É ka nɔ cí nú we ɖɔ é ɖo wǔ vɛ́ hú gǎn wɛ bɔ è ná tuun nǔgbó ɖó vo nú adingban wɛ a? É cí ɖɔ ɖo égbé ɔ, mɛ lɛ́ nɔ kú dó lěe nǔ nɔ cí nú yě é kpó linlin yěɖésúnɔ tɔn lɛ́ kpó jí hú gǎn nǔ e nyí nǔgbó é kpó xlɛ̌ e jɛ wě lɛ́ é kpó jí ɖɔhun. Mɛ gěgé nɔ lin ɖo gbɛ ɔ mɛ égbé ɖɔ nǔ ɖě kún sɔ́ nyí nǔgbó bo tíin ó.

 Linlin énɛ́ nyí nǔ yɔ̌yɔ́ ǎ. Xwe 2000 mɔ̌ ɖíe ɔ, tokpɔngán Pɔ́nsu Pilátu kanbyɔ́ Jezu ɖɔ: “Étɛ́ ka nyí nǔgbó ɔ?” (Jaan 18:38) Pilátu ɖo nukún ɖó xósin wɛ hwenɛ́nu ǎ có, nǔkanbyɔ́ tɔn ka ɖo tají. Xósin e Biblu ná é sixú jɛmɛ nú we, bo lɛ́ d’alɔ we bɔ a ná tuun nǔgbó ɖó vo nú adingban, ɖo égbé e mɔ̌ wiwa nɔ vɛ́ wǔ nú mɛ lɛ́ é.

Nǔgbó ka tlɛ tíin lɔ a?

 Ganjí. Biblu nɔ zán xókwín “nǔgbó” dó dó gesí nǔ e ɖó kúnnuɖenú lɛ́ é, gɔ́ nú nǔ e sɔgbe ɖo walɔ ɖagbe linu lɛ́ é. Biblu kplɔ́n mɛ ɖɔ Jexóva a Mawu wɛ nyí jɔtɛn nǔgbó e nǔ bǐ vɔ ɖ’é wú é tɔn, bo ylɔ́ ɛ ɖɔ “Mawu nǔgbóɖɔtɔ́.” (Ðɛhan 31:5, nwt) Nǔgbó e gosín Mawu gɔ́n é wɛ ɖo Biblu mɛ, bɔ è sɔ́ jlɛ́ dó wěziza wú, ɖó é sixú xlɛ́ ali mǐ ɖo gbɛ égbé tɔn e wlú bǐ é mɛ.—Ðɛhan 43:3; Jaan 17:17.

Nɛ̌ a ka sixú mɔ nǔgbó ɔ gbɔn?

 Mawu jló ɖɔ mǐ ní yí gbe nú nǔgbó e ɖo Biblu ɔ mɛ é mɔ̌tɔn mɔ̌tɔn kpowun ǎ. É nyɔ́ wa ɔ, é dó wǔsyɛ́n lanmɛ nú mǐ ɖɔ, mǐ ní gbéjé Biblu ɔ kpɔ́n, gbɔn nǔwúkpíkpé tamɛ linlin tɔn mǐtɔn zínzán gblamɛ, é ní ma nyí gbɔn lěe nǔ nɔ cí nú mǐ é wú gíngánjɛ gblamɛ ó. (Hlɔ̌manu lɛ́ 12:1) É jló ɖɔ mǐ ní kplɔ́n bo tuun émí, lobo lɛ́ yí wǎn nú émí kpó “linlin [mǐtɔn] bǐ” kpó; é lɛ́ dó wǔsyɛ́n lanmɛ nú mǐ ɖɔ mǐ ní nɔ gbéjé kpɔ́n ɖɔ nǔ e mǐ kplɔ́n ɖo Biblu mɛ lɛ́ é nyí nǔgbó a jí.—Matíe 22:37, 38; Mɛsɛ́dó 17:11.

Fítɛ́ adingbanɖíɖó ka bɛ́sín?

 Biblu ɖɔ ɖɔ adingbanɖíɖó bɛ́sín kɛntɔ́ Mawu tɔn Satáan Awǒvi jí. Biblu ɖɔ ɖɔ é wɛ “dó adingban wá.” (Jaan 8:44) É ɖó adingban nú gbɛtɔ́ nukɔntɔn lɛ́ dó Mawu wú. (Bǐbɛ́mɛ 3:1-6, 13, 17-19; 5:5) Sín hwenɛ́nu ɔ, Satáan kpo ɖo adingban fúnfún kpé wɛ, bo lɛ́ ɖo nǔgbó e kunkplá Mawu é hwlá dó mɛ lɛ́ wɛ.—Nǔɖexlɛ́mɛ 12:9.

