Alǎnnúwiwa ɖo toxóɖiɖɔ linu ɖo gbigbakpé wɛ, bo ɖo adohu adohu ɖó nú gbɛtɔ́ lɛ́ wɛ gbɔn gbɛ ɔ bǐ mɛ.

•   Ðo Mexique ɔ, toxóɖɔtɔ́ 39 wɛ è gblé gbɛ dó ná, bɔ kɛ́n énɛ́ zɛ ée ko jɛ wá yi lɛ́ é bǐ tɔn wú; alǎnnúwiwa ɖo toxóɖiɖɔ linu alɔkpa ɖěvo lɛ́ lɛ́ jɛ bo gba ayi dó nú mɛ lɛ́, lobo zɔ́n bɔ yě dán ɖěwagbɛn ɖo sɔ́misɔ́mi núwiwa 2023 kpó 2024 kpó tɔn hwenu.

•   Agaɖanu din ɖo Elɔ́pu ɔ, alǎnnúwiwa ɖo toxóɖiɖɔ linu sín xó gěgé gba kpé; tɛ́n e mɛ lɛ́ tɛ́n kpɔ́n bá hu gǎnhɔnyitɔ́ xɔ́sú Slovaquie tɔn ɖo 15 mai 2024 é lɔ ɖ’é mɛ.

•   Tɛ́n e è tɛ́n kpɔ́n bá hu togán xóxó Amɛlíka tɔn Donald Trump ɖo 13 juillet 2024 é gba hǔn dó nú toví lɛ́.

 Étɛ́wú alǎnnúwiwa ɖo toxóɖiɖɔ linu ka tíin sɔmɔ̌? É ka ná wá nɔ te gbe ɖokpó a? Étɛ́ Biblu ka ɖɔ?

 Biblu ɖɔ ɖ’ayǐ ɖɔ ɖo hwe mǐtɔn nu, énɛ́ wɛ nyí ɖo “azǎn gǔdo gúdo tɔn lɛ́ mɛ ɔ,” mɛ gěgé ná ɖó walɔ e ná zɔ́n bɔ dǎkaxixo kpó gbemanɔkpɔ́ kpó ná tíin lɛ́ é.

•   “Ðo azǎn gǔdo gúdo tɔn lɛ́ mɛ ɔ, hwenu e syɛ́n bo vɛ́ wǔ bɔ è ná ɖí xwi xá lɛ́ é ná tíin. Ðó gbɛtɔ́ lɛ́ ná nɔ . . . dó alɔgúdokpɛ́ nú mɛ, yě ná nɔ nɔ gbejí ǎ, . . . yě ná nɔ ba ná ɖó gbe kpɔ́ ǎ, . . . yě ná nɔ nylá hun, . . . yě ná nɔ sa mɛ ɖu, yě ná nɔ syɛ́n ta, yě ná nɔ yí go zɛ xwé wú.”—2 Timɔtée 3:1-4.

 Biblu lɛ́ ɖɔ tagba ɖé lɛ́ xó bɔ yě nɔ dó gesí hwenu e nɔ gbɛ ɖe wɛ mǐ ɖe é, yě wɛ nyí gǔ e mɛ lɛ́ nɔ fɔ́n é kpó hunnyahunnya e nɔ tíin ɖo toxóɖiɖɔ linu é kpó. (Luki 21:9, tínmɛ e ɖo do é) Amɔ̌, dǎkaxixo ɖo toxóɖiɖɔ linu kpó kínklán kpó ná nɔ ayǐ káká sɔ́yi ǎ.

 Biblu tínmɛ ɖɔ Mawu ná sɔ́ acɛkpikpa éɖésúnɔ tɔn e ɖo jǐxwé é dó ɖyɔ́ acɛkpikpa gbɛtɔ́ lɛ́ tɔn lɛ́ bǐ ná.

•   “Axɔ́sú énɛ́ lɛ́ sín hwenu ɔ, Mawu sɛ́xwé tɔn ná ɖe axɔ́súɖuto e mɛɖé má sixú gba ǎ é ɖokpó tɔ́n. . . . Axɔ́súɖuto énɛ́ ɔ ná gba axɔ́súɖuto e ko ɖo ayǐ lɛ́ bǐ, bó ná hu acɛ nú yě, bɔ yě sɔ́ ná tíin nyǐ ǎ. Loɔ, éyɛ́ ná nɔ te káká sɔ́yi.”—Daniyɛ́li 2:44.

 Axɔ́súɖuto Mawu tɔn ná dɔn gbɛtɔ́ lɛ́ ɖó bǔ nǔgbó nǔgbó bo ná bló bɔ fífá ná tíin gbɔn gbɛ ɔ bǐ mɛ.

•   Axɔ́sú Axɔ́súɖuto énɛ́ tɔn Jezu Klísu wɛ è nɔ ylɔ́ ɖɔ “Gǎn fífánɔ” ɔ; é ná bló bɔ “fífá e má ná vɔ gbeɖé ǎ ɔ ná tíin.”—Ezayíi 9:5, 6.

•   Din hwɛ̌ ɔ, toví tɔn lɛ́ ɖo lěe yě ná nɔ fífá mɛ gbɔn é kplɔ́n wɛ. Wǎgbɔ tɔn ɔ, Biblu ɖɔ: “Yě ná zé hwǐ yětɔn lɛ́ dó tun alǐn ná, bó ná zé gǎ yětɔn lɛ́ dó tun aɖǎ ná. Akɔta ɖě sɔ́ ná tɔ́n ahwan ɖě ǎ. Mɛɖé sɔ́ ná kplɔ́n lěe è nɔ fun ahwan gbɔn é ǎ.”—Ezayíi 2:3, 4.

 Bónú a ná ɖó mɔjɛmɛ ɖěvo lɛ́ hǔn, xa xóta “Etɛ Axɔsuɖuto Mawu Tɔn ka Na Wà?” bo lɛ́ kpɔ́n video Étɛ́ ka nyí Axɔ́súɖuto Mawu tɔn?