Sɔgbe kpó nǔ e Tutomɛ gbɛ ɔ tɔn e nɔ kpé nukún dó lanmɛ ná nɔ ganjí wú é (OMS) ɖɔ é kpó ɔ, ɖo 23 mai 2022 ɔ, gbɛtɔ́ lǐvi 6,27 wɛ ko kú ɖó Covid-19 wútu. É ɖo mɔ̌ có, ɖo ɖɔnúese 5 mai 2022 tɔn ɖokpó mɛ ɔ, OMS ɖɔ ɖɔ mɛ nabí e kú é sukpɔ́ hú mɔ̌ tawun. É ɖɔ ɖɔ ɖo 2020 kpó 2021 kpó vlamɛ ɔ, “mɛ nabí e kú bɔ è sɔ́ kú yětɔn cá xá jɛmɛjí Covid-19 ɔ tlɔlɔ alǒ ɖo ali e ma nyí tlɔlɔ tɔn ǎ é nu é . . . yi lǐvi 14,9 mɔ̌.” Biblu ka ɖɔ nǔɖé dó nǔ baɖabaɖa mɔ̌hun e nɔ gba ayi dó nú mɛ lɛ́ é wú a?

•   Jezu ɖɔ ɖ’ayǐ ɖɔ jɛmɛjí, alǒ “azɔn baɖabaɖa lɛ́” ná tíin ɖo hwenu e è nɔ ylɔ́ ɖɔ “azǎn gǔdo gúdo tɔn lɛ́” é mɛ.—Luki 21:11, La Bible. Parole de Vie; 2 Timɔtée 3:1.

 Nǔɖɔɖayǐ Jezu tɔn ɖo jijɛnu wɛ égbé. Nú a ná ɖo mɔjɛmɛ d’é jí hǔn, xa xóta “Étɛ́ ka nyí wuntun ‘azǎn gǔdo gúdo tɔn lɛ́,’ alǒ ‘hwenu e gbɛ élɔ́ ná vɔ dó ɔ’ tɔn lɛ́?”

•   “Mawu e nɔ dó gbɔ nú mɛ ɖo ali bǐ nu é . . . nɔ dó gbɔ nú mǐ, ɖo wǔvɛ́ e mǐ nɔ mɔ lɛ́ bǐ mɛ.”—2 Kɔlɛ́ntinu lɛ́ 1:3, 4.

 Wɛn e ɖo Biblu mɛ é ko ɖ’alɔ akɔ́n jí nú mɛ e sín mɛ vívɛ́ná ko kú lɛ́ é gěgé. Nú a ná ɖó mɔjɛmɛ d’é jí hǔn, xa xóta “Akọndidona Awufiẹsa lọ—Nuhe A Gán Wà Todin” kpó “Alọgọ Dagbe Hugan lọ Na Mẹhe Ṣiọ Kú Do Lẹ” kpó.

•   “Axɔ́súɖuto towe ní wá. Jlǒ towe ní nyí wiwa ɖo ayǐkúngban ɔ lɔmɔ̌ jí, lěe é nɔ nyí wiwa ɖo jǐxwé gbɔn é ɖɔhun.”—Matíe 6:10, nwt.

 Zaanɖé din ɔ, “Axɔ́súɖuto Mawu tɔn” ná bló bɔ “toví ɖé sɔ́ ná ɖɔ: ‘Un ɖo azɔn jɛ wɛ’ ǎ.” (Maki 1:14, 15; Ezayíi 33:24) Kpɔ́n video Étɛ́ ka nyí Axɔ́súɖuto Mawu tɔn? bá ɖó mɔjɛmɛ ɖěvo lɛ́ dó acɛkpikpa énɛ́ e ɖo jǐxwé é kpó nǔ e é ná wa lɛ́ é kpó wú.

 Mǐ byɔ́ we ɖɔ a ní ba do nú nǔ ɖěvo lɛ́ dó nǔ e Biblu ɖɔ lɛ́ é jí, bónú hwi kpó xwédo towe kpó ná ɖu wěɖexámɛ e nǔnywɛ́ kpé bo ɖ’é mɛ lɛ́ é kpó akpá jí wǔ e xó é ɖɔ lɛ́ é kpó sín le.