Lěe ahwan e fun wɛ è ɖe ɖo Ukraine é xlɛ́ gbɔn é ɔ, sinsɛngán sinsɛn klisánwun gěgé tɔn wɛ ɖo gǔdo nú ahwan e fun wɛ è ɖe é. Ðǒ ayi lěe sinsɛngán lɛ́ ɖo gǔdo nú akpáxwé we e ɖo ahwan ɔ fun wɛ lɛ́ gbɔn é wú:

•   “Ahwanfuntɔ́ mǐtɔn ɖěɖěe ɖo hun jɛ dó to yětɔn Ukraine jí wɛ, ɖo mɛ e wá tɔ́n ahwan mǐ lɛ́ é lɔ mɛ lɛ́ é sín nǔ su nukún mǐtɔn mɛ, bɔ mǐ kpa susu nú yě . . . Mǐ ɖo kpɔ́ xá mi, ɖo ɖɛ xo dó ta mitɔn mɛ wɛ dó nǔjɔnǔ mɛ, bo lɛ́ ɖo gǔdo nú mi hwebǐnu.”—Xó e sinsɛngán Epiphane I Kiev tɔn ɖɔ, bɔ é tɔ́n ɖo The Jerusalem Post mɛ, ɖo 16 mars 2022 é.

•   “Sinsɛngán Sinsɛn orthodoxe Russie tɔn tɔn bló amǐsa ɖé nú sɔ́ja Russie tɔn lɛ́ ɖo aklúnɔzángbe e wá yi é bo dó wǔsyɛ́n lanmɛ nú yě ɖɔ yě ní jɛ hun dó to yětɔn jí ‘lěe Russie-nu lɛ́ kɛ́ɖɛ́ jɛ́n sixú bló gbɔn é,’ Moscou ka ko ɖó ahwan e fun wɛ é ɖe ɖo Ukraine é te ǎ.”—Reuters, 3 avril 2022.

 Klisánwun lɛ́ ka ɖó ná ɖ’alɔ ɖo ahwan mɛ wɛ a? Étɛ́ Biblu ka ɖɔ?

 Biblu ɖe xlɛ́ ɖɔ mɛ e nɔ xwedó Jezu Klísu nǔgbó nǔgbó lɛ́ é kún ɖó ná fun ahwan ó.

•   “Lɛ̌ sɔ́ hwǐ towe ɖó tɛn tɔn mɛ, ɖó mɛ e sɔ́ hwǐ dó mɛ jí lɛ́ é bǐ wɛ ná kú hwǐ kú.”—Matíe 26:52.

   Mɛ e yí gbe bɔ è ɖo ahwan fun wɛ é alǒ mɛ e ɖo alɔ ɖó ɖ’é mɛ wɛ é ka sixú ɖɔ ɖɔ émí ɖo tónú se nú xó Jezu tɔn lɛ́ wɛ a?

•   “Un ɖo sɛ́n yɔ̌yɔ́ ɖokpó ná mi wɛ, é wɛ nyí ɖɔ mi ní yí wǎn nú miɖée lɛ́; lěe un yí wǎn nú mi gbɔn é ɔ, mi lɔ ní yí wǎn nú miɖée lɛ́ gbɔn mɔ̌. Ényí mi yí wǎn nú miɖée lɛ́ ɔ, mɛ lɛ́ bǐ ná tuun ɖɔ mi nyí ahwanvú ce lɛ́.”—Jaan 13:34, 35.

   Mɛ e ɖo gǔdo nú ahwan é ka ɖo wǎnyíyí alɔkpa e xó Jezu ɖɔ é ná ɖe ahwanvú émítɔn lɛ́ xlɛ́ é ɖe xlɛ́ wɛ a?

 Nú a ná mɔ nǔ ɖěvo lɛ́ d’é jí hǔn, xa xóta “Peut-​on concilier guerre et christianisme ?”

 É ka sɔgbe ɖɔ è ní ɖó nukún ɖɔ klisánwun lɛ́ ní ma fun ahwan ó ɖo égbé a? Ganjí. Biblu ɖɔ ɖ’ayǐ ɖɔ ɖo hwe mǐtɔn nu, hwenu e è ylɔ́ ɖɔ ‘azǎn gǔdo gúdo tɔn lɛ́ é’ ɔ, gbɛtɔ́ lɛ́ ná gosín akɔta lɛ́ bǐ mɛ bo “sɔ́ ná kplɔ́n lěe è nɔ fun ahwan gbɔn é” ǎ, sɔgbe xá nǔkplɔ́nmɛ Jezu tɔn lɛ́.—Ezayíi 2:2, 4.

•   Nú a ná ɖó mɔjɛmɛ ɖěvo lɛ́ d’é jí hǔn, xa xóta ɖěbɔdóɖěwú “La guerre : qu’en pense Dieu ?” éé tɔ́n ɖo Atɔxwɛ mɛ lɛ́ é.

 Zaanɖé din ɔ, Jexóva, a “Mawu e nɔ ná fífá” mɛ é, ná zán acɛkpikpa tɔn jǐxwé tɔn ɔ dó hwlɛ́n gbɛtɔ́ lɛ́ sín “mɛ e nɔ kpa acɛ gannaganna lɛ́ kpó dǎkaxotɔ́ lɛ́ kpó sí.”—Filípunu lɛ́ 4:9; Ðɛhan 72:14.

•   Ényí a ná tuun lěe é ná wa mɔ̌ gbɔn é hǔn, kpɔ́n video Étɛ́ ka nyí Axɔ́súɖuto Mawu tɔn?