Kúnnuɖetɔ́ Jehovah tɔn lɛ nɔ w’azɔ̌ taji ɖé dó d’alɔ mɛ e ɖò tò 200 jɛji mɛ lɛ é. Tò 35 kpowun jɛn ɖò tò enɛ lɛ mɛ bɔ nǔnina e ye nɔ mɔ ɖò xá yetɔn mɛ lɛ é nɔ kpé ye, lobɔ ye nɔ zán dó sú hudo yetɔn lɛ sín dò ɖò akwɛzinzan linu. Nɛ̌ tò ɖěɖee ma nɔ mɔ akwɛ kaka ɖé ǎ lɛ é ka nɔ sú hudo yetɔn lɛ sín dò ɖò akwɛzinzan linu gbɔn?

 Hagbɛ̌ Alixlɛ́mɛtɔ́ ɔ nɔ gbéjé nǔ ɖěɖee nɔ hudo Kúnnuɖetɔ́ Jehovah tɔn e gbɔn gbɛ̀ ɔ bǐ mɛ, bonu ye na dó sɛn Jehovah lobo lɛ́ ɖekúnnu é kpɔ́n. È nɔ bló tuto lee è na nɔ zán akwɛ lɛ gbɔn é tɔn ganji, bo nɔ zán ye ɖò ali ɖagbe nu. Enyi alaxɔ ɖé mɔ akwɛ e é na zán dó kpé nukún dó azɔ̌ lɛ wu ɖò xá tɔn mɛ é bonu é kpò ɖ’eji ɔ, é nɔ sɛ́ kpoɖeji ɔ dó tò ɖěɖee ma ɖó akwɛ kaka ɖé ǎ lɛ é. Wlɛnwín enɛ sɔgbe xá lee Klisanwun bǐbɛ̌mɛ tɔn lɛ nɔ wà nǔ gbɔn é. Ye nɔ d’alɔ yeɖée bonu ye bǐ “na nɔ zɛ̌nzɛ̌n.” (2 Kɔlɛntinu lɛ 8:14) Ye nɔ zán kpoɖeji akwɛ yetɔn lɛ tɔn dó d’alɔ Klisanwun e ma ɖó kaka ɖé ǎ lɛ é.

 Nɛ̌ nǔ ka nɔ cí nú nɔví mǐtɔn e alaxɔ ɖevo lɛ sɛ́ kpoɖeji yetɔn lɛ dó lɛ é? Ði kpɔ́ndéwú ɔ, ɖò Tanzanie fí e toví lɛ ma nɔ kpéwú bo nɔ mɔ caki ɖokpo kpɔ́n ɛnɛ vɔ́vɔ́ ɖè gbè ɖokpo ǎ é ɔ, akwɛ enɛ lɛ wɛ è zán dó vɔ́ Kpléxɔ Axɔ́suɖuto ɔ tɔn e agun Mafinga tɔn nɔ zán é jlaɖó. Agun ɔ wlán ɖɔ: “Sín hwenu e è vɔ́ Kpléxɔ ɔ jlaɖó é ɔ, mɛ e nɔ wá kplé lɛ é jɛji ɖò ali bǔnɔ ɖé nu! É sù nukún mǐtɔn mɛ tawun ɖɔ tutoblonunu Jehovah tɔn kpo kplékplé nɔví lɛ tɔn mǐtɔn e gbɔn gbɛ̀ ɔ bǐ mɛ é kpo hun alɔ dó na nǔ mǐ, bɔ mǐ kpéwú bo ɖò vivǐ kpléxɔ ɖaaɖagbe lěhun tɔn ɖu wɛ.”

 Jɛmɛji Covid-19 ɔ zɔ́n bɔ nɔví mǐtɔn e ɖò Sri Lanka é ɖé lɛ jɛ nǔɖuɖu dò. Imara Fernando kpo vǐ sunnu winnyawinnya tɔn Enosh kpo ɖò mɛ enɛ lɛ mɛ. Amɔ̌, ɖó akwɛ e nɔví e ɖò tò ɖevo mɛ lɛ é na lɛ é wutu ɔ, ye ɖu lè sɔhɛnmɛ tɔn. Ye wlán dó wema kpéwún kpéwún ɖé jí ɖɔ: “Mǐ dókú nú nɔví ɖěɖee ɖè wanyiyi xlɛ́ mǐ ɖò hwenu vɛwǔ elɔ lɛ mɛ lɛ é. Xwédo elɔ e mɛ mǐ ɖè é sù nukún mǐtɔn mɛ tawun, bɔ mǐ nɔ xoɖɛ sɛ́dó Jehovah ɖɔ é ni d’alɔ nɔví mǐtɔn lɛ bǐ ɖò azǎn gudogudo tɔn elɔ lɛ mɛ.”

