“Din wɛ nyí hwenu ɔ, bɔ è ná bló bɔ ninɔmɛ élɔ́ ná túntún da kpo, bɔ nǔ nyanya ná ɖe kpo. Din wɛ nyí hwenu ɔ, bɔ mǐ ná dó gǎn tawun bá ɖu ɖo mǐɖée jí.” Xó e António Guterres, éé nyí wěgbójínɔtɔ́ ɖaxó Gbɛ̌ kplékplé akɔta lɛ́ tɔn é ɖɔ dó ahwan e Iran tɔ́n Israël tlɔlɔ ɖo samedi 13 avril 2024 é wú é nɛ́.

 Nǔ e ɖo jijɛ wɛ gbɔn gbɛ ɔ bǐ mɛ é sín kpɔ́ndéwú ɖokpó kpowun wɛ nyí ahwan e fun wɛ è ɖe ɖo gbadahwe jí Azíi tɔn é.

 “Sín hwenu e è fun Wɛ̌kɛ́hwan wegɔ́ ɔ é ɔ, ahwanfunfun sín kɛ́n fɔ́n bo ɖo jijɛjí wɛ ɖo gbɛ ɔ mɛ, bɔ gbɛtɔ́ lǐva we, énɛ́ wɛ nyí mǎ ɖó ɛnɛ mɛ e gbɔn gbɛ ɔ mɛ lɛ́ é bǐ tɔn wɛ ɖo xɔxɔ tɔn se wɛ.”—Kplékplé e nɔ ɖɔ nǔ dó ayijayǐxó wú ɖo Gbɛ̌ kplékplé akɔta lɛ́ tɔn mɛ é, 26 janvier 2023.

 Israël, Gaza, Syrie, Azerbaïdjan, Ukraine, Soudan, Éthiopie, Niger, Birmanie kpó Haïti kpó ɖo fí ɖěɖěe ahwan ɖo nǔ gba ɖe wɛ lɛ́ é mɛ. a

 Hwetɛ́nu ahwan ka ná ɖó te? Acɛkpatɔ́ gbɛ ɔ tɔn lɛ́ ka sixú hɛn fífá wá a? Étɛ́ Biblu ka ɖɔ?

 Ahwan e fun wɛ è ɖe gbɔn gbɛ ɔ bǐ mɛ ɖo égbé lɛ́ é xlɛ́ ɖɔ zaanɖé din ɔ, ahwanxó ná yi tó. Ahwan énɛ́ lɛ́ ɖo blǒbló wɛ bɔ nǔɖɔɖayǐ Biblu tɔn e ɖɔ xó dó hwenu e nɔ gbɛ ɖe wɛ mǐ ɖe é wú é ɖo jijɛnu wɛ. Biblu ylɔ́ hwenu e nɔ gbɛ ɖe wɛ mǐ ɖe é ɖɔ “azǎn gǔdo gúdo tɔn gbɛ élɔ́ tɔn lɛ́.”—Matíe 24:3.

•   “Mi ná se ahwanfunfun sín zǐngídi . . . bo ná se ahwanfunfunxó. . . . Akɔta ɖě ná tɔ́n ahwan ɖě, bɔ axɔ́súɖuto ɖě ná tɔ́n ahwan ɖě.”—Matíe 24:6, 7.

 Xa xóta “Étɛ́ ka nyí wuntun “azǎn gǔdo gúdo tɔn lɛ́,” alǒ “hwenu e gbɛ élɔ́ ná vɔ dó ɔ” tɔn lɛ́?” bá mɔ lěe ahwan e fun wɛ è ɖe ɖo égbé lɛ́ é ɖo blǒbló wɛ bɔ nǔɖɔɖayǐ Biblu tɔn lɛ́ ɖo jijɛnu wɛ gbɔn é.

 Biblu ɖɔ ɖ’ayǐ ɖɔ ahwan e fun wɛ gbɛtɔ́ lɛ́ ɖe é ná wá ɖó te. Nɛ̌ nǔ ka ná nyí mɔ̌ gbɔn? Hlɔ̌nhlɔ́n gbɛtɔ́ tɔn wɛ ná zɔ́n ǎ, é nyɔ́ wa ɔ, “ahwan e è ná fun ɖo Mawu Nǔbǐwúkpétɔ́ ɔ sín azǎn ɖaxó ɔ gbe é” wɛ ná zɔ́n bɔ nǔ ná nyí mɔ̌. (Nǔɖexlɛ́mɛ 16:14, 16, nwt) Ahwan énɛ́ ná hun ali nú Mawu bɔ é ná ɖe akpá e é dó nú gbɛtɔ́ lɛ́ ɖɔ yě ná ɖu fífá e ma ná vɔ gbeɖé ǎ é sín vǐví é.—Ðɛhan 37:10, 11, 29.

 Nú a ná kplɔ́n nǔ gěgé d’é jí dó lěe ahwan Mawu tɔn ná ɖó nǔ ahwan lɛ́ bǐ nu gbɔn é wú hǔn, xa xóta “Étɛ́ ka nyí ahwan Aamagedɔ́ni tɔn?”