Jaan wegɔ́ 1:1-13
1 Nyɛ mɛxómɔ* ɔ wɛ ɖo wěma élɔ́ wlán sɛ́dó nyɔ̌nu e è sɔ́ é kpó vǐ tɔn lɛ́ kpó wɛ. Un yí wǎn nú vǐ t ɔn lɛ́ tawun, é ka nyí nyiɖokpó wɛ ǎ, loɔ, mɛ e kplɔ́n bo tuun nǔgbó ɔ lɛ́ é bǐ wɛ,
2 ɖó nǔgbó ɔ ɖo ayi mǐt ɔn mɛ, bo ka ná nɔ mɛ káká sɔ́yi.
3 Mawu Tɔ́ ɔ, kpó Tɔ́ ɔ sín Vǐ Jezu Klísu kpó sín fɛ́nú, nǔbláwǔkúnúmɛ kpó fífá kpó ná nɔ kpɔ́ xá mǐ, ɖo nǔgbó kpó wǎnyíyí kpó mɛ.
4 Un ɖó awǎjijɛ tawun, ɖó un se ɖɔ vǐ towe ɖé lɛ́ ɖo nǔgbó ɔ sín ali xwedó wɛ, lěe Tɔ́ ɔ ɖe gbe tɔn nú mǐ gbɔn é.
5 Énɛ́ wú ɔ, nyɔ̌nu e è sɔ́ é, un ɖo byɔ̌byɔ́ we wɛ din ɖɔ mǐ ní yí wǎn nú mǐɖée lɛ́. (Un ɖo sɛ́n ɖokpó wlán sɛ́dó mi wɛ, é ka nyí sɛ́n yɔ̌yɔ́ wɛ ǎ, loɔ, ée mǐ ko ɖó sín bǐbɛ́mɛ é wɛ.)
6 Nǔ e wǎnyíyí sín tínmɛ nyí é ɖíe: mǐ ní nɔ zán gbɛ sɔgbe xá sɛ́n tɔn lɛ́. Sɛ́n e mi ko se sín bǐbɛ́mɛ é ɖíe: mi ɖó ná nɔ zán gbɛ ɖo wǎnyíyí mɛ.
7 Ðó mɛblɛ́tɔ́ gěgé wɛ ko xwet ɔ́n ɖo gbɛ ɔ mɛ, yě mɛ e ma yí gbe ɖɔ Jezu Klísu zɔn agbaza mɛ wá ǎ lɛ́ é. Mɛblɛ́tɔ́ ɔ nɛ́, kɛntɔ́ Klísu tɔn ɔ nɛ́.
8 Mi cɔ́ miɖée, bo ma wá hɛn le azɔ̌ e mǐ wa é tɔn lɛ́ bú ó. Énɛ́ ɔ, mi ná mɔ nyɔ̌ná e sín nǔ Mawu sɔ́ nú mi lɛ́ é bǐ.
9 Mɛ ɖěbǔ e ma nɔ tɛ́ dó nǔkplɔ́nmɛ Klísu tɔn ɔ wú ǎ, bo nɔ wa nǔ zɛ wú é ɖo bǔ xá Mawu ǎ. Mɛ e ka nɔ tɛ́ dó nǔkplɔ́nmɛ énɛ́ ɔ wú é ɖo bǔ xá Tɔ́ ɔ kpó Vǐ ɔ kpó.
10 Ényí mɛɖé wá gɔ̌n mitɔn bo ma hɛn nǔkplɔ́nmɛ énɛ́ ɔ wá ǎ hǔn, mi ma yí i dó xwé mitɔn gbe ó, mi ma ka dó gbe è ó.
11 Ðó mɛ e dó gbe è é ɔ, azɔ̌ tɔn nyanya lɛ́ mɛ ɖ’alɔ ɖe wɛ é ɖe.
12 Un ɖó xó gěgé bo ná ɖɔ nú mi có, un ka ba ná zán wěma kpó wěmasin kpó dó wa mɔ̌ ǎ; amɔ̌, un ɖo nukún ɖó wɛ bo ná wá mi gɔ́n, bónú mǐ ná kpé nu bo ɖɔ xó, lobonú awǎjijɛ mitɔn ní dó sixú túnflá.
13 Nɔví nyɔ̌nu towe, ée è sɔ́ é, sín vǐ lɛ́ dó gbe sɛ́dó we.
Tínmɛ e ɖo do lɛ́ é
^ Alǒ “mɛxó agun tɔn.”
