Ðò xwè 2020 tɔn mɛ ɔ, adla gegě j’ayǐ bɔ jɛmɛji Covid-19 ɔ lɔ jɛ nǔ gbà jí gbɔn gbɛ̀ ɔ bǐ mɛ. Nɛ̌ Kúnnuɖetɔ́ Jehovah tɔn lɛ ka d’alɔ mɛ ɖěɖee awě xò lɛ é gbɔn?

 Ðò xwè sinsɛnzɔ́ tɔn 2020 tɔn a mɛ ɔ, Wěɖegbɛ́ Titoblonunutɔ́ lɛ tɔn Hagbɛ̌ Alixlɛ́mɛtɔ́ ɔ tɔn yí gbè bɔ è na zán ɖɔ̌la Amɛlika tɔn livi 28 dó hɛn sɔ mɛ. Enɛ d’alɔ bɔ è hɛn sɔ mɛ ɖěɖee wu adla 200 jɛji wà nǔ dó lɛ é. Ðé lɛ ɖò adla enɛ lɛ mɛ wɛ nyí jɛmɛji Covid-19 ɔ, axásáxásá jɔhɔn mɔ̌kpan, tɔgbamɛ lɛ ɖò Aflika, adɔ e tɔ́n ɖò Vénézuéla é kpo akú e ɖó ɖò Zimbabwe é kpo. Nǔnina lɛ d’alɔ bɔ è xɔ nǔɖuɖu kpo sin kpo, sɔnǔ nú xɔ klewun klewun lɛ, xɔ awu, kpé nukún mɛ wu ɖò dotóoxwé, bo lɛ́ xɔ nǔ taji ɖěɖee na d’alɔ bɔ è na hɛn fí lɛ ɖó mimɛ̌ jí, jlá nǔ lɛ ɖó, bo lɛ́ vɔ́ xɔ lɛ gbá lɛ é. Kpɔ́ndéwú sɔhɛnmɛzɔ́ e è wà lɛ é tɔn ɖé lɛ ɖíe:

 Covid-19. Gbɔn gbɛ̀ ɔ bǐ mɛ ɔ, jɛmɛji ɔ wà nǔ dó nɔví sunnu kpo nɔví nyɔnu kpo mǐtɔn lɛ wu ɖò agbaza lixo, lee nǔ nɔ cí nú mɛ é linu kpo akwɛzinzán linu kpo. Bo na dó d’alɔ ye ɔ, Wěɖegbɛ́ Sɔhɛnmɛ tɔn 800 jɛji wɛ è ɖó ayǐ gbɔn gbɛ̀ ɔ bǐ mɛ. Wěɖegbɛ́ enɛ lɛ gbéjé hudo nɔví mǐtɔn lɛ tɔn lɛ kpɔ́n, bo yawǔ sɛ́ gbeɖiɖó lɛ dó Wěɖegbɛ́ Titoblonunutɔ́ lɛ tɔn, bɔ enɛ d’alɔ wěɖegbɛ́ enɛ bɔ é tuùn lee é na kpé nukún dó sɔhɛnmɛ ɔ wu ganji gbɔn é.

 Ðò xwè ɔ bǐ vlamɛ ɔ, Wěɖegbɛ́ Sɔhɛnmɛ tɔn lɛ d’alɔ mɛ gegě bɔ ye mɔ nǔɖuɖu, sin, mimɛ̌jininɔ sín nǔ ɖé lɛ, kpo atínkɛ́n taji lɛ kpo. Ðò xá ɖé lɛ mɛ ɔ, Wěɖegbɛ́ Sɔhɛnmɛ tɔn lɛ lɛ́ wà azɔ̌ ɖó kpɔ́ xá mɛxo agun tɔn xá ɔ mɛ tɔn lɛ dó d’alɔ nɔví lɛ bonu ye na ɖu alɔdó acɛkpikpa lɛ tɔn sín lè.

 Mɛ e ma nyí Kúnnuɖetɔ́ ǎ lɛ é ɖ’ayi sɔhɛnmɛzɔ́ mǐtɔn wu. Ði kpɔ́ndéwú ɔ, Field Simwinga e nyí kponɔgán ɖò tokpɔn Nakonde tɔn mɛ ɖò Zambie é ɖɔ nú nɔví mǐtɔn lɛ ɖɔ: “Mǐ dókú nú mi nú alɔdó mitɔn e wá dó ganmɛ nú xwédo ɖěɖee awě xò lɛ é.”

