Ðó gbɛtɔ́ livi kanweko mɔ̌kpan wɛ nɔ bló baptɛm ɖò xwè ɖokpo ɖokpo mɛ wutu ɔ, mǐ ɖó hudo xɔ yɛhwexɔ́suɖuto ɔ tɔn gegě tɔn. Bo na dó sú hudo enɛ sín dò ɔ, Azɔ̌xɔsa E Nɔ Bló Tuto Xɔgbigbá Tɔn Ðò Alaxɔ Mɛ gbɔn gbɛ̀ ɔ bǐ mɛ lɛ é bló tuto bo na gbá kpléxɔ 2 700 jɛji alǒ jlá ye ɖó ɖò xwè sinsɛnzɔ́ tɔn 2020 tɔn mɛ. a

 Ajijimɛ kpowun ɔ, jɛmɛji Covid-19 ɔ d’avaja tuto enɛ lɛ mɛ. Bo na dó cyɔn alɔ nɔví sunnu kpo nɔví nyɔnu kpo mǐtɔn lɛ jí, lobo na lɛ́ setónú nú sɛ́n ɖěɖee acɛkpikpa lɛ dó lɛ é ɔ, Wěɖegbɛ́ Wemazínzín tɔn Hagbɛ̌ Alixlɛ́mɛtɔ́ ɔ tɔn ɖó xɔgbigbázɔ́ lɛ gegě te gbɔn gbɛ̀ ɔ bǐ mɛ. É ɖò mɔ̌ có, ɖò xwè sinsɛnzɔ́ tɔn 2020 tɔn mɛ ɔ, kpléxɔ e è gbá lɛ é kpo ɖěɖee è jlaɖó cobɔ jɛmɛji ɔ bɛ́ lɛ é kpo hugǎn 1 700. Gɔ́ na ɔ, xɔzɔ́ ɖaxó ɖaxó e sín tuto alaxɔ lɛ bló é 100 jɛji wɛ è fó. Mǐ ni kpɔ́n lee nɔví mǐtɔn lɛ ɖu xɔ e è gbá fó lɛ é we sín lè gbɔn é.

 Alaxɔ Cameroun tɔn. Alaxɔ xóxó e ɖò Douala é hwe tawun, b’ɛ byɔ ɖɔ è ni gbló ada na. Wěɖegbɛ́ Wemazínzín tɔn lin ɖɔ è na jlá alaxɔ ɔ ɖó, amɔ̌, akwɛ e mɔ̌ wiwa na ɖu é hugǎn akwɛ e xɔ lɛ xɔ é. Ye lɛ́ ba dò nú nǔ kpɔ́n ɖɔ ye ka sixu gbá xɔ ɖó ayikúngban yɔyɔ̌ ɖé jí, alǒ xɔ xwé ɖevo bo jlaɖó à jí, amɔ̌, linlin we lɛ ɖě jɛnu ǎ.

 Ðò táan ɖokpo ɔ mɛ ɔ, nɔví lɛ sè ɖɔ ɖò totaligbé Douala tɔn ɔ, acɛkpikpa ɔ bló tuto bo na bló ali ɖé b’ɛ na gbɔn Kpléɖókpɔ́ Sín Xɔ mǐtɔn ɖé nukɔn. Ali ɔ na zɔ́n bɔ ayikúngban ɔ jí yiyi kpo azɔ̌wanú lɛ bíbɛ́ yì jí kpo na bɔwǔ hugǎn. Huzuhuzu enɛ lɛ sɔgbe xá nǔ e sín hudo alaxɔ ɔ ɖó lɛ é pɛ́pɛ́pɛ́. Enɛ wu ɔ, Hagbɛ̌ Alixlɛ́mɛtɔ́ ɔ yí gbè ɖɔ è ni gbá alaxɔ yɔyɔ̌ ɔ ɖó ayikúngban Kpléɖókpɔ́ Sín Xɔ ɔ tɔn sín akpáxwé ɖé jí.

