Wěma nukɔntɔn e è wlán sɛ́dó Kɔlɛ́ntinu lɛ́ é 9:1-27
9 Un ɖo nyiɖée sí ǎ cé? Un nyí mɛsɛ́dó ǎ cé? Un mɔ Jezu Aklúnɔ mǐtɔn ǎ cé? Azɔ̌ e un wa ɖo Aklúnɔ mɛ é ɔ, mi wɛ nyí sínsɛ́n tɔn ǎ cé?
2 Un ná bo ma tlɛ nyí mɛsɛ́dó nú mɛ ɖěvo lɛ́ ǎ ɔ, é ɖo wɛn ɖɔ un nyí nú midɛɛ lɛ́! Ðó mi wɛ nyí xlɛ̌* e dó zǒgbe jí ɖɔ un nyí mɛsɛ́dó Aklúnɔ tɔn é.
3 Xó e un ná ɖɔ nú mɛ e nɔ mɔ xó ɖɔ dó wǔ ce lɛ́ é dó jɛ hun dó nyiɖée jí é ɖíe:
4 Mǐ ɖó acɛ bo ná ɖu nǔ e è xwlé mǐ lɛ́ é, bo lɛ́ nu nǔ e è xwlé mǐ lɛ́ é ǎ cé?
5 Mǐ ɖó acɛ bo ná da nyɔ̌nu e nyí nǔɖitɔ́ é* bo kplá hɛn mɛsɛ́dó e kpo lɛ́ é, Aklúnɔ sín nɔví lɛ́ kpó Sefási* kpó ɖɔhun ǎ cé?
6 Alǒ nyɛ kpó Baanabási kpó kɛ́ɖɛ́ jɛ́n ɖó ná w’azɔ̌ cóbó sú hudó mǐtɔn lɛ́ sín do a?
7 Sɔ́ja tɛ́ ka nɔ zán akwɛ́ éɖésúnɔ tɔn dó wa ahwanzɔ́ gbeɖé? Mɛ̌ ka nɔ tun vǐwun bo ma nɔ ɖu sínsɛ́n tɔn ǎ? Alǒ mɛ̌ ka nɔ ɖo kanlin nyi wɛ bo ma nɔ nu kanlin lɛ́ sín anɔ̌sin ɖě ɖ’é mɛ ǎ?
8 Linlin gbɛtɔ́ tɔn wɛ un sɔ́ dó ɖɔ xó énɛ́ lɛ́ a? Alǒ Sɛ́n ɔ lɔ ɖɔ xó énɛ́ lɛ́ ǎ cé?
9 Ðó è wlán ɖo Mɔyízisɛ́n ɔ mɛ ɖɔ: “A ɖó ná dó aja nu nú nyibú* e ɖo nǔkún só wɛ é ǎ.” Nyibú lɛ́ kɛ́ɖɛ́ sín nǔ wɛ ɖu ayi mɛ nú Mawu a?
10 È ná ɖɔ xójɔxó ɔ, mǐdɛɛ lɛ́ wú wɛ é ɖɔ mɔ̌ ǎ cé? Nǔgbó ɔ, mǐdɛɛ lɛ́ wú wɛ è wlán mɔ̌, ɖó mɛ e ɖo gle lɛ wɛ é kpó mɛ e ɖo nǔkún só wɛ é kpó ɖó ná ɖó nukún ɖɔ émí ná mɔ émítɔn ɖ’é mɛ.
11 Ényí mǐ dó nǔ gbigbɔ tɔn lɛ́ dó ayi mitɔn mɛ ɔ, nǔ nyanya wɛ é nyí ɖɔ mǐ ní ɖó nukún ɖɔ mi ná nɔ gǔdo nú mǐ ɖo nǔ e hudó mǐ lɛ́ é mɛ a?
12 Ényí mɛ ɖěvo lɛ́ ɖó acɛ bɔ mi ná nɔ gǔdo nú yě ɔ, mǐdɛɛ lɛ́ ɖó acɛ hú mɔ̌ ǎ cé? É ɖo mɔ̌ có, mǐ zán acɛ énɛ́ ǎ, é nyɔ́ wa ɔ, mǐ ɖo didɛ ɖo nǔ lɛ́ bǐ nu wɛ, bo ná dó sixú bló bónú nǔ ɖěbǔ ní ma nyí afɔklɛ́nnú nú wɛn ɖagbe e ɖɔ xó dó Klísu wú é ó.
13 Mi tuun ɖɔ mɛ e nɔ w’azɔ̌ ɖo tɛ́npli ɔ mɛ lɛ́ é ɔ, nǔ e ɖo tɛ́npli ɔ mɛ lɛ́ é wɛ yě nɔ ɖu, bɔ mɛ e nɔ w’azɔ̌ ɖo vɔ̌sákpe ɔ kɔn ɖo gbesisɔmɛ lɛ́ é nɔ yí nǔ e è xwlé Mawu ɖo vɔ̌sákpe ɔ jí lɛ́ é ɖě ɖ’é mɛ ǎ cé?
14 Ðo ali ɖokpó ɔ nu ɔ, Aklúnɔ ɖe gbe ɖɔ mɛ ɖěɖěe nɔ jlá wɛn ɖagbe ɔ lɛ́ é ɖó ná nɔ gbɛ gbɔn wɛn ɖagbe ɔ gblamɛ.
15 É ɖo mɔ̌ có, un zán acɛ énɛ́ lɛ́ ɖokpó vɔ́vɔ́ ǎ. Nǔgbó ɔ, é nyí mi ná wa nǔ énɛ́ lɛ́ nú mì wútu wɛ un wlán sɛ́dó mi ǎ, ɖó é ná kpɔ́n te ɖɔ má kú hú ɖɔ . . . Un ná lɔn bónú mɛ ɖěbǔ ná yí hwɛjijɔ e zɔ́n bɔ un nɔ gó é sín así ce ǎ!
