Ðo xwe sinsɛnzɔ́ tɔn 2021 tɔn a mɛ ɔ, gbɛ ɔ kpo ɖo wǔvɛ́ se wɛ ɖó jɛmɛjí Covid-19 tɔn ɔ wútu. Lěe xóta “Sɔhɛnmɛ gbɔn gbɛ ɔ bǐ mɛ ɖo jɛmɛjí e gbɔn gbɛ ɔ bǐ mɛ é ɖé hwenu” tínmɛ gbɔn é ɔ, ɖɔ̌la b lǐvi mɔ̌kpán wɛ mǐ ko zán dó hɛn sɔ mɛ lɛ́ ɖo jɛmɛjí ɔ hwenu, bó lɛ́ ɖó Wěɖegbɛ́ sɔhɛnmɛ tɔn 950 jɛjí ayǐ.

 Nǔgbó ɔ, ée jɛmɛjí ɔ ɖo nǔ gba wɛ mɔ̌hunkɔtɔn é ɔ, adla alǒ nǔ mɔ̌hun ɖěvo e nɔ sín gbɛtɔ́ wú lɛ́ é wa nǔ dó nɔví súnnu kpó nɔví nyɔ̌nu kpó mǐtɔn lɛ́ wú gbɔn gbɛ ɔ bǐ mɛ. Bó ná dó hɛn sɔ mɛ lɛ́ ɖo adla mɔ̌hun 200 jɛjí hwenu ɔ, Wěɖegbɛ́ titoblónúnǔtɔ́ lɛ́ tɔn Hǎgbɛ́ alixlɛ́mɛtɔ́ ɔ tɔn yí gbe bɔ è zán ɖɔ̌la lǐvi 8 gɔ́ nú sɔ e è hɛn mɛ lɛ́ ɖo Covid-19 sín ali nu lɛ́ é. Mǐ ní kpɔ́n lěe è zán nǔníná towe lɛ́ dó d’alɔ mɛ ɖěɖěe wú adla e j’ayǐ agaɖanu din lɛ́ é we wa nǔ dó lɛ́ é gbɔn é.

 Ðo 22 mai 2021 ɔ, só Nyiragongo wú myɔ ɖo République démocratique du Congo. Myɔ ɔ fyɔ́ xwé lɛ́, wěmaxɔmɛ lɛ́ kpó fí e è nɔ kplé sin ɖ’ayǐ ɖó lɛ́ é kpó. Myɔ ɔ kɛ́ɖɛ́ wɛ ka nyí awǒvinú ɔ ǎ. Ée só ɔ wú myɔ fó gúdo é ɔ, azizɔ aɖǐnɔ ɖé tɔ́n sín só ɔ xomɛ nú azǎn gěgé bó bló afúntúntún gbɔn toxo Goma tɔn mɛ, è lɛ́ ɖ’ayi ayǐkúngban dán wǔ kléwún kléwún mɔ̌kpán wú. È byɔ́ mɛ e ɖo toxo ɔ mɛ lɛ́ é vlɔ̌ɖówe jɛjí ɖɔ yě ní sɛ tɛn. Mɛ afatɔ́n donu kanweko mɔ̌kpán wɛ hɔn, bɔ mɛɖé lɛ́ d’asá to ɔ sín dogbó lɛ́ bó yi cí Rwanda.

