Xógbe wǎngbɛ́númɛ tɔn lɛ́, dǎka xixo ɖó wǎngbɛ́númɛ wú, dǎka xixo mɛ e nyí akɔ ɖěvo lɛ́ é wú kpó ahwanfunfun kpó sín xó wɛ gɔ́ gbɛ ɔ mɛ.

•   “É sín ahwan e ɖo Israël kpó Gaza kpó tɛ́ntin é, kpódó mɛ ɖěɖěe nɔ sɔ́ dǎkaxixo kpó wǎngbɛ́númɛ kpó ɖó ajo lɛ́ é kpán wú bɔ è nɔ se wǎngbɛ́númɛ sín xó lɛ́ din tawun hú ɖ’ayǐ tɔn ɖo tɛn Ɛntɛnɛ́ti tɔn e jí è nɔ zun xɔ́ntɔn ɖé lɛ́ é jí.”—The New York Times, 15 novembre 2023.

•   “Sín azǎn 7​gɔ́ octobre tɔn ɔ, wǎngbɛ́númɛ sín xó lɛ́ kpó dǎkaxixo e nɔ sín linlin agɔ ɖíɖó dó mɛ wú wú é kpó yá wǔ jɛjí tawun hú lěe yě ko ɖe ɖ’ayǐ é.”—Dennis Francis, Gǎn e xwe aza nú Gbɛ̌ kplékplé akɔta lɛ́ tɔn sín Assemblée générale é, 3 novembre 2023.

 Wǎngbɛ́númɛ sín xó lɛ́, dǎkaxixo kpó ahwan kpó nyí nǔ yɔ̌yɔ́ ǎ. Nǔgbó ɔ, Biblu ɖɔ dó mɛ e nɔ gbɛ hwexónu é ɖé lɛ́ wú ɖɔ “xó baɖabaɖa e nɔ tɔ́n sín nu yětɔn mɛ ɔ aɖǐga wɛ,” lobɔ yě nɔ nya ahwanfunfun kpó dǎkaxixo kpó gbé. (Ðɛhan 64:4; 120:7; 140:1) É ɖo mɔ̌ có, Biblu tínmɛ ɖɔ wǎngbɛ́númɛ e mɔ wɛ mǐ ɖe égbé é ɖó tínmɛ tají ɖé.

 Biblu kɔ́n sɛ sín hwɛjijɔ e wú wǎngbɛ́númɛ gba kpé égbé é we jí.

1.  1. É ɖɔ ɖ’ayǐ ɖɔ hwenu ɖé ná tíin bɔ “wǎnyíyí mɛ gěgé tɔn ná fá.” (Matíe 24:12) Gbɛtɔ́ lɛ́ ná nɔ yí wǎn nú mɛ ǎ, é nyɔ́ wa ɔ, yě ná nɔ ɖó zǐnzán ɖěɖěe ná zɔ́n bɔ mɛ lɛ́ ná nɔ gbɛ́ wǎn nú yěɖée lɛ́ é.—2 Timɔtée 3:1-5.

2.  2. Lě do wǎngbɛ́númɛ syɛ́n sɔ égbé é xlɛ́ ɖɔ Satáan Awǒvi ɖo nǔ baɖabaɖa wa dó gbɛ ɔ wú wɛ tawun. Biblu ɖɔ ɖɔ “gbɛ ɔ bǐ ɖo mɛ nyanya ɔ sín acɛ mɛ.”—1 Jaan 5:19; Nǔɖexlɛ́mɛ 12:9, 12.

 É ɖo mɔ̌ có, Biblu lɛ́vɔ́ ɖe xlɛ́ ɖɔ Mawu ná sú kún dó nú nǔ e nɔ dɔn wǎngbɛ́númɛ wá lɛ́ é ɖo malínmálín mɛ. Gɔ́ ná ɔ, é ná lɛ́ ɖe wǔvɛ́ e wǎngbɛ́númɛ ko dɔn nyi ayǐ lɛ́ é bǐ síin. Biblu d’akpá ɖɔ:

•   Mawu “ná súnsún ɖasin bǐ sín nukún yětɔn mɛ, kú sɔ́ ná tíin ǎ; mɔ̌ jɛ́n aluwɛ alǒ alěníná alǒ wǔvɛ́ ma sɔ́ ná tíin ǎ é nɛ́. Nǔ xóxó lɛ́ ko bú.”—Nǔɖexlɛ́mɛ 21:4.