“Mi gbɔn mɛtɛ́nkpɔ́n ɖěbǔ mɛ zɛ éé mɛ gbɛtɔ́ nɔ gbɔn é wú ǎ. Amɔ̌, Mawu ɖo gbejí. É ná lɔn bónú mi ná gbɔn mɛtɛ́nkpɔ́n e hú gǎn mi é mɛ ǎ. Hwenu e mi ka ná ɖo mɛtɛ́nkpɔ́n mɛ é ɔ, é ná lɛ́ ɖe ali e mi ná gbɔn bo tɔ́n sín mɛ é, bónú mi ná dó sixú kpé wú bo dɛ ɖ’é nu.”—1 Kɔlɛ́ntinu lɛ́ 10:13, Biblu gbɛ yɔ̌yɔ́ ɔ tɔn.

 “Mi mɔ tɛ́nkpɔ́n ɖěbǔ zɛ éé gbɛtɔ́ nɔ mɔ é wú ǎ. Mawu nɔ gɔn akpá e é dó lɛ́ ɖe ǎ; é ná lɔn bɔ tɛ́nkpɔ́n ɖé ná wá nú mi bo hú gǎn hlɔ̌nhlɔ́n e mi ɖó é ǎ; amɔ̌ hwenu e tɛ́nkpɔ́n ná wá nú mi ɔ, é ná ná hlɔ̌nhlɔ́n mi bɔ mi ná dɛ ɖ’é nu; énɛ́ ɔ, é ná ɖe ali nú mi bɔ mi ná tɔ́n sín mɛ.”—1 Kɔlɛ́ntinu lɛ́ 10:13, MAWUXÓWÉMA.

 Wěmafɔ énɛ́ kɛ nu dó jijɔ Mawu tɔn e nɔ zɔ́n bɔ mǐ nɔ yí wǎn n’i é ɖé wú, énɛ́ wɛ nyí gbejíninɔ tɔn. Mɛsɛntɔ́ Mawu tɔn gbejínɔtɔ́ lɛ́ sixú ɖeji dó alɔdó tɔn wú, ɖo tají ɔ, hwenu e yě ɖo xwi ɖí xá tagba lɛ́ alǒ mɛtɛ́nkpɔ́n lɛ́ wɛ é.

 “Mi gbɔn mɛtɛ́nkpɔ́n ɖěbǔ mɛ zɛ éé mɛ gbɛtɔ́ nɔ gbɔn é wú ǎ.” È sixú tɛ́n mawusɛntɔ́ lɛ́ kpɔ́n nú yě ná wa nǔ e ma nyɔ́ Mawu nukúnmɛ ǎ lɛ́ é. Mɛtɛ́nkpɔ́n énɛ́ lɛ́ nɔ vɛ́ wǔ có, yě nyí nǔ yɔ̌yɔ́ ǎ, ɖó mɛ gěgé ko ɖí xwi xá kpɔ́n. a Énɛ́ wú ɔ, mawusɛntɔ́ lɛ́ sixú kú d’é jí ɖɔ émí lɔ sixú ɖí xwi xá, b’ɛ ná kpa émí.

 “Mawu ɖo gbejí.” Jexóva b Mawu ɔ, mɛ ɖejidéwú wɛ, bo lɛ́ ɖo gbejí. Hwebǐnu wɛ é nɔ ɖe akpá e é dó ɖɔ émí kún ná jó mɛ e yí wǎn nú émí, ɖo gbejí nú émí, bo nɔ se tónú nú émí lɛ́ é dó ó é. (Sɛ́nflínmɛ 7:9; Ðɛhan 9:11; 37:28) Énɛ́ wú ɔ, mɛ e nɔ sɛn ɛ lɛ́ é sixú ɖeji ɖɔ é ná ɖe akpá we e dó wǔsyɛ́n lanmɛ nú mɛ, b’ɛ dó ɖo wěmafɔ e bɔ d’é wú é mɛ lɛ́ é.