 Kúnnuɖetɔ́ Jehovah tɔn 5 000 mɔ̌ wɛ ɖo mɛ ɖěɖěe sɛ tɛn lɛ́ é mɛ. Nú mɛɖé lɛ́ ɔ, myɔ ɔ wɛ fyɔ́ xwé yětɔn, amɔ̌, nú mɛ ɖěvo lɛ́ ɔ, ajotɔ́ lɛ́ wɛ yi fin nǔ e ɖo xwé yětɔn lɛ́ gbe lɛ́ é, hwenu e yě hɔn gúdo é. Wěɖegbɛ́ sɔhɛnmɛ tɔn e ɖo Rwanda kpó République démocratique du Congo kpó lɛ́ é w’azɔ̌ alɔ ɖo alɔ mɛ dó hɛn sɔ mɛ lɛ́. Alaxɔ Congo (Kinshasa) tɔn ɖɔ dó wěɖegbɛ́ ɖokpó wú ɖɔ: “Ninɔmɛ lɛ́ syɛ́n tawun ɖo toxo ɔ mɛ, bɔ è ko lɛ́ ɖe gbe nú mɛ lɛ́ ɖɔ yě ní sɛ tɛn vɔ́vɔ́ ǎ có, wěɖegbɛ́ ɔ jɛ nǔɖuɖu, sin, zan kpó avɔ kpó má nú mɛ lɛ́ jí.” Wěɖegbɛ́ sɔhɛnmɛ tɔn ɖé yi toxo e mɛ nɔví mǐtɔn 2000 jɛjí ɖe é ɖokpó mɛ, bó gbá goxɔ nú yě, ná nǔ e è nɔ cyɔ́n awɔntín nu lɛ́ é yě, bó lɛ́ tínmɛ lěe yě ná bló gbɔn, bó ma ná yá wǔ sɔ́ Covid-19 sín azɔnkwín ɔ alǒ bɛ́ slú kpó slá kpó ǎ é nú yě.

 Ðo sun atɔn e jɛ adla j’ayǐ ɔ gúdo lɛ́ é vlamɛ ɔ, nɔví mǐtɔn lɛ́ ma mɔ̌likún tɔ́nu ayizɛ́n jɛjí, agbadé linfín tɔ́nu ayizɛ́n jɛjí, ami e è nɔ dó ɖa nǔ ná é tɔ́nu atɔn jɛjí, kpó sin tɔ́nu atɔn jɛjí kpó. Bó ná dó ɖe akwɛ́zínzán kpo ɔ, alaxɔ ɔ bló tuto bɔ toxo ɔ mɛ wɛ yě xɔ nǔɖuɖu gěgé ɖe, è xɔ axivɛ́nú yětɔn sín togúdo ǎ.

 Nɔví nyɔ̌nu e myɔ ɔ fyɔ́ xwé tɔn yɔ̌yɔ́ ɔ é ɖé ɖɔ: “Awakanmɛ kú mǐ tawun, mǐ se wǔvɛ́ tawun.” Amɔ̌, énɛ́ gúdo ɔ, è d’alɔ xwédo tɔn ɖo agbaza lixo, bó lɛ́ dó wǔsyɛ́n lanmɛ nú yě nú yě ná kpo ɖo gbejí. É wá ɖɔ din ɖɔ: “Kpó alɔdó Jehovah tɔn kpó ɔ, mǐ kpo ɖo nǔ e sín hudó mǐ ɖó lɛ́ é mɔ wɛ. Mǐ mɔ ɖɔ Jehovah hɛn agban mǐtɔn xá mǐ, bó bló bɔ hinhɛn tɔn bɔ wǔ nú mǐ.”

 Akwɛ́yózo gba nǔ ɖo Vénézuéla nú xwe mɔ̌kpán. Ninɔmɛ vɛ́ wǔ lɛ́ mɛ wɛ nɔví mǐtɔn e ɖo fínɛ́ lɛ́ é ɖe, nǔɖuɖu hwedó yě, bɔ dǎkaxixo lɛ́vɔ́ ɖo jijɛjí wɛ. Amɔ̌, tutoblónúnǔ Jehovah tɔn jó yě dó ǎ.

