Jezu ɖɔ nú ahwanvu tɔn lɛ ɖɔ: “Mi na nyí kúnnuɖetɔ́ ce . . . kaka yì jɛ fí e gbɛ̀ ɔ kponu ɖó é.” (Mɛsɛ́dó 1:8) Égbé ɔ, Kúnnuɖetɔ́ Jehovah tɔn lɛ nɔ w’azɔ̌ enɛ e è sɔ́ d’así nú ye é kpo kanɖodónǔwu kpo. É ɖò mɔ̌ có, akpáxwé gbɛ̀ ɔ tɔn ɖé lɛ tíìn, ɖò taji ɔ, fí e d’agba bɔ gbɛtɔ́ sukpɔ́ ɖè é ɖé lɛ tíìn bɔ è ko ɖekúnnu ɖò fí enɛ lɛ bǐ mlɛ́mlɛ́ ǎ. Tò ɖé lɛ mɛ tíìn bɔ Kúnnuɖetɔ́ kpɛɖé jɛn ɖò finɛ. (Matie 9:37, 38) Etɛ lɛ bló wɛ mǐ ka ɖè, bo na dó ɖekúnnu nú mɛ gegě lee é nyɔ́ bló gbɔn é?

 Bo na dó d’alɔ mǐ bonu mǐ na setónú nú gbeɖiɖe Jezu tɔn ɔ, Wěɖegbɛ́ Sinsɛnzɔ́ tɔn Hagbɛ̌ Alixlɛ́mɛtɔ́ ɔ tɔn Kúnnuɖetɔ́ Jehovah tɔn lɛ tɔn ɖè azɔ̌ nú mɛsɛ́dó lɛ yì xá e mɛ hudo tíìn ɖè ɖò gbɛ̀ ɔ mɛ é ɖé lɛ. Ðò alɔnu dìn ɔ, mɛsɛ́dó e è sɛ́dó gle ɔ mɛ lɛ é 3 090 wɛ gbɔn gbɛ̀ ɔ bǐ mɛ. a È ko kplɔ́n azɔ̌ ye mɛ gegě ɖò wemaxɔmɛ Biblu kplɔnkplɔn tɔn ɖé, ɖi Wemaxɔmɛ nú Wɛnɖagbejlatɔ́ Axɔ́suɖuto ɔ Tɔn Lɛ. Mɛsɛ́dó lɛ nɔ sɔ́ jlǒ, bo nɔ jó xwé yetɔn lɛ dó, lobo nɔ sɛ̀ tɛn yì tò ɖevo mɛ. Zinzin mɛsɛ́dó enɛ lɛ tɔn, azɔ̌ e è kplɔ́n ye é kpo nǔ e ye mɔ kpɔ́n lɛ é kpo zɔ́n bɔ ye nɔ d’alɔ bɔ wɛnɖagbe ɔ nɔ gbakpé, bɔ ye nɔ lɛ́ sɔ́ kpɔ́ndéwú ɖagbe ɖ’ayǐ nú ahwanvu yɔyɔ̌ lɛ.

 Ðò alaxɔ ɖokpo ɖokpo mɛ ɔ, Azɔ̌xɔsa Sinsɛnzɔ́watɔ́ E Ðò Gle ɔ Mɛ lɛ É tɔn, ee ɖò Azɔ̌xɔsa Sinsɛnzɔ́ tɔn glɔ́ é, nɔ w’azɔ̌ xá Wěɖegbɛ́ Alaxɔ tɔn, bo nɔ kpé nukún dó nǔ e hudo mɛsɛ́dó lɛ é wu. Ðé lɛ ɖò hudo enɛ lɛ mɛ wɛ nyí xɔ e mɛ ye na nɔ é, ganjininɔ ɖò agbaza lixo, gɔ́ nú akpomɛkwɛ kpɛɖé nú akwɛzinzan yetɔn ayihɔngbe ayihɔngbe tɔn lɛ. Ðò xwè sinsɛnzɔ́ tɔn 2020 tɔn mɛ ɔ, Kúnnuɖetɔ́ Jehovah tɔn lɛ zán ɖɔ̌la Amɛlika tɔn ɖibla yì livi 27 dó kpé nukún dó mɛsɛ́dó lɛ wu. Nǔ enɛ lɛ zɔ́n bɔ mɛsɛ́dó lɛ kpéwú bo sɔ́ ayi yetɔn bǐ ɖó sinsɛnzɔ́ ɔ jí mlɛ́mlɛ́, bo zán hlɔnhlɔn yetɔn bǐ dó takún tɔn mɛ, lobo lɛ́ hɛn agun e mɛ ye ɖè é lidǒ.

 Nǔ ɖagbe tɛ lɛ mɛsɛ́dó e è sɛ́dó gle ɔ mɛ lɛ é ka nɔ hɛn wá nú wɛnɖagbejijlazɔ́ ɔ? Frank Madsen e nɔ wà sinsɛnzɔ́ ɖò Wěɖegbɛ́ Alaxɔ tɔn Malawi tɔn mɛ é ɖɔ: “Akɔ́nkpinkpan kpo azɔ̌tuùntuùn mɛsɛ́dó lɛ tɔn kpo zɔ́n bɔ ye ko d’alɔ agun gegě bɔ ye jɛ fí e kúnnuɖiɖe nɔ vɛwǔ ɖè lɛ é yì jí, ɖi xwé e è nɔ cɔ́ lɛ é kpo fí e è nɔ dó jonɔgbe ɖè lɛ é kpo. Gɔ́ na ɔ azɔ̌ syɛnsyɛn e ye nɔ wà, bo nɔ kplɔ́n gbè kpo aca kpo xá ɔ mɛ tɔn é nɔ dó wusyɛn lanmɛ nú mɛ ɖevo lɛ. Ye nɔ lɛ́ d’alɔ mɛ winnyawinnya lɛ bɔ ye nɔ lin tamɛ dó sinsɛnzɔ́ hwebǐnu tɔn mɛ byɔbyɔ wu. Mǐ dókú nú Jehovah nú mɛsɛ́dó e è sɛ́dó gle ɔ mɛ lɛ é.”

