Ðo 2023 ɔ, mɛ e nɔ ɖɔ lanmɛ ná nɔ ganjí xó xéɖéxéɖé lɛ́ é yí gbe ɖɔ mɛɖokpónɔ ninɔ wá húzú azɔn syɛ́nsyɛ́n ɖé, bɔ yě ɖó ná tɔ́n ahwan. Ahwan énɛ́ ka sixú kpa mɛ a?

•   Dotóogán Vivek Murthy, éé xwe aza nú lanmɛ ná nɔ ganjí xó ɖo États-Unis é ɖɔ: “Awǒvinú ɖaxó wɛ mɛɖokpónɔ ninɔ kpó mɛɖée ɖiɖe ɖó vo kpó nyí nú lanmɛ ná nɔ ganjí mǐtɔn.” Amɔ̌, é ɖɔ gɔ́ ná ɖɔ: “Nǔɖé ɖe bɔ mǐ sixú wa ɖo ali tɔn nu.” Étɛ́ ka nyí nǔ ɔ? É ɖɔ: “Mǐ sixú nɔ wa nǔ kléwún kléwún ɖé lɛ́ ayǐhɔ́ngbe ayǐhɔ́ngbe dó bló bónú xɔ́ntɔn e mǐ zun xá mɛ ɖěvo lɛ́ é ná lí dǒ.” a

 É nyí hwenu e è ɖe mɛɖée ɖó vo é kɛ́ɖɛ́ wɛ è nɔ mɔ ɖɔ è ɖo mɛɖokpónɔ ǎ. Mɛɖé lɛ́ sixú ɖo mɛ gěgé tɛ́ntin cóbó ka ná mɔ ɖɔ émí ɖo émíɖokpónɔ. Nú é ná bo nyí nǔ ɖěbǔ wútu wɛ mǐ nɔ mɔ ɖɔ mǐ ɖo mǐɖokpónɔ ɔ, Biblu sixú d’alɔ mǐ. Wěɖexámɛ ɖagbe ɖagbe lɛ́ ɖ’é mɛ bo kunkplá lěe mǐ ná vɛ́ kpó xɔ́ntɔn mǐtɔn lɛ́ kpó gbɔn, bɔ mɔ̌ mɛ ɔ, mǐ ná ɖí xwi xá mɛɖokpónɔ ninɔ é.

 Nɔ ɖɔ xó ɖó kpɔ́ xá mɛ ganjí. Énɛ́ byɔ́ ɖɔ a ní nɔ ɖɔ lěe nǔ cí nǔ we é; énɛ́ kɛ́ɖɛ́ ka wɛ ǎ, a ɖó ná nɔ lɛ́ ɖótó mɛ ganjí. Bǎ e mɛ mɛ ɖěvo lɛ́ sín nǔ nɔ ɖu ayi mɛ nú we yi ɖó é ɔ, bǎ énɛ́ mɛ wɛ xɔ́ntɔn e a zun xá yě é ná syɛ́n yi ɖó.

•   Nǔgbódodó Biblu tɔn: “Mi ní ma nɔ ba ɖagbe miɖésúnɔ tɔn kɛ́ɖɛ́ ó, loɔ, mi ní nɔ lɛ́ ba ɖagbe mɛ ɖě lɛ́ tɔn.”—Filípunu lɛ́ 2:4.

 Nɔ zun xɔ́ntɔn xá mɛ gěgé d’é jí. Jlǒ bo zun xɔ́ntɔn xá mɛ e wa ɖaxó we lɛ́ é alǒ mɛ e hwɛ wa ɖaxó lɛ́ é, abǐ xá mɛ e ɖó walɔ ɖěvo alǒ gosín ayǐ ɖěvo jí lɛ́ é.

•   Nǔgbódodó Biblu tɔn: “Mi ní gbló ada nú wǎnyíyí mitɔn.”—2 Kɔlɛ́ntinu lɛ́ 6:13.

 Nú a ná ɖó mɔjɛmɛ ɖěvo lɛ́ dó lěe a sixú tɛ́n kpɔ́n bo zun xɔ́ntɔn e lí dǒ lɛ́ é gbɔn é wú hǔn, xa xóta “Comment combler notre besoin d’amitié.”