Ée xwe 2023 tɔn ɖo bǐbɛ́ wɛ é ɔ, mǐ bǐ wɛ ɖo nukún ɖó wɛ ɖɔ nǔ ɖagbe lɛ́ ná jɛ dó mǐ kpó xwédo mǐtɔn lɛ́ kpó wú. Étɛ́wú mǐ ka sixú ɖó nukúnɖíɖó?

 Biblu ɖe wɛn ɖagbe ɖé xlɛ́ mǐ, é wɛ nyí ɖɔ tagba e mɔ wɛ mǐ ɖe égbé lɛ́ é ɔ, hwenu kléwún ɖé tɔn wɛ, bo ná wá vivɔnu ɖo malínmálín mɛ. Nǔgbó ɔ, nǔ e è wlán dó Biblu mɛ lɛ́ é ɔ, “è wlán yě bo ná dó kplɔ́n nǔ mǐ, bónú gbɔn . . . gbɔ e Nǔwlánwlán mímɛ́ lɛ́ nɔ dó nú mɛ é . . . gblamɛ ɔ, mǐ ní dó sixú ɖó nukún nǔ.”—Hlɔ̌manu lɛ́ 15:4.

•   Ényí a ná kplɔ́n nǔ dó akpá Biblu tɔn lɛ́ wú d’é jí hǔn, xa xóta “Une espérance réelle pour des jours meilleurs.”

 Nukúnɖíɖó e Biblu ná mɛ é sixú ‘cí gandótɔnu ɖɔhun nú gbɛ mǐtɔn.’ (Eblée lɛ́ 6:19) Nukúnɖíɖó énɛ́ sixú hɛn mǐ ɖó te. É sixú d’alɔ mǐ bɔ mǐ ná ɖí xwi xá tagba mǐtɔn égbé tɔn lɛ́, bo ná ɖó linlin e sɔgbe é, lobo ná lɛ́ ɖó awǎjijɛ e ná nɔ ayǐ sɔ́yi é. Ði kpɔ́ndéwú ɔ:

•   Ba do nú lěe nukúnɖíɖó Biblu tɔn d’alɔ nya e ɖí xwi xá kannumɔ nyínyí nú ahan syɛ́nsyɛ́n é gbɔn é. Kpɔ́n video Gbɛzínzán ce sɔ́ nyɔ́ nukún ce mɛ ǎ.

•   Kpɔ́n lěe nukúnɖíɖó e Biblu ná mɛ é sixú d’alɔ mǐ hwenu e mɛvívɛ́ mǐtɔn ɖé kú é gbɔn é. Kpɔ́n video Gbɔ dídó nú mɛ e ɖo aluwɛ mɛ lɛ́ é.

 Mɛ gěgé nɔ ɖó nukún ɖɔ nǔ ɖagbe lɛ́ ná jɛ, amɔ̌, yě nɔ kpé wú bo nɔ kú d’é jí ɖɔ nǔ e ɖó nukún wɛ émí ɖe lɛ́ é ná jɛnu gbe ɖokpó ǎ. Nǔ e sín akpá Biblu dó lɛ́ é tɔn ka gbɔn vo. Étɛ́wú? Ðó akpá e ɖo Biblu mɛ lɛ́ é ɔ, Jexóva Mawu a ɖésúnɔ wɛ dó, “é ka nɔ ɖó adingban ǎ.” (Titu 1:2) Jexóva kɛ́ɖɛ́ wɛ ɖó hlɔ̌nhlɔ́n bo ná ɖe akpá e é dó lɛ́ é bǐ; é kpé wú bo ná bló ‘nǔ e jló è é bǐ.’—Ðɛhan 135:5, 6.

 Mǐ ylɔ́ we kpó akpakpa sɔ́ mɛ kpó ɖɔ a ní wá ɖu nukúnɖíɖó ɖejidéwú Biblu tɔn sín le. Ényí a “nɔ kíjé Nǔwlánwlán mímɛ́ lɛ́ tɛ́nwín lɛnwín” ɔ, a sixú bló bɔ nukúnɖíɖó towe ná lí dǒ. (Mɛsɛ́dó 17:11) Tɛ́n tuto Biblu kplɔ́nkplɔ́n vɔ̌nu tɔn mǐtɔn kpɔ́n, bá mɔ lěe a sixú wa mɔ̌ gbɔn é hwiɖésúnɔ. Ðǒ linlin e sɔgbe é dó sɔgúdo wú dó bɛ́ 2023 ná!