 Nɔví sunnu kpo nɔví nyɔnu kpo mǐtɔn lɛ na bo tlɛ ɖò fí ɖebǔ ɔ, akpakpa nɔ sɔ́ ye dó nǔ e ye ɖó lɛ é mímá xá mɛ ɖevo lɛ wu. Ði kpɔ́ndéwú ɔ, Enosh bló gbǎví nǔnina tɔn kpɛví ɖé, bonu é lɔ na sixu na nǔ dó d’alɔ xwédo e ɖò hudo mɛ lɛ é. Guadalupe Álvarez lɔ ɖè nǔnamɛ sín jlǒ ɖokpo ɔ xlɛ́. Xá e mɛ é ɖè ɖò Mexique é ɔ, mɛ klewun ɖé wɛ nɔ yí azɔ̌kwɛ e ma tlɛ kpé sɔmɔ̌ ǎ é. Ye nɔ lɛ́ yí ɖò gbesisɔmɛ ǎ. É ɖò mɔ̌ có, é nɔ na nǔ e wu é kpé é. É wlán ɖɔ: “Un dókú nú Jehovah ɖó xomɛnyínyɔ́ tɔn kpo wanyiyi adodwé tɔn kpo wu. Un tuùn ɖɔ è na sɔ́ akwɛ e un na lɛ é sɔ́ xú mɛ ɖevo lɛ tɔn jí, bo na sɔ́ dó d’alɔ nɔví e ɖò hudo mɛ lɛ é.”

 Alaxɔ ɖěɖee nɔ sɛ́ akwɛ dó tò ɖěɖee ɖò hudo mɛ lɛ é nɔ wà mɔ̌ kpo xomɛhunhun kpo. Anthony Carnalho e ɖò Wěɖegbɛ́ Alaxɔ Brésil tɔn tɔn mɛ é ɖɔ: “Nú xwè gegě ɔ, é byɔ ɖɔ nɔví e ɖò tò ɖevo mɛ lɛ é ni zán akwɛ yetɔn dó d’alɔ mǐ cobɔ azɔ̌ ɔ na yì ɖò tò mǐtɔn mɛ. Ðó alɔdó enɛ wu ɔ, mǐ yì nukɔn tawun. Dìn ɔ, ninɔmɛ mǐtɔn ɖò akwɛzinzan linu ko ɖyɔ, bɔ ali hun nú mǐ lɔ bɔ mǐ na d’alɔ mɛ ɖevo lɛ. Nɔví mǐtɔn e ɖò Brésil lɛ é nɔ kpɔ́n lee wà wɛnjijlazɔ́ ɔ gbɔn wɛ è ɖè gbɔn gbɛ̀ ɔ bǐ mɛ é, bo nɔ ba ali e nu ye sixu d’alɔ ɖè é.”

 Nɛ̌ Kúnnuɖetɔ́ Jehovah tɔn lɛ ka sixu d’alɔ nɔví yetɔn e ɖò hudo mɛ lɛ é ganji gbɔn? É byɔ ɖɔ ye ni sɛ́ akwɛ dó alaxɔ e ɖò tò ɖevo mɛ lɛ é tlɔlɔ ǎ, loɔ, ye sixu wà mɔ̌ gbɔn alɔɖiɖó ɖò azɔ̌ e wà wɛ è ɖè gbɔn gbɛ̀ ɔ bǐ mɛ é mɛ gblamɛ. Enɛ sixu nyɔ́ bló gbɔn akwɛ zízé dó gbǎví agun tɔn ɔ mɛ, ɖò fí e è wlán “Azɔ̌ E Mǐ Nɔ Wà Gbɔn Gbɛ̀ ɔ Bǐ Mɛ É” dó é. Alǒ, è sixu lɛ́ na nǔ gbɔn donate.pr418.com jí. Nǔnina enɛ lɛ bǐ nɔ sù nukún mǐtɔn mɛ tawun.