Nǔníná ɖagbe ɖagbe ɖé wɛ nǔxixo nyí bó gosín Jehovah gɔ́n. Yě sixú wa ɖagbe nú linlin mǐtɔn lɛ́, dó wǔyá lanmɛ nú mǐ, bó lɛ́ dó akpakpa lanmɛ nú mǐ. É ɖo wɛn ɖɔ mɔ̌ wɛ é ɖe gbɔn nú han bǔnɔ mǐtɔn lɛ́. È ná ɖɔ ɔ, han énɛ́ lɛ́ tlɛ sixú wa nǔ hú mɔ̌: yě sixú dɔn mǐ sɛkpɔ́ Jehovah.

 Sín 2014 ɔ, han bǔnɔ 70 jɛjí wɛ mǐ ko ɖe tɔ́n, bɔ ényí é hwe bǐ ɔ, ɖokpó ɖo han énɛ́ lɛ́ mɛ bó ɖo gbe 500 jɛjí mɛ din! Amɔ̌, a sixú ko nɔ kanbyɔ́ hwiɖée ɖɔ: ‘Mɛ̌ mɛ̌ e ka nɔ wa han énɛ́ lɛ́ sín azɔ̌? Azɔ̌ tɛ́ lɛ́ è ka nɔ wa bó nɔ ɖe yě han énɛ́ lɛ́ tɔ́n?’

 Gbɛ̌ta hanjiji tɔn e nɔ w’azɔ̌ ɖó kpɔ́ xá Azɔ̌xɔsá xóyídókanjí kpó video kpó tɔn é wɛ nɔ ɖe han bǔnɔ lɛ́ tɔ́n. Azɔ̌xɔsá énɛ́ nɔ w’azɔ̌ ɖo alixlɛ́mɛ Wěɖegbɛ́ mɛkplɔ́nkplɔ́n tɔn Hǎgbɛ́ alixlɛ́mɛtɔ́ ɔ tɔn glɔ́. Nɔví súnnu kpó nɔví nyɔ̌nu kpó 13 wɛ ɖo gbɛ̌ta hanjiji tɔn ɔ mɛ, bó nɔ d’alɔ ɖo han lɛ́ wlánwlán, yě jíjláɖó, tito bíbló nú nǔ kpó azɔ̌ ɖěvo e ɖo dandan lɛ́ é wiwa kpó mɛ. Gɔ́ ná ɔ, Wěɖegbɛ́ mɛkplɔ́nkplɔ́n tɔn ko yí gbe bɔ è nɔ zán mɛɖéezéjótɔ́ e nɔ w’azɔ̌ sín zɔ gbɔn gbɛ ɔ bǐ mɛ lɛ́ é, bɔ yě ná nɔ ɖ’alɔ ɖo azɔ̌ énɛ́ mɛ bɔ hanwlántɔ́ lɛ́ kpó hanjitɔ́ lɛ́ kpó ɖo yě mɛ. Nɔví súnnu kpó nɔví nyɔ̌nu kpó énɛ́ lɛ́ nɔ zán nǔwúkpíkpé yětɔn lɛ́ kpó mɛɖéesɔ́hwe kpó, bó tlɛ nɔ ba ɖɔ è ní sɔ́ yě su ɖó azɔ̌ yětɔn wú ǎ.