 Kúnnuɖetɔ́ lɛ kpo xɔzɔ́watɔ́ e è yí dó azɔ̌ ɔ kɔn lɛ é kpo w’azɔ̌ ɖó kpɔ́, wlɛnwín enɛ zɔ́n bɔ è sɔ́ gú hwenu kpo akwɛ kpo ǎ. Nǔgbo ɔ, ɖɔ̌la Amɛlika tɔn livi we jɛji wɛ è zán dó fó azɔ̌ ɔ, b’ɛ sɔ́ yì nabi e è lɛ́n é ǎ! Xwédo Betɛli tɔn ɔ jɛ xɔ yɔyɔ̌ lɛ mɛ, b’ɛ na nɔ zaan é wɛ Covid-19 jɛ nǔ gbà jí.

 Mɛ e nɔ nɔ Betɛli Cameroun tɔn lɛ é ɖó xɔ ɖagbe lɛ bo nɔ dɔ́ mɛ bo nɔ lɛ́ w’azɔ̌ ɖò ninɔmɛ ɖagbe lɛ mɛ, lobo nɔ mɔ ɖɔ nǔɖe wɛ alaxɔ yɔyɔ̌ ɔ nyí bɔ Jehovah na emi. Asú kpo asì kpo ɖé ɖɔ: “Mǐ jló kpowun bo na w’azɔ̌ syɛnsyɛn, mǐ ka sɔ́ nǔnina enɛ dó ɖó nǔ e nyí mǐtɔn bɔ xó fó é ǎ.”

 Azɔ̌xɔsa lilɛdógbeɖevomɛ tɔn (RTO) Tojolabal-gbè tɔn ɖò Mexique. Nú xwè gegě ɔ, gbɛ̌ta lilɛdógbeɖevomɛ tɔn Tojolabal-gbè tɔn w’azɔ̌ ɖò alaxɔ Amérique centrale tɔn mɛ ɖò malin-malin dó Mexico. Amɔ̌, Altamirano kpo Las Margaritas kpo e ɖò kilomɛtlu 1 000 mɔ̌ dó alaxɔ ɔ é wɛ è nɔ dó Tojolabal sín gbè ɔ ɖè tawun! Wǎgbɔ tɔn ɔ, lilɛdógbeɖevomɛtɔ́ lɛ mɔ ɖɔ é vɛwǔ bɔ emi na kpò ɖò nǔ lɛ lilɛ dó Tojolabal-gbè ɔ mɛ wɛ sɔgbe xá lee mɛ lɛ nɔ dó gbè ɔ gbɔn ayǐvɔ̌gbe é. Gɔ́ na ɔ, nɔví sunnu kpo nɔví nyɔnu kpo ɖěɖee sɛkpɔ́ bo jɛxa bá wà lilɛdógbeɖevomɛzɔ́ alǒ d’alɔ ɖò xóyidókanji kpáxwé lɛ é mimɔ nɔ vɛwǔ nú alaxɔ ɔ.

 Ðó hwɛjijɔ enɛ lɛ wutu ɔ, Wěɖegbɛ́ Nǔwlanwlán tɔn Hagbɛ̌ Alixlɛ́mɛtɔ́ ɔ tɔn jló na sɛ̀ tɛn nú gbɛ̌ta lilɛdógbeɖevomɛ tɔn ɔ yì ayǐ e jí è nɔ dó Tojolabal-gbè ɔ ɖè tawun é ɖé. Bo na dó kpé enɛ wu ɔ, alaxɔ ɔ wá gbeta ɔ kɔn bo na xɔ xwé ɖé bo jlaɖó. Mɔ̌ wiwa na ɖè akwɛzinzan kpò hú xɔgbigbá alǒ xɔ xíxáya.