 Nǔɖuɖu Hwedó Mɛ Ðò Angola. É sín jɛmɛji Covid-19 ɔ wu bɔ nǔɖuɖu sɔ́ tíìn sɔmɔ̌ ɖò Angola ǎ, bo ka lɛ́ vɛ́ axi ɖesu. É wá vɛwǔ nú nɔví sunnu kpo nɔví nyɔnu kpo mǐtɔn lɛ gegě tawun bonu ye na nɔ xɔ nǔɖuɖu.

 È byɔ alaxɔ Brésil tɔn ɖɔ é ni sɛ́ nǔɖuɖu kolíi gegě dó nɔví mǐtɔn e ɖò Angola lɛ é. Bo na dó zán nǔnina lɛ ganji ɔ, nɔví lɛ ba dò nú ali ɖagbe hugǎn e nu è na xɔ nǔɖuɖu lɛ bo lɛ́ sɛ́ ye dó ɖè é kpo sɔxwixwe kpo, bo wá xɔ nǔɖuɖu lɛ ɖó kpɔ́jí. Enɛ wu ɔ, nú è má ɖó zɛ̌nzɛ̌n ɔ, kpo ɖɔ̌la Amɛlika tɔn 22 kpowun kpo ɔ, è kpéwú bo xɔ kolíi ɖokpo ɖokpo bo lɛ́ sɛ́ ye dó; có kolíi ɖokpo ɖokpo ka nɔ ɖibla hɛn nǔɖuɖu lěhun lɛ kilóo 20 mɔ̌: mɔ̌likún, ayikún kpo ami e nɔ ɖa nǔ é kpo. Kaka jɛ dìn ɔ, è ko sɛ́ kolíi 33 544 dó, bɔ bǐ kplékplé bló tɔ́nu 654. Nǔ enɛ lɛ kpo nǔ ɖevo e nɔví e ɖò xá ɔ mɛ lɛ é kpo na lɛ é kpo zɔ́n bɔ è na nǔɖuɖu mɛ 50 000 jɛji!

 Nɛ̌ nǔ ka cí nú nɔví mǐtɔn lɛ dó sɔhɛnmɛzɔ́ enɛ wu? Alexandre, ee nɔ nɔ xá e jɛ zɔ é ɖé mɛ ɖò Angola é ɖɔ: “Un mɔ gannaganna ɖɔ Jehovah yí wǎn nú mì, bɔ un kún ɖò nyiɖokponɔ ó. Un xɔ akwɛ nú tutoblonunu Jehovah tɔn!” Mariza, ee nyí nɔ goɖokponɔ ɖé é ɖɔ: “Jehovah sè ɖɛ ce. É na cɛ nú é kpo tutoblonunu tɔn kpo!”

 Akú E Ðó Ðò Zimbabwe É. Ðò xwè sinsɛnzɔ́ tɔn 2020 tɔn mɛ ɔ, akú ɖó syɛnsyɛn ɖò Zimbabwe b’ɛ zɔ́n bɔ adɔ dóya nú gbɛtɔ́ livi mɔ̌kpan tawun. Nǔɖuɖu hwedó Kúnnuɖetɔ́ afatɔ́n mɔ̌kpan ɖò Zimbabwe.

 Ě ɖó Wěɖegbɛ́ Sɔhɛnmɛ tɔn atɔ́ɔ́n ayǐ, bá dó na nǔɖuɖu nɔví mǐtɔn lɛ. Kúnnuɖetɔ́ kanweko mɔ̌kpan d’alɔ bɔ è dó nǔɖuɖu lɛ ati, alǒ hwé mɔ̌to yetɔn lɛ. b Ðò xwè sinsɛnzɔ́ tɔn 2020 tɔn mɛ ɔ, è zán ɖɔ̌la Amɛlika tɔn 691 561 dó na nǔɖuɖu gbɛtɔ́ 22 700 jɛji!

