Ganji. Jezu ɖɔ ɖɔ “mɛ e ɖò ganji lɛ wɛ [dotóo] nú hudo ǎ; loɔ, mɛ e ɖò azɔn jɛ wɛ lɛ é wɛ nǔ tɔn hudo” dó xlɛ́ ɖɔ ahwanvu emitɔn lɛ sixu yí gbè nú nukúnkpédómɛwu dotóoxwé tɔn. (Matie 9:12) Biblu nyí dotóoxwé-wema ɖé ǎ có, nǔgbododó lɛ ɖ’emɛ bo na xlɛ́ ali mɛ ɖěɖee jló na hɛn xomɛ Mawu tɔn hun lɛ é.

Nǔ e a na kan byɔ hwiɖée lɛ é

 1. Un ka mɔ nukúnnú jɛ wlɛnwín nukúnkpédómɛwu tɔn e è xwlé mì é mɛ ganji à? Biblu ɖè wě xá mǐ ɖɔ mǐ ni nɔ ba dò nú xó e ɖó ganjɛwu lɛ é, é nyɔ́ hú ɖɔ mǐ ni “nɔ ɖi nǔ nú nǔ e è ɖɔ . . . lɛ bǐ.”—Nǔnywɛxó 14:15.

 2. Un ɖó na yì ba alixlɛ́mɛ dotóo ɖevo lɛ tɔn cobo wá gbeta ɖé kɔn wɛ à? É na nyɔ́ ɖɔ “mɛ gegě” ni “ɖè wě . . . xá mɛ,” ɖò taji ɔ, hwenu e ninɔmɛ mɛtɔn wá syɛn bǐ é.—Nǔnywɛxó 15:22.

 3. Wlɛnwín nukúnkpédómɛwu tɔn ɔ byɔ ɖɔ è ni t’afɔ gbeɖiɖe Biblu tɔn e ɖɔ ɖɔ è ni “ma . . . ɖu hun ó” é jí wɛ à?—Mɛsɛ́dó 15:20.

 4. Awovínúwiwa ɖò wlɛnwín nukúnkpédómɛwu tɔn ɔ mɛ wɛ à? Biblu gbɛ́ “majiki blobló.” (Galatinu lɛ 5:19-21) Bo na dó tuùn nú awovínúwiwa ɖ’emɛ kpo é gbɔ kpo hǔn, kan nǔ lěhun lɛ byɔ:

•   Azɔngbɔtɔ́ ɔ nɔ ɖ’alɔ ɖò awovínúwiwa mɛ wɛ à?

•   Wlɛnwín nukúnkpédómɛwu tɔn ɔ jinjɔn nǔɖiɖi e mɛ lɛ nɔ ɖó ɖɔ nǔmɛsɛn lɛ alǒ kɛntɔ́ mɛtɔn lɛ wɛ zán azě dó sɛ́ azɔn ɔ dó mɛ é jí wɛ à?

•   È savɔ̌, sà bǒgbe, fɔ yɛsu lɛ, alǒ zán nǔ ɖevo lɛ hwenu e è ɖò nǔ sɔ́ nú amasin ɔ wɛ é wɛ à? Alǒ è nɔ bló nǔ enɛ lɛ hwenu e è ɖò zinzan wɛ é wɛ à?

 5. Lanmɛ na nɔ ganji ce wá jɛ nukún mya nú mì jí zɛ xwé wu wɛ à? Biblu ɖè wě xá mɛ ɖɔ: “Mi nú mɛ lɛ bǐ ni tuùn ɖɔ mi nɔ nɔ jlɛ̌ jí.” (Filipunu lɛ 4:5, nwt) Jlɛ̌jininɔ na d’alɔ we bɔ a na sɔ́ ayi ɖó “nǔ e nyí nǔjɔnǔ hugǎn lɛ é” jí, ɖi gbigbɔ sín nǔ lɛ.—Filipunu lɛ 1:10, nwt; Matie 5:3.