Gǎn gbɛ ɔ tɔn lɛ́ kpó tutoblónúnǔ e gbɔn gbɛ ɔ mɛ lɛ́ é kpó kpé wú bo hɛn fífá wá ǎ. Tohwan syɛ́nsyɛ́n e tíin din lɛ́ é ɖě ko tíin sín Wɛ̌kɛ́hwan wegɔ́ ɔ hwenu ǎ. Gbɛtɔ́ lǐva we mɔ̌, énɛ́ wɛ nyí vlɔ̌ ɖó ɛnɛ gbɛtɔ́ e ɖo gbɛ ɔ mɛ lɛ́ é tɔn, wɛ nɔ nɔ xá e mɛ ahwan énɛ́ lɛ́ ɖo nǔ gba ɖe wɛ lɛ́ é mɛ.

 Étɛ́wú gbɛtɔ́ lɛ́ ma ka sixú hɛn fífá wá ǎ? Étɛ́ Biblu ka ɖɔ?

1.  1. Gbɛtɔ́ lɛ́ nɔ ɖe jijɔ ɖěɖěe nɔ zɔ́n bɔ tíntɛ́nkpɔ́n vɔ́vɔ́ bo nɔ fífá mɛ xá mɛ ɖěvo lɛ́ nɔ vɛ́ wǔ é xlɛ́. Biblu ɖɔ ɖ’ayǐ ɖɔ ɖo hwe mǐtɔn nu ɔ, “gbɛtɔ́ lɛ́ ná nɔ nyí cejɛ́nnábínɔ, yě ná nɔ yí wǎn nú akwɛ́, yě ná nɔ jlá ajɔ̌ nú yěɖée, yě ná nɔ yí go, . . . yě ná nɔ nɔ gbejí ǎ, . . . yě ná nɔ ɖó gbe kpɔ́ ǎ, . . . yě ná nɔ ɖu ɖo yěɖée jí ǎ, yě ná nɔ nylá hun, . . . yě ná nɔ syɛ́n ta, yě ná nɔ yi go zɛ xwé wú.”—2 Timɔtée 3:2-4.

2.  2. Gbɛtɔ́ lɛ́ ɖokpó ɖokpó alǒ ɖi kplékplé ɖé ɖó nǔwúkpíkpé ɔ bo ná ɖe ɖɛ tagba yětɔn lɛ́ alɔdó Gbɛɖótɔ́ yětɔn Jexóva a Mawu tɔn mɛvo ǎ. Biblu ɖɔ ɖɔ ‘gbɛtɔ́ ɖésú kún sixú xlɛ́ ali e é ná gbɔn é éɖée ó.’—Jelemíi 10:23.

3.  3. Gbɛ ɔ ɖo acɛkpatɔ́ nyanya agbɔ̌nnɔ Satáan Awǒvi, éé “ɖo ayǐkúngban ɔ bǐ flú wɛ” é sín acɛ mɛ. (Nǔɖexlɛ́mɛ 12:9) Nú “gbɛ ɔ bǐ ɖo mɛ nyanya ɔ sín acɛ mɛ” jɛ́n wɛ ɔ, ahwan kpó tagba kpó ná hán ǎ.—1 Jaan 5:19.

 Biblu ná gǎnjɛwú mǐ ɖɔ fífá kún ná wá gbɔn gǎndídó gbɛtɔ́ tɔn gblamɛ ó, é nyɔ́ wa ɔ, Mawu wɛ ná hɛn wá.

•   “Ðó nyɛ Mawu Mavɔmavɔ ɔ, un tuun tito e un sɔ́ ɖó te nú mi é; fífá wɛ un sɔ́ ɖó te nú mi, é nyí nǔ nyanya wɛ un sɔ́ ɖó te nú mi ǎ, bónú sɔ ná nyɔ́ nú mi.”—Jelemíi 29:11.

 Nɛ̌ Mawu ka ná ɖe akpá énɛ́ gbɔn? “Mawu e nɔ ná fífá mɛ é ná nyínyɛ́ Satáan.” (Hlɔ̌manu lɛ́16:20) Mawu ná zán acɛkpikpa tɔn jǐxwé tɔn e Biblu ylɔ́ ɖɔ “Axɔ́súɖuto Mawu tɔn” é dó bló bɔ fífá ná tíin gbɔn gbɛ ɔ bǐ mɛ. (Luki 4:43) Ðo Jezu Klísu e nyí Axɔ́sú nú Axɔ́súɖuto énɛ́ é glɔ́ ɔ, gbɛtɔ́ lɛ́ ná kplɔ́n lěe è nɔ nɔ fífá mɛ gbɔn é.—Ezayíi 9:5, 6.

•   Nú a ná ɖó mɔjɛmɛ d’é jí hǔn, xa xóta “Étɛ́ lɛ́ Axɔ́súɖuto Mawu tɔn ka ná wa?”