“Sɔ́ nǔ ɖěbǔ e a nɔ wa é dó alɔ mɛ nú Jexóva, énɛ́ ɔ, tuto towe lɛ́ ná yi ta.”—Nǔnywɛ́xó 16:3, Biblu gbɛ yɔ̌yɔ́ ɔ tɔn.

 “Sɔ́ azɔ̌ towe dó alɔ mɛ nú MAWU MAVƆMAVƆ, énɛ́ ɔ, nǔ e lin ná wa wɛ a ɖe lɛ́ ná jɛ nu.”—Nǔnywɛ́xó 16:3, Mawuxówéma.

 Nǔnywɛ́xó élɔ́ ná gǎnjɛwú mɛ e nɔ sɛn Mawu nǔgbó ɔ lɛ́ é ɖɔ ényí yě ɖeji dó wǔ tɔn, nɔ ba wěɖexámɛ tɔn lɛ́ bo nɔ zán ɔ, tuto yětɔn lɛ́ ná nɔ yi ta.

 “Sɔ́ nǔ ɖěbǔ e a nɔ wa é dó alɔ mɛ nú Jexóva.” Cóbónú mɛsɛntɔ́ Jexóva a tɔn lɛ́ ná wá gbeta lɛ́ kɔn ɔ, yě nɔ sɔ́ yěɖée hwe bo nɔ ba wěɖexámɛ tɔn lɛ́. (Jaki 1:5) Aniwú? Hwɛjijɔ ɖokpó wɛ nyí ɖɔ hwɛhwɛ ɔ, nǔ e nɔ xá gbɛtɔ́ lɛ́ ɖo gbɛ mɛ é ɔ, acɛ kpɛɖé jɛ́n yě nɔ ɖó dó yě jí alǒ tlɛ nɔ ɖó ɖěbǔ ǎ. (Nǔnywɛ́tɔ́xó 9:11; Jaki 4:13-15) Gɔ́ ná ɔ, nǔnywɛ́ e sín hudó yě ɖó bo ná ba nǔ e yě ɖó ná wa é sixú hwedó yě. Ðó hwɛjijɔ énɛ́ lɛ́ wú ɔ, mɛ gěgé nɔ wa nǔnywɛ́nú bo nɔ sɔ́ nǔ e yě ba ná wa é dó alɔ mɛ nú Mawu, alǒ nɔ gán jɛ wǔ tɔn. Yě nɔ wa mɔ̌ gbɔn ɖɛxixo sɛ́dó è bo byɔ́ ɛ ɖɔ é ní xlɛ́ ali émí, kpó nǔwiwa sɔgbe xá jlǒ tɔn e è ɖe xlɛ́ ɖo Xó tɔn Biblu e è wlán é mɛ é gblamɛ.—Nǔnywɛ́xó 3:5, 6; 2 Timɔtée 3:16, 17.

 Nukɛgbe “sɔ́ azɔ̌ towe dó alɔ mɛ nú MAWU MAVƆMAVƆ b” ɔ sín tínmɛ blǔju tɔn wɛ nyí “sɔ́ azɔ̌ towe lɛ́ xwlé MAWU MAVƆMAVƆ.” Sɔgbe xá alɔdlɛ́ndónǔ ɖé ɔ, xógbe énɛ́ ɖo gesí dó “nya e zlɔ́n agban e ɖo kpinkpɛn ɛ wɛ é ɖé dó mɛ ɖěvo e ɖó hlɔ̌nhlɔ́n hú i, bo ɖo gbesisɔmɛ hú gǎn bá hɛn é ɖé jí wɛ.” Mɛ ɖěɖěe nɔ sɔ́ yěɖée hwe bo nɔ gán jɛ Mawu wú lɛ́ é sixú kú d’é jí ɖɔ é ná d’alɔ émí bo lɛ́ nɔ gǔdo nú émí.—Ðɛhan 37:5; 55:23.