 Lilɛdógbeɖevomɛtɔ́ ɖokpo tinmɛ lè e é mɔ é gbɔn lě: “Ðò xwè wǒ e un wà lilɛdógbeɖevomɛzɔ́ na ɖò alaxɔ mɛ lɛ é mɛ ɔ, un xò gò xwédo ɖokpo vɔ́vɔ́ ɖò xá ɔ mɛ nú é nɔ dó gbè ce ǎ. Dìn ɔ, è sɔ́ azɔ̌xɔsa mǐtɔn wá slé fí e è nɔ dó Tojolabal-gbè ɔ ɖè é. Un nɔ xò gò mɛ e nɔ dó Tojolabal-gbè lɛ é gbè bǐ gbè. Enɛ zɔ́n bɔ un lɛ́ mɔ xókwín gegě, bɔ azɔ̌ ce lɛ́ kpɔ́n te d’eji.”

 Nú xwè sinsɛnzɔ́ tɔn 2021 tɔn ɔ, è bló tuto bo na w’azɔ̌ ɖò RTO kpo wemaxɔmɛ Biblu kplɔnkplɔn tɔn kpo 75 wu, enyi ninɔmɛ lɛ yí gbè na ɔ nɛ. Xɔzɔ́ ɖaxó ɖaxó alaxɔ lɛ tɔn tantɔn na kpò ɖò yiyi wɛ, kaka jɛ hɔ̌nkan gbɛ̀ ɔ tɔn mǐtɔn sín xɔzɔ́ yɔyɔ̌ e na wà wɛ è ɖè ɖò Ramapo ɖò New York é, gɔ́ nú tɛnsisɛ nú alaxɔ Argentine kpo Italie kpo tɔn jí. Gɔ́ na ɔ, Kpléxɔ Axɔ́suɖuto ɔ tɔn yɔyɔ̌ 1 000 jɛji sín hudo wɛ è ɖó, fí ɖěɖee è nɔ bló kplé ɖè alɔnu dìn lɛ é 6 000 jɛji wɛ ma sɔ́ jɛxa ǎ, b’ɛ byɔ ɖɔ è ni ɖyɔ, lobɔ è ɖó na lɛ́ jlá Kpléxɔ Axɔ́suɖuto ɔ tɔn 4 000 ɖevo lɛ ɖó.

 Fitɛ è ka ba akwɛ sín dó wà xɔgbigbázɔ́ kpo nǔjijlaɖózɔ́ kpo enɛ lɛ bǐ na? Nɔví Lázaro González e ɖò Wěɖegbɛ́ Alaxɔ Amérique centrale tɔn tɔn mɛ é na xósin nú nǔkanbyɔ enɛ, hwenu e é ɖò xó ɖɔ dó azɔ̌xɔsa lilɛdógbeɖevomɛ tɔn Tojolabal-gbè tɔn sín azɔ̌ ɔ wu wɛ é. “Ðò fí ɖěɖee alaxɔ mǐtɔn ɖó acɛ dó lɛ é ɔ, nɔví lɛ ɖó nǔ kaka ɖé ǎ. Enɛ wu ɔ, kplékplé nɔví lɛ tɔn sín alɔdó mɛvo ɔ, è sixu gbá azɔ̌xɔsa lilɛdógbeɖevomɛ tɔn lɛ nú nǔɖitɔ́ hatɔ́ e ɖò ayǐ ɔ jí lɛ é ǎ. Akwɛ ɖěɖee nɔví e gbɔn gbɛ̀ ɔ bǐ mɛ lɛ é nɔ na lɛ é wɛ nyí tɔn bɔ è nɔ sɛ̀ tɛn nú lilɛdógbeɖevomɛtɔ́ lɛ yì fí ɖěɖee è nɔ dó gbè yetɔn lɛ ɖè lɛ é. Mǐ dókú nú kplékplé nɔví lɛ tɔn mǐtɔn e gbɔn gbɛ̀ ɔ bǐ mɛ é nú alɔhundónanǔmɛ yetɔn.” Nǔgbo ɔ, akwɛ e mi nɔ na dó azɔ̌ e mǐ nɔ wà gbɔn gbɛ̀ ɔ bǐ mɛ é takúnmɛ é wɛ nɔ zɔ́n bɔ tuto xɔgbigbá tɔn mɔ̌hun lɛ nɔ yì ta, bɔ mi ka nɔ na gegě gbɔn donate.pr418.com jí.