Étɛ́wú adingbanɖíɖó ka gba kpé sɔmɔ̌ ɖo égbé?

 Satáan ɖo gbɛtɔ́ lɛ́ blɛ́ wɛ hú gǎn ɖo hwe mǐtɔn nu e Biblu ylɔ́ ɖɔ “azǎn gǔdo gúdo tɔn lɛ́” é. Mɛ lɛ́ nɔ ɖó adingban bo ná dó flú mɛ ɖěvo lɛ́, lobo xo yě ɖu. (2 Timɔtée 3:1, 13) Adingban lɛ́vɔ́ gɔ́ sinsɛn gěgé mɛ ɖo égbé. Lěe Biblu ɖɔ ɖ’ayǐ dó hwenu mǐtɔn wú gbɔn é ɔ, gbɛtɔ́ lɛ́ “nɔ kplé nǔkplɔ́nmɛtɔ́ lɛ́ lɛ́ lɛ̌ dó yěɖée, bónú yě ná nɔ ɖɔ xó víví dó tó mɛ nú yě,” bɔ yě nɔ wá gbeta ɔ kɔn ɖɔ ‘émí kún ná ɖótó nǔgbó ɔ ó.’—2 Timɔtée 4:3, 4.

Étɛ́wú nǔgbó ka ɖo tají?

 Nǔgbó ɖo tají cóbɔ gbɛtɔ́ lɛ́ ná ɖeji dó yěɖée lɛ́ wú. Jiɖiɖe mɛvo ɔ, xɔ́ntɔn zunzun kpó kancícá e ɖo gbɛtɔ́ lɛ́ tɛ́ntin é kpó nɔ lí dǒ ǎ. Biblu ɖɔ ɖɔ Mawu jló ɖɔ sɛn e mǐ nɔ sɛn émí é ní jínjɔ́n nǔgbó jí. É ɖɔ: “Mɛ ɖěɖěe ɖo sinsɛn ɛ wɛ lɛ́ é ɖó ná sɛn ɛ ɖo gbigbɔ kpó nǔgbó kpó mɛ.” (Jaan 4:24) Nú a jló ná kplɔ́n nǔ dó lěe nǔgbó e ɖo Biblu mɛ é sixú d’alɔ we bɔ a ná tuun adingban sinsɛn tɔn lɛ́, bɔ yě ma sɔ́ ná ɖó acɛ dó gbɛzán towe jí ɖě ǎ é hǔn, xa xóta ɖěbɔdóɖěwú “Des mensonges qui empêchent d’aimer Dieu.”

Étɛ́wú Mawu ka jló ɖɔ má tuun nǔgbó ɔ?

 Mawu jló ɖɔ a ní mɔ hwlɛngán, bɔ a ka ɖó ná kplɔ́n nǔgbó ɔ dó wǔ tɔn cóbɔ nǔ ná nyí mɔ̌. (1 Timɔtée 2:4) Ényí a kplɔ́n nǔgbódodó Mawu tɔn e kunkplá nǔ ɖagbe kpó nǔ nyanya kpó lɛ́ é, bo nɔ zán gbɛ sɔgbe xá ɔ, a ná zun xɔ́ntɔn vívɛ́ xá ɛ. (Ðɛhan 15:1, 2) Mawu sɛ́ Jezu dó ayǐkúngban jí bo ná dó d’alɔ gbɛtɔ́ lɛ́ bɔ yě ná kplɔ́n nǔgbó ɔ. Mawu jló ɖɔ mǐ ní nɔ ɖótó nǔkplɔ́nmɛ Jezu tɔn lɛ́.—Matíe 17:5; Jaan 18:37.

Mawu ka ná wá sú kún dó nú adingbanɖíɖó gbe ɖokpó a?

 Ganjí. Nú è ɖó adingban nú mɛ ɖěvo lɛ́ dó xo yě ɖu ɔ, é nɔ vɛ́ mɔ nú Mawu. É d’akpá ɖɔ émí ná sú mɛ ɖěɖěe kán ɖ’é jí bo nɔ ɖo adingban ɖó wɛ lɛ́ é sín kún dó sín ayǐkúngban ɔ jí. (Ðɛhan 5:6) Ényí Mawu wa mɔ̌ ɔ, é ná lɛ́ bló bɔ akpá tɔn élɔ́ ná jɛnu: “Xó e nyí xó nǔgbó ɔ nɔ ɖo te tɛgbɛ.”—Nǔnywɛ́xó 12:19.