16 Din ɔ, nú un ɖo wɛn ɖagbe ɔ jlá wɛ ɔ, un ɖó hwɛjijɔ ɖě bo ná gó ǎ, ɖó dandan mɛ wɛ é ɖe nú mì. Nǔgbó ɔ, ényí un ma jlá wɛn ɖagbe ɔ ǎ ɔ, heelú mì!
17 Nú nyiɖésúnɔ jló bo jlá ɔ, un ná mɔ ajɔ tɔn; amɔ̌, ényí é ná bo ma tlɛ jló mì cóbónú un jlá ǎ ɔ, azɔ̌ wɛ é ka nyí bɔ è zɔ́n mì.
18 Ajɔ tɛ́ un ka ná mɔ lo? É wɛ nyí ɖɔ, nú un ɖo wɛn ɖagbe ɔ jlá wɛ ɔ, un ná jlá vɔ̌nu, énɛ́ ɔ, un ná wa nǔ zɛ acɛ e un ɖó bɔ é kunkplá wɛn ɖagbe ɔ é wú ǎ.
19 Nyiɖésúnɔ sí wɛ un ɖe có, un sɔ́ nyiɖée dó ɖó kannumɔ nú mɛ bǐ bo ná dó sixú dɔn mɛ gěgé lěe é nyɔ́ bló gbɔn é.
20 Un ɖo Jwifu lɛ́ tɛ́ntin ɔ, un nɔ sɔ́ nyiɖée dó ɖó Jwifu bo ná dó sixú dɔn Jwifu lɛ́; un ɖo mɛ e ɖo Sɛ́n ɔ glɔ́ lɛ́ é tɛ́ntin ɔ, nyɛ ɖo Sɛ́n ɔ glɔ́ ǎ có, un nɔ sɔ́ nyiɖée dó ɖó mɛ e ɖo Sɛ́n ɔ glɔ́ é bo ná dó sixú dɔn mɛ e ɖo Sɛ́n ɔ glɔ́ lɛ́ é.
21 Nú un ɖo mɛ e ma ɖo Sɛ́n ɔ glɔ́ ǎ lɛ́ é tɛ́ntin ɔ, nyɛ nɔ xwedó Mawu sín sɛ́n ɔ bo lɛ́ ɖo Klísu sín sɛ́n ɔ glɔ́ có, un nɔ sɔ́ nyiɖée dó ɖó mɛ e ma ɖo Sɛ́n ɔ glɔ́ ǎ é bo ná dó dɔn mɛ e ma ɖo Sɛ́n ɔ glɔ́ ǎ lɛ́ é.
22 Nú un ɖo mɛ e ma ɖó gǎn ǎ lɛ́ é tɛ́ntin ɔ, un nɔ sɔ́ nyiɖée dó ɖó mɛ e ma ɖó gǎn ǎ é bo ná dó dɔn mɛ e ma ɖó gǎn ǎ lɛ́ é. Un sɔ́ nyiɖée dó ɖó nǔ bǐ nú gbɛtɔ́ alɔkpa lɛ́ bǐ bo ná dó sixú hwlɛ́n mɛɖé lɛ́ gán gbɔn alɔkpa lɛ́ bǐ mɛ.
23 Wɛn ɖagbe ɔ wú wɛ un nɔ wa nǔ lɛ́ bǐ, bo ná dó sixú jlá mɛ ɖěvo lɛ́.
24 Mi tuun ɖɔ ɖo wezun kínkán ɖé hwenu ɔ, wezunkántɔ́ lɛ́ bǐ wɛ nɔ kán wezun ɔ bɔ mɛ ɖokpó géé ka nɔ yí ajɔ ɔ ǎ cé? Mi bo kán wezun ɔ gbɔn alɔkpa ɖé, bo ná dó sixú ɖu ɖ’é jí.
25 Mɛ e ɖo agba hwlɛ́n wɛ ɖo agbahwlɛ́nhwlɛ́n ɖé hwenu lɛ́ é* bǐ wɛ nɔ ɖu ɖo yěɖée jí ɖo nǔ bǐ mɛ. É ɖo wɛn ɖɔ yě nɔ wa mɔ̌ bo ná dó mɔ ɖuɖéjígbákún e nɔ gblé é yí, amɔ̌, mǐdɛɛ lɛ́ nɔ wa mɔ̌ bo ná dó mɔ ɖuɖéjígbákún e ma nɔ gblé ǎ é yí.
26 Énɛ́ wú ɔ, nǔɖé gbé nya wɛ un ɖe bo ɖo wezun kán wɛ; un nɔ nyi akpotokwín, é ka nyí dó jɔhɔn mɛ ǎ;
27 loɔ, un nɔ dó nǔ agbaza ce* bo nɔ hɛn ɛ kannumɔ ɖɔhun, bónú ényí un ɖɔ mawuxó ɔ nú mɛ ɖěvo lɛ́ gúdo ɔ, Mawu ma wá gbɛ́ mì ó.
Tínmɛ e ɖo do lɛ́ é
^ Blǔju tɔn, “wuntun.”
^ Alǒ “nɔví nyɔ̌nu ɖé.”
^ È nɔ lɛ́ ylɔ́ ɛ ɖɔ Piyɛ́ɛ.
^ Blǔju tɔn, “nyibúsú.”
^ Alǒ “Agbazamɛgándótɔ́ lɛ́; lɔ̌nyijǐfɔnkanyihúndatɔ́ lɛ́.”
^ Alǒ “dɔn tó nú agbaza ce; gbɛ́ nǔ nú agbaza ce syɛ́nsyɛ́n.”
