Gbɛtɔ́ lǐva atɔ́ɔ́n mɔ̌ wɛ è ɖó nukún ɖɔ yě ná kpɔ́n anyǔmlímlísafɔ sín agbahwlɛ́nhwlɛ́n gbɛ ɔ bǐ tɔn sín 20 novembre jɛ 18 décembre 2022. Mɛ gěgé lin ɖɔ lanmɛ bibakpɔ́n sín nǔwiwa mɔ̌hun lɛ́ sixú zɔ́n bɔ gbɛtɔ́ lɛ́ nɔ bǔ, b’ɛ ná nyí nǔ wɛ yě ná nɔ kpɔ́ bo kpɔ́n kpowun ǎ.

•   “Lɔ̌nyijǐ-fɔnkan yihúndida ɖó hlɔ̌nhlɔ́n bo ná húzú gbɛ ɔ. É ɖó hlɔ̌nhlɔ́n bo ná bló bɔ akpakpa ná sɔ́ mɛ. É ɖó hlɔ̌nhlɔ́n bo ná xo gbɛtɔ́ lɛ́ kplé ɖo ali e ma kpé we ǎ é nu.”—Nelson Mandela, togán xóxó Afrique du Sud tɔn.

•   “Anyǔmlímlísafɔ nɔ xo mɛ lɛ́ kplé ɖó é nɔ bló bɔ yě nɔ ɖó nukúnɖíɖó, ɖó awǎjijɛ, ɖó jlǒ syɛ́nsyɛ́n, bló bɔ yě nɔ yí wǎn nú mɛ ɖěvo lɛ́, bo nɔ lɛ́ bló bɔ yě nɔ mɔ ɖɔ yě kpó mɛ ɖěvo lɛ́ kpó ɖó nǔɖé ɖo bǔ.”—Gianni Infantino, gǎn e kp’acɛ nú FIFA é. a

 Anyǔmlímlísafɔ sín agbahwlɛ́nhwlɛ́n gbɛ ɔ bǐ tɔn alǒ lɔ̌nyijǐ-fɔnkan núwiwa ɖěvo ɖěbǔ ka sixú kpé nǔ ɖagbe mɔ̌hun lɛ́ wú dóó a? Nukúnɖíɖó ɖé ka ɖe bónú gbɛtɔ́ lɛ́ ná nɔ fífá mɛ, bo lɛ́ nɔ bǔ a?

 Anyǔmlímlísafɔ sín agbahwlɛ́nhwlɛ́n gbɛ ɔ bǐ tɔn xwe élɔ́ mɛ tɔn zɔ́n bɔ mɛ lɛ́ lin tamɛ dó nǔ ɖěvo lɛ́ jí, ényí dó anyǔmlímlísafɔ kɛ́ɖɛ́ jí ǎ. Ayihún ɔ dɔn nǔdindɔn wá ɖo gbɛtɔ́ lɛ́ kpó toxóɖiɖɔ kpó kpáxwé, bɔ è kɛ nu dó acɛ e gbɛtɔ́ ɖó lɛ́ é, akɔ klánklán kpó zɛ̌nzɛ̌n e gbɛtɔ́ lɛ́ ma ɖe ɖo akwɛ́ linu ǎ é kpó wú.

 É ɖo mɔ̌ có, mɛ gěgé yí wǎn nú lɔ̌nyijǐ-fɔnkan yihúndida núwiwa e è nɔ bló gbɔn gbɛ ɔ mɛ lɛ́ é, ɖi anyǔmlímlísafɔ sín agbahwlɛ́nhwlɛ́n gbɛ ɔ bǐ tɔn ɖɔhun mɔ̌. Gbɛtɔ́ lɛ́ nɔ ba tawun ɖɔ nǔwiwa énɛ́ lɛ́ ní dɔn bǔninɔ wá có, nǔwiwa énɛ́ lɛ́ ka sixú bló bónú gbɛtɔ́ lɛ́ nɔ bǔ káká sɔ́yi ǎ. É nyɔ́ wa ɔ, hwɛhwɛ ɔ, kínklán sín linlin e gbɛtɔ́ lɛ́ ná ɖó bɔ Biblu ɖɔ é ná nyí wuntun e ná ɖe “azǎn gǔdo gúdo tɔn lɛ́” xlɛ́ é wɛ nɔ tɔ́n ɖo nǔwiwa énɛ́ lɛ́ hwenu.—2 Timɔtée 3:1-5.

 Nukúnɖíɖó ɖokpó géé e ná dɔn gbɛ ɔ bǐ ɖó bǔ é ɖo Biblu mɛ. É d’akpá ɖɔ gbɛtɔ́ e ɖo ayǐkúngban ɔ jí lɛ́ é bǐ ná nɔ bǔ ɖo acɛkpikpa jǐxwé tɔn e è nɔ ylɔ́ ɖɔ “Axɔ́súɖuto Mawu tɔn” é glɔ́.—Luki 4:43; Matíe 6:10.

 Mɛ e nyí Axɔ́sú nú Axɔ́súɖuto énɛ́ é, Jezu Klísu, ná mɔ nǔ jɛ wú ɖɔ fífá tíin gbɔn gbɛ ɔ bǐ mɛ. Biblu ɖɔ:

•   “Hwɛjijɔ ní gba kpé axɔ́sú ɔ hwenu, bɔ nú sun vɛ́ ko nɔ tɔ́n ɔ, vivo [alǒ fífá] ní tíin ɖo to ɔ mɛ.”—Ðɛhan 72:7.

•   “É ná hwlɛ́n wamamɔnɔ e ɖo xó sú wɛ ɔ . . . É ná yí yě sín mɛ e nɔ kpa acɛ gannaganna lɛ́ kpó dǎkaxotɔ́ lɛ́ kpó sí.”—Ðɛhan 72:12, 14.

 É ná bo tlɛ nyí ɖo égbé ɔ, nǔkplɔ́nmɛ Jezu tɔn lɛ́ ko dɔn gbɛtɔ́ lǐvi mɔ̌kpán ɖó bǔ ɖo to 239 mɛ. Yě kplɔ́n bo jó wǎngbɛ́númɛ dó. Ényí a ba ná tuun nǔ ɖěvo lɛ́ d’é jí hǔn, xa xóta ɖěbɔdóɖěwú élɔ́ lɛ́: “Lěe è sixú ɖu ɖo wǎngbɛ́númɛ jí gbɔn é.”