Vǐ towe ɖo glɔ̌nglɔ́n ɖo xwégbe, bó ɖó nǔɖé ná wa ǎ wɛ a? É ɖɔ: “Xwíí ninɔ ci mì!” Cóbónú a ná tá telée ɔ, alǒ ɖɔ n’i ɖɔ é ní da ayihún video jí tɔn e é yí wǎn ná hú gǎn é hǔn, gbějé nǔ kléwún kléwún élɔ́ lɛ́ kpɔ́n.

•   Bǎ e mɛ ayihúndida ɔ yi é kpó alɔkpa e wɛ é kpó sixú zɔ́n bɔ tagba ɔ syɛ́n d’é jí. Tɔ́ ɖé nɔ nyí Robert bó ɖɔ: “Nú vǐ ɖé lɛ́ ɔ, ényí è sɔ́ gbɛzínzán gbe bǐ gbe tɔn jlɛ́ dó télée kpínkpɔ́n kpó ayihúndida video jí tɔn kpó wú ɔ, é cí nǔ e nɔ ci mɛ lɛ́ é ɖɔhun. Azɔ̌ kpaa lɛ́ nɔ sɔ́ akpakpa mɛ ǎ kpowun.”

   Asi tɔn Barbara, lɔ yí xó n’i. É ɖɔ: “Gbɛ nǔgbó nǔgbó ɔ nɔ byɔ́ ɖɔ è ní lin tamɛ bó lɛ́ dó gǎn, bɔ hwɛhwɛ ɔ, é nɔ yá wǔ ná nu ǎ. Énɛ́ nɔ ci vǐ e nɔ zán hwenu gěgé nú telée kpínkpɔ́n kpó ayihúndida video jí tɔn kpó lɛ́ é.”

•   Hwenu gěgé zínzán ɖo tɛn Ɛntɛnɛ́ti tɔn e jí è nɔ zun xɔ́ntɔn ɖe é jí sixú zɔ́n bɔ a ná ɖó linlin agɔ dó hwiɖée wú. Ényí mɛ wínnyáwínnyá lɛ́ nɔ kpɔ́n nǔ vovo e xɔ́ntɔn yětɔn lɛ́ nɔ wa lɛ́ é ɔ, é sixú zɔ́n bɔ gbɛzán yěɖésúnɔ tɔn ná cí nǔ e ma dɔn mɛ ǎ é ɖɔhun nú yě. Nyɔ̌nuví ɖé nɔ nyí Beth bó ɖɔ: “É bɔwǔ tawun ɖɔ è ní lin nǔ gbɔn lě: ‘Mɛ ɖě lɛ́ bǐ nɔ ɖo ayihún da wɛ, nyɛ ka cí xwégbe.”

   Gɔ́ ná ɔ, ényí mɛɖé zán ganxixo gěgé ɖo tɛn Ɛntɛnɛ́ti tɔn e jí è nɔ zun xɔ́ntɔn ɖe é jí ɔ, é sixú zɔ́n bɔ é cí gbɛɛn, bɔ xwíí ninɔ ná lɛ́ kpo ɖo cici i wɛ. Dɔ̌nkpɛvú ɖé nɔ nyí Chris bó ɖɔ: “É sixú hɛn alɔnu towe ján, amɔ̌, hwenu a ná fó é ɔ, a ná sixú ɖɔ nǔ lě wɛ émí wa ǎ.”

•   Xwíí ninɔ e ci vǐ towe é sixú nyí ali ɖagbe ɖé bó hun n’i. Nɔ ɖé nɔ nyí Katherine bó ɖɔ ɖɔ ényí xwíí ninɔ ci vǐ ɖé ɔ, é nɔ hun ali n’i bónú é ná lin tamɛ bó dó nǔ wá. Ði kpɔ́ndéwú ɔ, é ɖɔ: “Gbǎví kléwún ɖé nɔ húzú nǔsɛxwetɛn, mɔ̌to, tɔjíhún, alǒ jɔmɛhún. Avɔ e è cyɔ́n dó nǔ é ɖé sixú húzú goxɔ ɖé.”

   É sɔgbe tawun ɖɔ akɔwé Sherry Turkle ní tínmɛ ci e xwíí ninɔ nɔ ci mɛ é gbɔn lě: “Ali e hun nú mɛ bɔ è ná dó nǔ wá é ɖé wɛ.” a Hǔn, ci e xwíí ninɔ nɔ ci mɛ é nyí nǔɖé bɔ è ná nyi alɔ ná ɖěbǔ ɖěbǔ ǎ. Nǔgbó ɔ, wěma Disconnected ɖɔ: “Ci e xwíí ninɔ nɔ ci mɛ é ɔ, lěe nǔ kpinkpɛn sísɔ́ dó jǐ nɔ ná hlɔ̌nhlɔ́n adǎn towe lɛ́ gbɔn é ɖɔhun wɛ é cí nú taglomɛ towe.”

 Nǔ tají ɔ: Ma kpɔ́n xwíí ninɔ e ci vǐ towe lɛ́ é dó mɔ tagba ɖé ó, loɔ, kpɔ́n dó mɔ ali ɖagbe e hun bɔ a ná d’alɔ yě bɔ yě ná dó nǔ wá é ɖé.

