔ, é gbɛ́ nǔwalɔ xó ɖiɖó xá mɛ e kpo mɛ kpo ɖó mɛ̌ ɖokpo ɔ é tɔn lɛ bǐ.

 È na bo tlɛ nɔ ɖó jlǒ xó ɖiɖó xá mɛ e kpo mɛ kpo ɖó mɛ̌ ɖokpo ɔ é tɔn ɔ, è sixu hɛn xomɛ Mawu tɔn hun.

Biblu ɖɔ: “Mi ma lɔn nú agbaza mitɔn ɖu ɖò mi jí ó. Mi sú kún dó nú xóɖóxámɛ agɔ ɖebǔ e sín jlǒ mi ɖó é.” (Kolosinu lɛ 3:5, Contemporary English Version) Jlǒ nyanya lɛ wɛ nɔ dɔn mɛ dó nǔ nyanya lɛ wiwa mɛ. Bo na dó sú kún dó nú jlǒ nyanya lɛ ɔ, a ɖó na nɔ ɖu ɖò linlin towe jí. Enyi a nɔ bɛ́ linlin ɖagbe lɛ gɔ́ ayi towe mɛ hwɛhwɛ ɔ, jlǒ nyanya e a ɖó lɛ é sixu yawǔ bú. (Filipunu lɛ 4:8; Jaki 1:14, 15) Nǔgbo wɛ ɖɔ é sixu vɛwǔ nú we tawun ɖò bǐbɛ̌mɛ, amɔ̌, é sixu wá bɔwǔ bǐ ɖò nukɔnmɛ. Mawu d’akpá ɖɔ emi na d’alɔ we bɔ “ayixa [towe] kpodo linlin [towe] kpo . . . na huzu bǐ kpéte.”—Efɛzinu lɛ 4:22-24.

 Mɛ ɖěɖee jló na zán gbɛ̀ sɔgbe xá nǔgbododó Biblu tɔn, bo ka ɖó jlǒ xó ɖiɖó xá mɛ e ɖó mɛ̌ ɖevo lɛ é tɔn é livi mɔkpan wɛ ɖí xwi xá wuvɛ̌ ɖokpo ɔ. Ði kpɔ́ndéwú ɔ, mɛ ɖěɖee ɖò tlɛnmɛ bo ma ka ɖó linlin alɔwliwli tɔn dìn ǎ, alǒ ye mɛ ɖěɖee wlí alɔ bɔ mɛ e ye da é ma ka ɖó nǔwukpíkpé xóɖóxámɛ tɔn ǎ lɛ é, nɔ wá gbeta ɔ kɔn bo nɔ ɖu ɖò jlǒ xóɖóxámɛ tɔn yetɔn lɛ jí, enyi mɛtɛnkpɔn xóɖóxámɛ tɔn ɖebǔ na bo kpannukɔn ye ɔ nɛ. Ye kpéwú bo ɖó awǎjijɛ ɖò gbɛzán yetɔn. Mɛ ɖěɖee nɔ ɖó jlǒ xó ɖiɖó xá mɛ e kpo ye kpo ɖó mɛ̌ ɖokpo ɔ lɛ é tɔn lɛ lɔ sixu ɖó awǎjijɛ, enyi ye jló na hɛn xomɛ Mawu tɔn hun nǔgbo nǔgbo ɔ nɛ.—Sɛ́nflínmɛ 30:19.