 “É ná lɔn bónú mi ná gbɔn mɛtɛ́nkpɔ́n e hú gǎn mi é mɛ ǎ.” Mawu nɔ ɖe gbejíninɔ tɔn xlɛ́ bo nɔ lɔn nú tagba lɛ́ ná syɛ́n dín bónú xwi ɖíɖí xá ná gló mɛɖé ǎ. É tuun dogbó mɛsɛntɔ́ tɔn lɛ́ bǐ tɔn.—Ðɛhan 94:14.

 “Hwenu e mi ka ná ɖo mɛtɛ́nkpɔ́n mɛ é ɔ, é ná lɛ́ ɖe ali e mi ná gbɔn bo tɔ́n sín mɛ é, bónú mi ná dó sixú kpé wú bo dɛ ɖ’é nu.” Mawu hɛn ɔ, é ná ɖe tagba ɖé síin, alǒ ná nǔ e sín hudó mɛsɛntɔ́ tɔn lɛ́ ɖó bá dɛ ɖ’é nu é yě. Ði kpɔ́ndéwú ɔ, é sixú zán gbigbɔ mímɛ́ tɔn dó xlɛ́ ali mǐ, zán Biblu dó dó gbɔ nú mǐ, alǒ gbɔn nǔɖitɔ́ hǎtɔ́ lɛ́ jí bo d’alɔ mǐ ɖo ali tawun tawun lɛ́ nu .—Jaan 14:26; 2 Kɔlɛ́ntinu lɛ́ 1:3, 4; Kolósinu lɛ́ 4:11.

 Wěmafɔ énɛ́ tɔ́n ɖo wěma e mɛsɛ́dó Pɔ́lu wlán sɛ́dó agun klisánwun tɔn e ɖo Kɔlɛ́nti é mɛ. Ðo wěmasɛ́dómɛ Pɔ́lu tɔn sín akpáxwé énɛ́ mɛ ɔ, Pɔ́lu zán tan Izlayɛ́li hwexónu tɔn ɔ tɔn dó gb’akpá nú Kɔlɛ́ntinu lɛ́. (1 Kɔlɛ́ntinu lɛ́ 10:11) Pɔ́lu slɛ́ tagba kpó mɛtɛ́nkpɔ́n kpó e Izlayɛ́li ví lɛ́ ɖí xwi xá é ɖé lɛ́, bɔ vodúnsinsɛn kpó agalilɛ kpó lɔ ɖo nǔ e é slɛ́ lɛ́ é mɛ. (1 Kɔlɛ́ntinu lɛ́ 10:6-10) Yě mɛ ɖé lɛ́ ɖu ɖo mɛtɛ́nkpɔ́n énɛ́ lɛ́ jí ǎ. Pɔ́lu zɔn dó kpɔ́ndéwú yětɔn wú, bo flín nǔ klisánwun lɛ́ ɖɔ yě kún ɖó ná ɖeji dó yěɖée wú zɛ xwé wú ó, yě ní ma lɛ́ lin ɖɔ émí kún ná j’ayǐ ɖo mɛtɛ́nkpɔ́n nukɔn gbeɖé ó ó. (1 Kɔlɛ́ntinu lɛ́ 10:12) É ɖo mɔ̌ có, é yi nukɔn bo zán xó e ɖo 1 Kɔlɛ́ntinu lɛ́ 10:13 mɛ lɛ́ é dó ná jiɖe yě. Mɛsɛntɔ́ gbejínɔtɔ́ Mawu tɔn lɛ́ nɔ kpé wú bo nɔ ɖu ɖo tagba ɖěbǔ jí.

 Kpɔ́n video kléwún élɔ́ bo ná dó mɔ nǔ tawun tawun e jí wěma 1 Kɔlɛ́ntinu lɛ́ tɔn ɖɔ xó dó lɛ́ é.