 Nɛ̌ è ka nɔ ɖe han bǔnɔ ɖé tɔ́n gbɔn? Jɛ nukɔn hwɛ̌ ɔ, Wěɖegbɛ́ mɛkplɔ́nkplɔ́n tɔn nɔ wá gbeta wěmafɔ Biblu tɔn e jí han ɔ ná jínjɔ́n é kpó lěe nǔ ɖó ná cí nú mɛ e ná ɖótó lɛ́ é é kpó tɔn kɔn. Énɛ́ gúdo ɔ, gbɛ̌ta hanjiji tɔn ɔ nɔ ɖe azɔ̌ nú mɛ lɛ́ bɔ yě nɔ sɔ́ nǔ nú nǔxixo ɔ, bó nɔ wlán han ɔ. È nɔ sɔ́ nǔ nú han sín kpɔ́ndéwú ɖé. Wěɖegbɛ́ mɛkplɔ́nkplɔ́n tɔn nɔ ɖótó han sín kpɔ́ndéwú ɔ, bó nɔ ná alixlɛ́mɛ ɖěvo lɛ́ d’é wú. Énɛ́ gúdo ɔ, gbɛ̌ta hanjiji tɔn ɔ nɔ jlá nǔ lɛ́ ɖó ɖo han ɔ wú, bó nɔ yí gǔdo tɔn ɔ dó kan jí. È nɔ yí han énɛ́ lɛ́ dó kan jí ɖo fí vovo lɛ́; alaxɔ lɛ́ kpó xwé e gbe è ɖó mɔ xóyídókanjí tɔn lɛ́ ɖe lɛ́ é kpó ɖo fí énɛ́ lɛ́ mɛ.

 Bó ná dó kpa wlán han bǔnɔ lɛ́, bó lɛ́ yí yě dó kan jí ɔ, nɔví mǐtɔn lɛ́ nɔ zán tuto ɔdinatɛ́ɛ jí tɔn alɔkpa vovo lɛ́. Azɔ̌ ɔ nɔ lɛ́ byɔ́ ɖɔ è ní zán nǔxonú lɛ́, table de mixage lɛ́, mɔ gbezéyiaga tɔn lɛ́, bǎfu lɛ́, kpó miklo lɛ́ kpó. Miklo lɛ́ ɖokpó sín akwɛ́ sixú bɛ́sín ɖɔ̌la Amɛlíka tɔn 100 jɛ 1 000 jɛjí. Ðo 2020 ɔ, ɖɔ̌la Amɛlíka tɔn 116 000 wɛ mǐ zán dó nǔxonú lɛ́ takúnmɛ.

 Gǎn tɛ́ lɛ́ mǐ ka nɔ dó bó ma nɔ hɛn akwɛ́ gú ǎ? Mǐ ɖó gbɛ̌ta hanjiji tɔn ɖaxó ɖé ɖo Betɛ́li ǎ, é nyɔ́ wa ɔ, jlǒɖótɔ́ éé nɔ w’azɔ̌ sín zɔ lɛ́ é wɛ mǐ nɔ zán. Gɔ́ ná ɔ, gbɛ̌ta nǔxotɔ́ lɛ́ tɔn e mɛ gbɛtɔ́ nɔ sukpɔ́ ɖe, bɔ yě nɔ wá xo nǔ bɔ è nɔ yí dó kan jí é ɖé wɛ mǐ ɖó ǎ, é nyɔ́ wa ɔ, hwɛhwɛ ɔ, nɔví mǐtɔn lɛ́ nɔ zán tuto ɔdinatɛ́ɛ jí tɔn ɖé dó ɖe asánhún nǔxixo vovo lɛ́ tɔn tɔ́n.

 Nɔví súnnu lɛ́ kpó nɔví nyɔ̌nu lɛ́ kpó yí wǎn nú han bǔnɔ lɛ́ sise. Tara e nɔ nɔ Allemagne é ɖɔ: “Han énɛ́ lɛ́ nɔ d’alɔ mì bɔ un nɔ mɔ nyiɖée mɛ hwenu e un ɖo linkpɔ́n mɛ é. Ényí un ɖo sise wɛ ɖo anɔ̌nugbe ce mɛ ɔ, é nɔ cí ɖɔ Jehovah wɛ zunfán mì ɖɔhun.” Nɔví súnnu ɖé nɔ nyí Dmitry ɖo Kazakhstan bó ɖɔ: “Un nɔ ɖótó han énɛ́ lɛ́, bɔ é ka nɔ byɔ́ ɖɔ má xo nǔ kpɔ́n ɖɔ yě ka ná sɔgbe xá nǔgbódodó Biblu tɔn lɛ́ alǒ gbɔ a jí ǎ; énɛ́ nɔ víví nú mì tawun. Gɔ́ ná ɔ, han lɛ́ nɔ d’alɔ mì bɔ un nɔ sɔ́ ayi ɖó kancícá e ɖo nyi kpó Jehovah kpó tɛ́ntin é jí.”