 Ðo xwe sinsɛnzɔ́ tɔn e wá yi é mɛ ɔ, ɖɔ̌la lǐvi 1,5 jɛjí wɛ è zán dó xɔ nǔ, bó hɛn nǔɖuɖu kpó aɖǐ kpó yi jó nú xwédo e ɖo hudó mɛ lɛ́ é. Alaxɔ Vénézuéla tɔn ɖɔ: “Nǔɖuɖu tɔ́nu 130 bíbɛ́ yi jó nú nɔví e ɖo hudó mɛ lɛ́ é gbɔn to ɔ sín awa vovo lɛ́ jí ɖo sun ɖokpó ɖokpó mɛ bɔ wǔ ɖěbǔ ǎ.” Bó ná dó mɔ nǔ jɛ wú ɖɔ nǔɖuɖu lɛ́ kún ná gblé ó ɔ, nǔɖuɖu e sixú nɔ ayǐ nú táan gěgé lɛ́ é wɛ nɔví mǐtɔn lɛ́ nɔ xɔ hwɛhwɛ. Alaxɔ ɔ ɖɔ gɔ́ ná ɖɔ: “Mǐ nɔ xɔ nǔɖuɖu gěgé ɖó kpɔ́, ɖo hwenu e è nɔ ya yě dó é, énɛ́ nɔ zɔ́n bɔ yě nɔ kpɔ hú gǎn. Énɛ́ gúdo ɔ, mǐ nɔ zán wlɛnwín e bɔkun hú gǎn ɖo akwɛ́zínzán linu é dó sɛ tɛn nú yě.”

 Leonel, éé ɖo Wěɖegbɛ́ sɔhɛnmɛ tɔn ɖokpó mɛ ɖo Vénézuéla é yí wǎn nú azɔ̌ tɔn tawun. É ɖɔ: “Azɔ̌ bǔnɔ ɖé wɛ sɔhɛnmɛzɔ́ nyí. Wǔjɔmɛzɔ́ énɛ́ dó wǔsyɛ́n lanmɛ nú mì tawun sín hwenu e asi vívɛ́ ce kú ɖó Covid-19 wú é. Un nɔ hɛn alɔnu ce ján, bó mɔ ɖɔ un nyɔ́ zán nú nɔví e ɖo hudó mɛ lɛ́ é. Nyiɖésúnɔ mɔ lěe Jehovah nɔ ɖe akpá e é dó ɖɔ émí kún ná jó togun émítɔn dó ó gbɔn é tlɔlɔ.”

 È hɛn sɔ nɔví súnnu e ko ɖ’alɔ ɖo sɔhɛnmɛzɔ́ lɛ́ mɛ kpɔ́n wá yi é ɖokpó. É ɖɔ: “Nyi wɛ é byɔ́ ɖɔ è ní d’alɔ din. Agbaza linu kɛ́ɖɛ́ wɛ nɔví lɛ́ d’alɔ mǐ ɖe ǎ. Yě lɛ́ d’alɔ nyi kpó asi ce kpó bɔ mǐ nɔ adohu adohu jí ǎ. Yě kpé nukún dó mǐ wú, dó gbɔ nú mǐ, bó lɛ́ dó wǔsyɛ́n lanmɛ nú mǐ.”

 È nɔ kpé wú bó nɔ tuun jɛ nukɔn ɖɔ adla ɖé lɛ́ ná j’ayǐ, ɖěvo lɛ́ tíin bɔ è ka nɔ tuun ɖěbǔ ǎ. É ɖo mɔ̌ có, hwɛhwɛ ɔ, tutoblónúnǔ Jehovah tɔn nɔ kpé wú bó nɔ mɔ nǔ e é ná dó hɛn sɔ mɛ lɛ́ ná é, bó nɔ lɛ́ yá wǔ hɛn sɔ yě, ɖó nǔníná towe e a nɔ ná dó azɔ̌ e mǐ nɔ wa gbɔn gbɛ ɔ bǐ mɛ é takúnmɛ é wú. È tínmɛ wlɛnwín e è nɔ zán dó ná nǔníná é ɖé lɛ́ ɖo donate.pr418.com jí. Alɔ e a nɔ hun dó ná nǔ é nɔ su nukún mǐtɔn mɛ.