Mɛɖebǔ e dó gǎn bo hu sukpɔ ɖé kpɔ́n é na ko tuùn lě dò huhu tɔn vɛwǔ sɔ́ é. Jikɛwun ɖɔhun ɔ, nùvínúví enɛ lɛ nɔ xógló gǎn e è dó, bo na wlí ye lɛ é gègě.

Nùnywɛ xwitixwitizɔ́watɔ́ lɛ mɔ ɖɔ sukpɔ alɔkpa e nɔ nyí mouche du vinaigre é nɔ kpéwú, bo nɔ lilɛ lee jɔmɛhun ahwan tɔn lɛ nɔ lilɛ gbɔn é, loɔ, blewun jɛn é ka nɔ wà mɔ̌. Mɛ̌si Michael Dickinson ɖɔ ɖɔ è jì ye tlolo ɔ jɛn “ye nɔ jɛ zinzɔn jí mɛxo yetɔn lɛ ɖɔhun. É cí ɖɔ è sɔ́ yɛyɛví ɖé dó jɔmɛhun ahwan tɔn e kunkun tɔn vɛwǔ é ɖé mɛ, b’ɛ ka tuùn lee é na kun gbɔn é ɖɔhun.”

Dobanúnǔtɔ́ lɛ yí lee sukpɔ e nɔ nyí mouche du vinaigre é nɔ zɔn gbɔn é dó kàn jí, bo mɔ ɖɔ ye nɔ xò awa yetɔn lɛ azɔn 200 ɖò segɔndu ɖokpo mɛ. Awa yetɔn xixo ɖokpo kpowun ko kpé, bonu ye na sɛ̀ tɛn, bo kpá kɛ́n nú awovinú.

Táan nabi ye ka nɔ wà mɔ̌ na? Dobanúnǔtɔ́ lɛ mɔ ɖɔ sukpɔ mɔhun lɛ sixu tɔ́n sín awě e ɖò ye na xò wɛ lɛ é mɛ, b’ɛ na yá azɔn 50 hú nukúnxwixwe gbɛtɔ́ tɔn ɖokpo. Dickinson tinmɛ ɖɔ: “Sukpɔ ɔ nɔ lɛ́n nǔ ɖò ali xwitixwiti nu tawun ɖò táan klewun ɖé mɛ, bo na dó tuùn fí e awovinú ɖé ɖè é kpo lee é na tɔ́n sín mɛ gbɔn fí ɖagbe gbɔn é kpo.”

Lee sukpɔ enɛ sín fɔn kpɛví enɛ nɔ kpé nǔ enɛ wu gbɔn é jiwǔ nú dobanúnǔtɔ́ lɛ bɔ ye jló na mɔ nǔ jɛ wu.

Etɛ a ka lin? Nǔwukpikpé e sukpɔ e nɔ nyí mouche du vinaigre é ɖó, bo nɔ huzu alogwe é ɔ, nǔkpédónǔnu wɛ à, alǒ dǎ wɛ è dá?