 Delia nɔ nɔ Afrique du Sud, bó tínmɛ lěe nǔ nɔ cí n’i dó han bǔnɔ lɛ́ wú é, bó ɖɔ: “Han énɛ́ lɛ́ nɔ ná hlɔ̌nhlɔ́n nǔɖiɖi ce. Ényí wǔ kú mì alǒ un ɖo ninɔmɛ vɛ́ wǔ ɖé mɛ gbɔn wɛ ɔ, han ɖé nɔ ɖo fínɛ́, bó nɔ sɔgbe xá ninɔmɛ ce pɛ́ɛ jɛ́n wɛ. Hwɛhwɛ ɔ, nǔ e ɖɔ wɛ nǔxixo ɔ ɖe é kɛ́ɖɛ́ ko nɔ kpé, bɔ un nɔ mɔ nyiɖée mɛ!”

 Han bǔnɔ ɖé lɛ́ ko húzú ɖěɖěe mɛ lɛ́ yí wǎn ná hú gǎn é. Lerato lɔ nɔ nɔ Afrique du Sud, é ɖɔ: “Han ‘Ðo malínmálín mɛ’ kpó ‘Gbɛ yɔ̌yɔ́ ɔ’ kpó nɔ d’alɔ mì bɔ un nɔ mɔ nyiɖée sɛ́dó ɖo hwenu e un ná dó kúabɔ nú nɔ vívɛ́ná ce é. Ényí un ɖótó han énɛ́ lɛ́ hweɖébǔnu ɔ, un nɔ mɔ ɛ ɖo wezun jí ja gɔ̌n ce zunzunfán mì gbé.”

 Han bǔnɔ ɖokpó d’alɔ ɖyɔ̌vǐ e nɔ nɔ Sri Lanka é ɖé tawun. É ɖɔ: “Mɛ̌si ce e nɔ kplɔ́n nǔ mǐ ɖo nǔnywɛ́ xwítíxwítí kpáxwé é dó gbe vɛ́ sin nú mì ɖo wěmaxɔmɛví ɖě lɛ́ bǐ nukúnmɛ ɖó un nyí Kúnnuɖetɔ́ Jehovah tɔn wútu. Ado jɛ huhu mì jí, bɔ un sɔ́ tuun nǔ e un ná ɖɔ é ǎ. Ée un wá xwégbe é ɔ, mamáa ce dó wǔsyɛ́n lanmɛ nú mì ɖɔ nyi ní ɖótó han ‘Nupinplọn Nọ Namẹ Huhlọn’ ɔ. Han ɔ d’alɔ mì bɔ un mɔ ɖɔ é byɔ́ ɖɔ má ba do nú nǔ bó lɛ́ sɔ́ nǔ nú xósin ɖé. Ðo azǎn e bɔ d’é wú é jí ɔ, un ɖɔ xó xá mɛ̌si ce. É ɖótó mì, bó ɖɔ ɖɔ émí mɔ nǔ jɛ nǔɖiɖi Kúnnuɖetɔ́ Jehovah tɔn lɛ́ tɔn mɛ din hú gǎn. Un do kú nú tutoblónúnǔ Jehovah tɔn ɖɔ é nɔ ná mǐ han mɔ̌hun, éé nɔ dó wǔsyɛ́n lanmɛ nú mɛ lɛ́ é.”

 Nɛ̌ mǐ ka nɔ mɔ akwɛ́ e han lɛ́ ɖiɖetɔ́n nɔ ɖu é gbɔn? Akwɛ́ ɖěɖěe è nɔ ná dó nɔ gǔdo nú azɔ̌ e mǐ nɔ wa gbɔn gbɛ ɔ bǐ mɛ lɛ́ é wɛ, bɔ gěgé nɔ nyí gbɔn wlɛnwín e è tínmɛ ɖo donate.pr418.com jí lɛ́ é gblamɛ. É ná cɛ nú mi nú alɔhundónánǔmɛ mitɔn.