 Nɔví e ɖò Wěɖegbɛ́ Alaxɔ tɔn tò ɖevo tɔn mɛ é ɖé ɖɔ: “Mɛsɛ́dó lɛ nyí kúnnuɖenú gbɛɖe e xlɛ́ ɖɔ togun Jehovah tɔn ɖò bǔ gbɔn gbɛ̀ ɔ bǐ mɛ é. Mɛ e ma tlɛ nyí Kúnnuɖetɔ́ ǎ lɛ é sixu mɔ céɖécéɖé ɖɔ aca mǐtɔn lɛ kún nɔ klán mǐ ó, loɔ, nǔkplɔnmɛ Biblu tɔn lɛ ko d’alɔ mǐ bɔ mǐ huzu kplékplé nɔví lɛ tɔn e ɖò bǔ é ɖé.”

 Nɛ̌ mɛsɛ́dó e è sɛ́dó gle ɔ mɛ lɛ é ka nɔ d’alɔ wɛnjlatɔ́ e ɖò xá ɔ mɛ lɛ é gbɔn? Paulo gosin Timor-Leste. Mɛsɛ́dó e è sɛ́dó agun tɔn mɛ lɛ é sín nǔ nɔ sù nukún tɔn mɛ tawun. É ɖɔ: “Yǒzo nɔ gbɛ́ ɖò xá mǐtɔn mɛ titewungbe tɔn. Mɛsɛ́dó lɛ gosin fí e gbɛ̀ mɛ nɔ fá ɖè é có, lee ayǐ mɛ nɔ cí é nɔ zɔ́n gbeɖé bonu ye nɔ gɔn kúnnu ɖè ǎ. Ye nɔ ɖò kplé kúnnuɖegbé tɔn sín domɛ zǎnzǎn lɛ bǐ. Un nɔ mɔ ye hwɛhwɛ bɔ ye nɔ ɖò mɛbakpɔ́n lɛ bló wɛ ɖò hwemɛ, hwenu e yǒzo nɔ gbɛ́ tawun é, ye nɔ lɛ́ bló mɛbakpɔ́n lɛ ɖò gbadanu lɛ lɔ. Ye d’alɔ mɛ gegě bɔ ye kplɔ́n nǔgbo ɔ, kaka jɛ nyi lɔ jí. Ye zán gbɛzán yetɔn bǐ dó ɖò Jehovah sɛn wɛ kpo kanɖodónǔwu kpo, kpodo akpakpa sɔ́ mɛ kpo, bɔ enɛ nɔ sísɛ́ agun ɔ bǐ bɔ é lɔmɔ̌ nɔ sɛn Jehovah mlɛ́mlɛ́.”

 Ketti e nyí gbexosin-alijitɔ́ hwebǐnu tɔn ɖé bo nɔ nɔ Malawi é ɖɔ lee asú kpo asì kpo mɛsɛ́dó ɖé d’alɔ xwédo tɔn gbɔn é: “Hwenu e è sɛ́ asú kpo asì kpo mɛsɛ́dó ɖé dó agun mǐtɔn mɛ é ɔ, nyi wɛ nyí Kúnnuɖetɔ́ ɖokpo géé e ɖò xwédo ce mɛ é. Amɔ̌, asú kpo asì kpo ɔ nɔ gudo nú mì tawun, bɔ ye wá sɛkpɔ́ xwédo mǐtɔn tawun. Kpɔ́ndéwú ɖagbe e ye sɔ́ ɖ’ayǐ é d’alɔ vǐ ce lɛ bɔ ye mɔ lee Jehovah sinsɛn nɔ tɔ́n kɔ dó gbɛzán awǎjijɛnɔ e nɔ jɛmɛ nú mɛ é ɖé mɛ gbɔn é. Wusyɛn e mɛsɛ́dó lɛ dó lanmɛ nú mǐ é zɔ́n bɔ vǐ nyɔnu ce atɔn lɛ nyí gbexosin-alijitɔ́ hwebǐnu tɔn, bɔ asú ce jɛ kplé lɛ yì wá jí.”

 Fitɛ è ka nɔ ba akwɛ sín bo nɔ sú hudo mɛsɛ́dó e è sɛ́dó gle ɔ mɛ lɛ é tɔn? Nǔnina e mɛ lɛ nɔ na dó nɔ gudo nú azɔ̌ e nɔ wà gbɔn gbɛ̀ ɔ bǐ mɛ é wɛ nyí tɔn. Mɛ gegě nɔ na nǔ gbɔn wlɛnwín e xó è ɖɔ ɖò donate.pr418.com jí lɛ é gblamɛ. Alɔhundónanǔmɛ enɛ lɛ nɔ sù nukún mǐtɔn mɛ titewungbe.