Gbe e Gbɛ̌ kplékplé akɔta lɛ́ tɔn ɖó é ɖíe:

•   Sín 7 octobre jɛ 23 octobre 2023 ɔ, ahwan e ɖo Gaza kpó Israël kpó tɛ́ntin é ko hu gbɛtɔ́ 6400 jɛjí, bɔ mɛ 15200 jɛjí gblé wǔ; toví kpaa lɛ́ wɛ ka nyí gěgé mɛ énɛ́ lɛ́ tɔn. Gɔ́ ná ɔ, gbɛtɔ́ afatɔ́n donu kanweko mɔ̌kpán wɛ è ko sɛ tɛn ná.

•   Ðo 24 septembre 2023 ɔ, toví kpaa Ukraine tɔn 9701 wɛ ahwan e ɖo Russie kpó Ukraine kpó tɛ́ntin é ko hu, bɔ yě mɛ 17748 gblé wǔ.

 Nukúnɖíɖó tɛ́ Biblu ka ná mɛ ɖěɖěe ɖo wǔvɛ́ se wɛ ɖó ahwan wútu lɛ́ é?

 Biblu ɖɔ ɖ’ayǐ ɖɔ Mawu ná “sú ahwan kún dó gbɔn gbɛ ɔ bǐ mɛ.” (Ðɛhan 46:10) É ná sɔ́ acɛkpikpa alǒ axɔ́súɖuto jǐxwé tɔn ɖé dó ɖyɔ́ acɛkpikpa gbɛtɔ́ tɔn lɛ́ bǐ. (Daniyɛ́li 2:44) Axɔ́súɖuto Mawu tɔn ná bló bɔ gbɛtɔ́ lɛ́ ná mɔ kɔ dó sa fún.

 Kpɔ́n nǔ e Axɔ́súɖuto Mawu tɔn sín Axɔ́sú Jezu Klísu ná wa lɛ́ é:

•   “É ná hwlɛ́n wamamɔnɔ e ɖo xó sú wɛ ɔ, bo ná hwlɛ́n lelenɔ e ma ɖó ɖɔxátɔ́ ɖě ǎ é. É ná kú nǔbláwǔ nú mɛ e ma ɖó hlɔ̌nhlɔ́n ɖé ǎ lɛ́ kpó gbɛ̌dónánɔ lɛ́ kpó; é ná hwlɛ́n wamamɔnɔ lɛ́ sín gbɛ gán. É ná yí yě sín mɛ e nɔ kpa acɛ gannaganna lɛ́ kpó dǎkaxotɔ́ lɛ́ kpó sí.”—Ðɛhan 72:12-14.

 Mawu ná gbɔn Axɔ́súɖuto tɔn gblamɛ bo ná jlá hɛ̌n kpó wǔvɛ́ kpó e ahwan kpó dǎkaxixo kpó dɔn wá lɛ́ é ɖó.

•   “È ná súnsún ɖasin bǐ sín nukún yětɔn mɛ; kú sɔ́ ná tíin ǎ, aluwɛ sɔ́ ná tíin ǎ, alěníná sɔ́ ná tíin ǎ, wǔvɛ́ mimɔ sɔ́ ná tíin ǎ; nǔ xóxó lɛ́ ko bú.”—Nǔɖexlɛ́mɛ 21:4.

 Zaanɖé din ɔ, Axɔ́súɖuto Mawu tɔn ná bló bɔ hǔzúhúzú ɖaxó lɛ́ ná tíin ɖo ayǐkúngban jí. “Ahwanfunfun sín zǐngídi” kpó “ahwanfunfunxó” kpó e se wɛ mǐ ɖe égbé lɛ́ é ɔ, Biblu ko ɖɔ yě ɖ’ayǐ. (Matíe 24:6) Nǔ énɛ́ lɛ́ kpó nǔ ɖěvo e ɖo jijɛ wɛ lɛ́ é kpó xlɛ́ ɖɔ mǐ ɖo gbɛ nɔ wɛ ɖo acɛkpikpa gbɛtɔ́ tɔn sín “azǎn gǔdo gúdo tɔn lɛ́” mɛ.—2 Timɔtée 3:1.