Ðo juillet 2022 ɔ, è da tú mɛ dó adǎka mɛ gbɔn gbɛ ɔ bǐ mɛ:

•   “Toxóɖɔtɔ́ nukúnɖéjí Japon tɔn [Hɔnyitɔ́xɔ́sú xóxó Shinzo Abe] e è hu é sin xomɛ nú to ɔ bǐ, bo kpácá gbɛ ɔ bǐ, ɖo tají ɔ, ɖó adǎkaxixo mɔ̌hun lɛ́ nɔ tíin ɖo Japon mɔ̌ ǎ, lobɔ sɛ́n to ɔ tɔn e kúnkplá tú ɖíɖó lɛ́ é ka lɛ́ syɛ́n tawun wútu.”—10 juillet 2022, xójláwéma The Japan Times.

•   “Ahwi xo Danemark to ɔ, hwenu e nya ɖé da tú bo hu mɛ atɔn ɖo nǔsatɛn Copenhagen tɔn é.”—4 juillet 2022, xójláwéma Reuters.

•   “Afrique du Sud: Súnnu ɖé lɛ́ bɔ tú nyi mɛ lɛ́ mɛ ɖo nǔbaɖutɛn ɖé ɖo toxo Soweto tɔn mɛ, bo hu gbɛtɔ́ 15.”—10 juillet 2022, xójláwéma The Guardian.

•   “Gbɛtɔ́ 220 jɛjí wɛ è hu kpó tú kpó ɖo États-Unis ɖo xweɖuɖu 4 juillet tɔn hwenu.”—5 juillet 2022, xójláwéma CBS News.

 Nukúnɖíɖó ka ɖe ɖɔ dǎkaxixo mɔ̌hun ná wá nɔ te gbeɖé a? Étɛ́ Biblu ka ɖɔ?

 Biblu ylɔ́ hwenu e mǐ ɖo gbɛ nɔ ɖe wɛ é ɖɔ “azǎn gǔdo gúdo tɔn lɛ́.” Hwenu ɖé wɛ bɔ gbɛtɔ́ lɛ́ ná nɔ nylá hun, xo adǎka, bo ná nɔ wa alǎnnú. (2 Timɔtée 3:1, 3) Dǎkaxixo mɔ̌hun lɛ́ nɔ zɔ́n bɔ gbɛtɔ́ lɛ́ nɔ ɖo síjá jí ɖo gbɛ ɔ mɛ. (Luki 21:11) É ɖo mɔ̌ có, Biblu d’akpá ɖɔ malínmálín mɛ ɔ, dǎkaxixo kún sɔ́ ná tíin ó, bɔ gbɛtɔ́ lɛ́ “ná mɔ fífá; [yě] ná vo, [yě] sɔ́ ná nɔ lin nǔɖé ǎ.” (Ezayíi 32:18) Nɛ̌ dǎkaxixo ka ná wá vivɔnu gbɔn?

 Mawu ná sú kún dó nú mɛ nyanya lɛ́ kpó ahwanlyánnú lɛ́ bǐ kpó.

•   “Mɛ nyanya lɛ́ ɔ, è ná ɖe yě sín ayǐkúngban ɔ jí.”—Nǔnywɛ́xó 2:22, nwt.

•   “[Mawu] wɛ sú ahwan kún dó gbɔn gbɛ ɔ bǐ mɛ. É wɛ́n gǎ lɛ́, é lɔ́ hwǎn lɛ́, é dó ahwankɛkɛ́ lɛ́ zo.”—Ðɛhan 46:10.

 Mawu ná kplɔ́n gbɛtɔ́ lɛ́ bɔ yě ná nyí mɛfífá, bɔ mɔ̌ mɛ ɔ, é ná ɖó nǔ dǎkaxixo nu.

•   “È ná wa nǔ nyanya ɖěbǔ ǎ, è ná hɛn nǔ ɖěbǔ gblé ɖo só mímɛ́ tɔn jí ǎ, ɖó Mawu Mavɔmavɔ tuuntuun ná gɔ́ to ɔ, lěe sin gɔ́ xuzan jí é ɖɔhun.”—Ezayíi 11:9.

•   É ná bo tlɛ nyí din ɔ, Mawu ɖo nǔ kplɔ́n gbɛtɔ́ lɛ́ wɛ gbɔn gbɛ ɔ bǐ mɛ, bónú yě ná nyi alɔ nú dǎkaxixo kpó ahwanlyánnú lɛ́ zínzán kpó, lobo ná “sɔ́ hwǐ yětɔn dó tun alǐn ná, bo ná sɔ́ hwǎn yětɔn dó tun gyankpa ná.”—Micée 4:3.

 Nú a ná kplɔ́n nǔ ɖěvo lɛ́ dó akpá e Biblu dó dó gbɛ e mɛ xɛsi ma ná ɖe ǎ é wú é wú hǔn, xa xóta “Affranchis de la peur : est-ce possible ?”

 Nú a ná kplɔ́n nǔ dó lěe dǎkaxixo ná wá vivɔnu káká sɔ́yi gbɔn é wú hǔn, xa xóta “Enfin la paix sur la terre !”