“Un ɖɔ nǔ énɛ́ nú mi, bónú mi ní dó sixú ɖó fífá gbɔn nyɛ gblamɛ. Mi ná mɔ wǔvɛ́ ɖo gbɛ ɔ mɛ, amɔ̌, mi kpankɔ́n! Un ko ɖu ɖo gbɛ ɔ jí.”—Jaan 16:33, Biblu gbɛ yɔ̌yɔ́ ɔ tɔn.

 “Un ɖɔ nǔ énɛ́ lɛ́ nú mi, bónú mi ná ɖó vivo ɖo nyɛ mɛ. Mi ná mɔ wǔvɛ́ ɖo gbɛ ɔ mɛ; loɔ, mi kpan akɔ́n, ɖó un ko ɖu ɖo gbɛ ɔ jí.”—Jaan 16:33, MAWUXÓWÉMA.

 Jezu ɖɔ xó énɛ́ lɛ́ dó ná gǎnjɛwú ahwanvú tɔn lɛ́ kpó akpakpa sɔ́ mɛ kpó ɖɔ yě lɔ sixú bló bɔ nǔ yětɔn nyɔ́ Mawu nukúnmɛ, ényí wǔvɛ́ lɛ́ kpó gbeklánxámɛ kpó ná bo ɖo fínɛ́ ɔ nɛ́.

 “Un ɖɔ nǔ énɛ́ nú mi, bónú mi ní dó sixú ɖó fífá gbɔn nyɛ a gblamɛ.” Wěmafɔ ɔ sín akpáxwé e kpo é xlɛ́ ɖɔ é kún nyí tagba hán ɖo gbɛzán mɛtɔn mɛ dó gesí wɛ fífá énɛ́ ɖe ó. É nyɔ́ wa ɔ, fífá ayi mɛ tɔn kpó taglomɛ tɔn kpó dó gesí wɛ é ɖe. È nɔ ɖó fífá ayi mɛ tɔn énɛ́ “gbɔn [Jezu] gblamɛ”; é dó akpá ɖɔ ahwanvú émítɔn lɛ́ ná mɔ gbigbɔ mímɛ́ yí. “Alɔdómɛtɔ́” agbɔ̌nnɔ énɛ́ ná zɔ́n bɔ ahwanvú Jezu tɔn lɛ́ ná ɖu ɖo tagba ɖěbǔ jí.—Jaan 14:16, 26, 27.

 “Mi ná mɔ wǔvɛ́ ɖo gbɛ ɔ mɛ, amɔ̌, mi kpankɔ́n!” Jezu ɖɔ nyi wɛn ɖɔ ahwanvú émítɔn lɛ́ ná mɔ wǔvɛ́ lɛ́, ɖi nǔagɔwaxámɛ kpó yadónúmɛ kpó. (Matíe 24:9; 2 Timɔtée 3:12) É ɖo mɔ̌ có, yě ɖó hwɛjijɔ e wú yě ná “kpankɔ́n” é.—Jaan 16:33.

 “Un ko ɖu ɖo gbɛ ɔ jí.” Ðo fí ɔ, xókwín “gbɛ” ɔ nɔ dó gesí nǔagɔwatɔ́ ɖěɖěe jɛ zɔ nú Mawu lɛ́ é. b Nǔ e 1 Jaan 5:19 ɖɔ é ɖíe: “Gbɛ ɔ bǐ ɖo mɛ nyanya ɔ [alǒ Satáan] sín acɛ mɛ.” Énɛ́ wɛ zɔ́n bɔ mɛ e ɖo “gbɛ” énɛ́ mɛ lɛ́ é nɔ lin nǔ, alǒ wa nǔ sɔgbe xá jlǒ Mawu tɔn ǎ.—1 Jaan 2:15-17.

 Satáan kpó gbɛ tɔn kpó tɛ́n kpɔ́n bo ná sú ali dó Jezu bónú é ná gɔn jlǒ Mawu tɔn wa, káká jɛ nǔ kplɔ́nkplɔ́n mɛ lɛ́ dó Mawu wú kpó gbɛ maɖóblɔ̌ tɔn sísɔ́ dó sá vɔ̌ kpó jí. (Matíe 20:28; Luki 4:13; Jaan 18:37) Amɔ̌, Jezu lɔn bónú gbɛ ɔ wa nǔ dó linlin tɔn wú, bo lɛ́ kɔ n’i sín Mawu gúdo ǎ. É nɔ gbejí káká jɛ kú. Énɛ́ wɛ zɔ́n bɔ Jezu ɖɔ ɖɔ émí ko ɖu ɖo gbɛ ɔ jí, bɔ Satáan e nyí “axɔ́sú gbɛ ɔ tɔn” é kún ɖó “acɛ ɖě” dó émí jí ó.—Jaan 14:30.

 Jezu zán kpɔ́ndéwú éɖésúnɔ tɔn dó xlɛ́ ahwanvú tɔn lɛ́ ɖɔ yě lɔ sixú nɔ gbejí nú Mawu, ényí gbejíninɔ yětɔn ná bo tlɛ gbɔn tɛ́nkpɔ́n mɛ ɔ nɛ́. Nǔgbó ɔ, Jezu ɖo ɖiɖɔ wɛ ɖɔ: “Ényí un kpé wú bo ɖu ɖo gbɛ ɔ jí hǔn, mi lɔ sixú wa mɔ̌.”

 Jezu ɖɔ xó énɛ́ lɛ́ ɖo zǎn e jɛ nukɔn nú kú tɔn é mɛ. Ðó Jezu tuun ɖɔ émí ná kú zaanɖé din wútu ɔ, é gbɔn yɛkan énɛ́ mɛ bo ɖe wě gǔdo tɔn ɖé lɛ́ xá mɛsɛ́dó tɔn gbejínɔtɔ́ lɛ́. É ɖɔ nǔgbó tají élɔ́ lɛ́ e zɔ́n tamɛ lin mɛ é d’é mɛ: Yě sɔ́ ná mɔ ɛ ɖě ǎ, è ná dó ya nú yě, bo tlɛ ná hu yě. (Jaan 15:20; 16:2, 10) Ðó xó énɛ́ sixú dó xɛsi mɛsɛ́dó Jezu tɔn lɛ́ wútu ɔ, Jezu ɖɔ tasúnáxó e ɖo Jaan 16:33 mɛ é dó dó wǔsyɛ́n lanmɛ nú yě bo lɛ́ vɔ́ jiɖe ná yě.

 Mɔ̌ ɖokpó ɔ, xó Jezu tɔn lɛ́ kpó kpɔ́ndéwú tɔn kpó sixú dó wǔsyɛ́n lanmɛ nú ahwanvú tɔn lɛ́ ɖo égbé. Klisánwun lɛ́ bǐ sixú nɔ gbejí nú Mawu, ényí yadónúmɛ ná bo ɖo fínɛ́ ɔ nɛ́.