 Ðò ninɔmɛ ɖé lɛ mɛ ɔ, kpasin nǔɖuɖu tɔn nɔví lɛ tɔn wɛ vɔ kɛɖɛ bɔ nǔɖuɖu sɔhɛnmɛ tɔn lɛ wá. Hwenu e nǔɖuɖu lɛ wá é ɔ, nɔví mǐtɔn lɛ dókú nú Jehovah. Ye mɛ ɖé tlɛ jɛ han Axɔ́suɖuto ɔ tɔn lɛ jì jí.

 Ðò xá ɖé mɛ ɔ, asúkúsi Kúnnuɖetɔ́ we yì kplé e gbɛ̌ta axɔ́su tuùn ma ka ɖó nu ɖ’emɛ (ONG) ɖé bló bo ɖɔ xó dó nǔɖuɖu nina mɛ wu é ɖé tɛnmɛ. Amɔ̌, kplé ɔ wá wlí toxóɖiɖɔ sín ali, enɛ wu ɔ, nɔví nyɔnu lɛ wá gbeta ɔ kɔn ɖɔ emi kún sixu wà nǔ e é byɔ cobo na mɔ alɔdó ɔ é ó. Ee ye site jó kplé ɔ dó é ɔ, mɛ lɛ cá ye ko bo ɖɔ nú ye ɖɔ, “Mi vɛ́ ma lɛ́ lɛkɔ wá byɔ nǔɖuɖu mǐ ó mɛ!” Amɔ̌, aklunɔzán gbla we kpowun gudo ɔ, nɔví sunnu lɛ wá ayǐ ɔ jí, bo hɛn nǔɖuɖu wá nú nɔví nyɔnu mǐtɔn lɛ; ye ko wà mɔ̌ xóxó cobɔ sɔhɛnmɛzɔ́ ONG ɔ tɔn wá bɛ́!

 Sɔhɛnmɛzɔ́ e è wà ɖò Zimbabwe é tɔ́n kɔ dó kúnnuɖiɖe ɖagbe ɖé mɛ. Ði kpɔ́ndéwú ɔ, kpɔ́n nǔ e Prisca e nɔ nɔ gletoxo kpɛví ɖé mɛ é mɔ kpɔ́n é. Akú ɔ hɛn wuvɛ̌ lɛ wá có, Prisca ka nɔ yì jlá wɛnɖagbe ɖò mercredi lɛ kpo vendredi lɛ kpo tɛgbɛ, é na bo tlɛ nyí ɖò gle hwenu ɔ nɛ. Mɛ e ɖò gletoxo tɔn mɛ lɛ é nɔ ko è, bo nɔ ɖɔ: “A lo ko jó wɛnɖagbe jlajlá dó, ma nyí mɔ̌ ǎ ɔ, adɔ na hu xwédo towe kpowun.” Prisca nɔ ɖɔ nú ye ɖɔ: “Jehovah nɔ jó gbejinɔtɔ́ tɔn lɛ dó gbeɖé ǎ.” Azǎn ɖé jɛ ǎ, bɔ tutoblonunu mǐtɔn hɛn sɔ ɛ. É jiwǔ nú nɔzo Prisca tɔn ɖé lɛ bɔ ye ɖɔ n’i ɖɔ: “Mawu jó we dó gbeɖé ǎ, enɛ wu ɔ, mǐ jló na kplɔ́n nǔ dó wǔ tɔn d’eji.” Ye mɛ tɛnwe nɔ ɖótó kplé agun tɔn ɖěɖee è nɔ bló lɛ é dìn gbɔn hladio jí.

 Ee mǐ ɖò vivɔnu gbɛ̀ ɔ tɔn sɛkpɔ́ wɛ é ɔ, mǐ na kpò ɖò xwi ɖí xá adla lɛ wɛ. (Matie 24:3, 7) Alɔ e a nɔ hun dó na nǔ gbɔn wlɛnwín vovo e ɖò donate.pr418.com jí lɛ é zinzán gblamɛ é nɔ sù nukún mǐtɔn mɛ tawun. È nɔ zán ye ganji dó sú hudo mɛ ɖěɖee ɖò wuvɛ̌ sè wɛ lɛ é tɔn dó ganmɛ.