 Xógbe “nǔ ɖěbǔ e a nɔ wa é” ɖo xlɛ́xlɛ́ wɛ ɖɔ Mawu ná yí gbe nú tuto ɖěbǔ e gbɛtɔ́ lɛ́ sixú ko bló é, bo kɔn nyɔ̌ná d’é jí ǎ. Tuto yětɔn lɛ́ ɖó ná sɔgbe xá nǔgbódodó kpó jlǒ kpó Jexóva tɔn lɛ́ hwɛ̌, cóbɔ yě ná sixú ɖó nukún nyɔ̌ná tɔn. (Ðɛhan 127:1; 1 Jaan 5:14) Mawu nɔ kɔn nyɔ̌ná dó tónúmase jí ǎ. Nǔgbó ɔ, “é nɔ gba tito mɛdídá tɔn lɛ́.” (Ðɛhan 146:9) Ðo hwe ɖokpó ɔ nu ɔ, é nɔ nɔ gǔdo nú mɛ ɖěɖěe nɔ hwíhwɛ́ yěɖée dó glɔ̌ tɔn gbɔn nǔgbódodó tɔn e ɖo Biblu mɛ lɛ́ é xwixwedó gblamɛ lɛ́ é.—Ðɛhan 37:23.

 “Énɛ́ ɔ, tuto towe lɛ́ ná yi ta.” Mɛɖé lɛ́ tínmɛ xógbe énɛ́ bo ɖɔ “tuto towe lɛ́ ná jɛnu.” Ðo Nǔwlánwlán Ebléegbe tɔn lɛ́ alǒ nǔ e mɛ lɛ́ nɔ ylɔ́ ɖo kpaa mɛ ɖɔ Alɛnuwéma xóxó ɔ é mɛ ɔ, xókwín e è tínmɛ dó Fɔngbe mɛ bo ɖɔ “jɛnu” é nɔ dlɛ́n alɔ dó nǔ e è dó do, bɔ hwɛhwɛ ɔ, é nɔ dó gesí nǔɖíɖó Mawu tɔn lɛ́ é. (Nǔnywɛ́xó 3:19; Jelemíi 10:12) Mɔ̌ ɖokpó ɔ, Mawu ná bló bɔ tuto mɛ ɖěɖěe nɔ wa nǔ jlɔ́jlɔ́ ɖo nukún tɔn mɛ lɛ́ é tɔn ná jɛnu, bo nɔ d’alɔ yě bɔ yě nɔ zán gbɛ ɖo ayijayǐ mɛ, bo nɔ ɖó awǎjijɛ.—Ðɛhan 20:5; Nǔnywɛ́xó 12:3.

 Axɔ́sú Salomɔ́ɔ e wlán gěgé nǔ e ɖo wěma Nǔnywɛ́xó tɔn mɛ lɛ́ é tɔn é wɛ wlán Nǔnywɛ́xó élɔ́. Mawu ná ɛ nǔnywɛ́ wútu wɛ é kpé wú bo ɖɔ nǔnywɛ́xó afatɔ́n mɔ̌kpán.—1 Axɔ́sú lɛ́ 5:9, 12; 10:23, 24.

 Ðo wěmata 16gɔ́ ɔ mɛ ɔ, Salomɔ́ɔ jɛ nǔnywɛ́ Mawu tɔn sɔ́ su jí bo nɔ ɖe lě do É gbɛ́ wǎn nú mɛ ɖěɖěe nɔ yí go lɛ́ é sɔ é xlɛ́. (Nǔnywɛ́xó 16:1-5) Énɛ́ gúdo ɔ, wěmata ɔ d’alɔ nǔxatɔ́ ɔ bɔ é mɔ nǔ jɛ nǔgbó tají ɖé wú ɖo wěma Nǔnywɛ́xó tɔn mɛ: Ényí gbɛtɔ́ lɛ́ nɔ sɔ́ yěɖée hwe, bo nɔ jó yěɖée dó bɔ Mawu nɔ xlɛ́ ali yě ɔ jɛ́n yě ná kpé wú bo nyɔ́nǔi nǔgbó nǔgbó, bɔ gbɛ yětɔn ná lɛ́ ɖó nu. (Nǔnywɛ́xó 16:3, 6-8, 18-23) Hwɛhwɛ wɛ nǔgbó tají énɛ́ tɔ́n ɖo Biblu mɛ.—Ðɛhan 1:1-3; Ezayíi 26:3; Jelemíi 17:7, 8; 1 Jaan 3:22.

 Kpɔ́n video kléwún élɔ́ bo ná dó mɔ nǔ tawun tawun e jí wěma Nǔnywɛ́xó tɔn ɖɔ xó dó lɛ́ é.