•   Ényí ninɔmɛ lɛ́ yí gbe ná hǔn, jǒ vǐ towe lɛ́ dó bónú yě ní da ayihún ɖo kɔ́xota. Barbara, éé xó mǐ ɖɔ ɖo bǐbɛ́mɛ é ɖɔ: “Lěe wěziza hwesivɔ́ tɔn kpó jɔhɔn fífá kpó sixú nya ci e xwíí ninɔ ci mɛ é dó gbě gbɔn é jí wǔ tawun. Ényí vǐ mǐtɔn lɛ́ jɛ ayihún da jí ɖo kɔ́xota ɔ, tlóló ɔ, yě nɔ jɛ nǔwúkpíkpé tamɛ linlin tɔn yětɔn lɛ́ zán jí hú gǎn!”

   Nǔgbódodó Biblu tɔn: ‘Nǔ bǐ wɛ ɖó hwenu. Hwenu e è ná ko nǔ dó é ɖe, bɔ hwenu e è ná lɔ́n dó é ɖe.’—Nǔnywɛ́tɔ́xó 3:1, 4, nwt, tinmɛ e ɖo do é.

   Lin tamɛ d’é wú: Ali tɛ́ lɛ́ un ka sixú hun nú vǐ ce lɛ́ bónú hwɛhwɛ ɔ, yě ná nɔ da ayihún ɖo kɔ́xota hú gǎn? Ényí ayihúndida ɖo kɔ́xota ma sixú nyɔ́ bló ǎ ɔ, ayihún nǔ dídó wá tɔn tɛ́ lɛ́ ka tíin bɔ yě sixú da ɖo xɔ mɛ?

•   D’alɔ vǐ towe lɛ́ bónú yě ní lin mɛ ɖěvo lɛ́ kpɔ́n. Nɔ ɖé nɔ nyí Lillian bó ɖě wě élɔ́ xá mɛ: “Yě ní xwa zunkan nú xɔ́ntɔn mɛxómɔ lɛ́, alǒ cyán ama nú yě, kabǐ ɖa nǔɖé nú yě, bó lɛ́ jlá gbe dó yě. Nǔ wiwa nú mɛ ɖěvo lɛ́ nɔ hɛn awǎjijɛ wá nú mɛ tawun.”

   Nǔgbódodó Biblu tɔn: “Mɛ e nɔ ná nǔ mɛ ɔ, è ná ná nǔ i bɔ é ná sukpɔ́; mɛ e nɔ ná sin mɛ ɔ, è ná ná é lɔmɔ̌, bɔ é ná nu bó ɖi kɔ.”—Nǔnywɛ́xó 11:25.

   Lin tamɛ d’é wú: Nɛ̌ a ka sixú d’alɔ vǐ towe lɛ́ bɔ yě ná mɔ awǎjijɛ e ɖo nǔ wiwa nú mɛ ɖěvo lɛ́ mɛ é gbɔn?

•   Sɔ́ kpɔ́ndéwú ɔ ɖ’ayǐ. Lěe a nɔ ɖɔ xó dó azɔ̌ gbe bǐ gbe tɔn towe lɛ́ wú gbɔn é sixú wa ɖagbe alǒ nyanya nú vǐ towe lɛ́. Nɔ ɖé nɔ nyí Sarah bó ɖɔ: “Ényí mǐ bló nǔ cí nǔ ɖɔ gbɛzán mǐtɔn kún dɔn mɛ ó ɖɔhun ɔ, kplɔ́nkplɔ́n vǐ mǐtɔn lɛ́ wɛ mǐ ɖe ɖɔ nǔ ní nɔ ci yě nɛ́. Amɔ̌, ényí mǐ nɔ ɖɔ xó ɖo ali ɖé nu, bɔ é nɔ ɖe xlɛ́ ɖɔ mǐ nɔ ɖu azɔ̌ mǐtɔn gbe bǐ gbe tɔn lɛ́ sín vǐví ɔ, é ná d’alɔ vǐ mǐtɔn lɛ́ bɔ yě ná wa nǔ ɖokpó ɔ.”

   Nǔgbódodó Biblu tɔn: “Azǎn lɛ́ bǐ wɛ nɔ nyí nyanya nú mɛ e dó ya ná wɛ è ɖe é; amɔ̌, mɛ e awǎjijɛ gɔ́ ayi mɛ ná é nɔ ɖo agɔ̌ ɖu wɛ hwebǐnu.”—Nǔnywɛ́xó 15:15, nwt.

   Lin tamɛ d’é wú: Nɛ̌ un ka nɔ ɖo xó ɖɔ dó azɔ̌ ce gbe bǐ gbe tɔn lɛ́ wú gbɔn wɛ bɔ vǐ ce lɛ́ nɔ se? Nɛ̌ yě ka nɔ mɔ mì bɔ un nɔ wa nǔ gbɔn hwenu e xwíí ninɔ ci mì é?

 Wěɖexámɛ: “D’alɔ vǐ towe lɛ́ bónú yě ní slɛ́ azɔ̌ nǔ dídó wá tɔn lɛ́ ɖěbɔdóɖěwú. Nɔ ɖé nɔ nyí Allison bó ɖɔ: “Mǐ ɖó gbǎví wěɖexámɛ tɔn ɖé, bɔ mɛ e ɖo xwédo ɔ mɛ lɛ́ é bǐ sixú wlán linlin yětɔn lɛ́ dó wěma jí, bó sɔ́ d’é mɛ.”